U19 Women's T20 World Cup 2023: ટીમ ઈન્ડિયાનો ફાઈનલમાં ઈંગ્લેન્ડ સામે મુકાબલો, ઓસ્ટ્રેલિયા ખિતાબની રેસમાંથી બહાર

અંડર-19 મહિલા T20 વર્લ્ડ કપ 2023ની ફાઈનલ મેચ ભારત અને ઈંગ્લેન્ડ વચ્ચે રમાશે. ઈંગ્લેન્ડે સેમીફાઈનલમાં ઓસ્ટ્રેલિયાને 3 રને હરાવ્યું હતું.

તસવીર બીસીસીઆઈ

India vs England Final U19 Women's T20 World Cup 2023: અંડર-19 મહિલા T20 વર્લ્ડ કપ 2023ની ફાઈનલ મેચ ભારત અને ઈંગ્લેન્ડ વચ્ચે રમાશે. ઈંગ્લેન્ડે સેમીફાઈનલમાં ઓસ્ટ્રેલિયાને 3 રને હરાવ્યું હતું. જ્યારે ટીમ ઈન્ડિયાએ ન્યૂઝીલેન્ડને 8 વિકેટે કચડી નાખ્યું હતું. ભારતની શાનદાર જીત બાદ ઇંગ્લેન્ડે પણ રોમાંચક મેચ જીતીને ફાઇનલમાં જગ્યા બનાવી લીધી છે. હવે 29 જાન્યુઆરીએ ભારત અને ઈંગ્લેન્ડ વચ્ચે ફાઈનલ મેચ રમાશે. આ મેચ દક્ષિણ આફ્રિકાના પોટચેફસ્ટૂમમાં રમાશે.

ભારતે પ્રથમ સેમીફાઈનલ મેચમાં ન્યુઝીલેન્ડ સામે શાનદાર જીત નોંધાવી હતી. આ પછી ઈંગ્લેન્ડ અને ઓસ્ટ્રેલિયા વચ્ચે બીજી સેમીફાઈનલ મેચ રમાઈ હતી. પ્રથમ બેટિંગ કરવા ઉતરેલી ઈંગ્લેન્ડની ટીમ માત્ર 99 રનના સ્કોર પર સમેટાઈ ગઈ હતી. આ દરમિયાન ટીમ માટે એલેક્સ સ્ટોનહાઉસે સૌથી વધુ 25 રન બનાવ્યા હતા. તેણે 33 બોલમાં 25 રન બનાવ્યા હતા. જવાબમાં ઓસ્ટ્રેલિયન ટીમ 96 રનના સ્કોર પર સમેટાઈ ગઈ હતી. આ રીતે ઈંગ્લેન્ડે રોમાંચક જીત નોંધાવી હતી.

ઓસ્ટ્રેલિયન ઈનિંગ દરમિયાન હેન્ના બેકરે ઈંગ્લેન્ડની વચ્ચે ખતરનાક બોલિંગ કરી હતી. તેણે 4 ઓવરમાં માત્ર 10 રન આપીને 3 વિકેટ લીધી હતી. કેપ્ટન ગ્રેસ સ્ક્રિવેને 3.4 ઓવરમાં 8 રન આપીને 2 વિકેટ લીધી હતી. એલી એન્ડરસને પણ એક વિકેટ લીધી હતી. તેણે 2 ઓવરમાં 6 રન આપ્યા હતા.

ઉલ્લેખનીય છે કે, ભારત અને ઈંગ્લેન્ડ વચ્ચે રમાનારી ફાઈનલ મેચ રોમાંચક બની શકે છે. આ મેચમાં ટીમ ઈન્ડિયાનો દબદબો રહી શકે છે. ટીમ ઈન્ડિયા આ વખતે ટુર્નામેન્ટમાં માત્ર એક જ મેચ હારી છે. તેને ઓસ્ટ્રેલિયાએ 7 વિકેટે પરાજય આપ્યો હતો. આ સાથે જ ટીમ ઈન્ડિયાએ શ્રીલંકા, ઓસ્ટ્રેલિયા, સ્કોટલેન્ડ અને દક્ષિણ આફ્રિકાને હરાવ્યું છે. મહત્વની વાત એ છે કે ટૂર્નામેન્ટમાં સૌથી વધુ રન બનાવનાર ખેલાડી પણ ભારતની છે. શ્વેતા સેહરાવતે 6 મેચમાં 192 રન બનાવ્યા છે. 

ટીમ ઈન્ડિયા પોઇન્ટ ટેબલમાં ટોપ પર

ભારતીય ટીમ ICC અંડર-19 મહિલા T20 વર્લ્ડ કપના ગ્રુપ Dમાં છે. ટીમ ઈન્ડિયા પોઈન્ટ ટેબલમાં ટોપ પર છે. સેમિફાઇનલમાં તેનો સામનો ન્યુઝીલેન્ડ સામે થયો હતો. ટીમ ઈન્ડિયાએ સેમીફાઈનલમાં શાનદાર પ્રદર્શન કર્યું હતું અને 8 વિકેટે જીત મેળવી હતી. હવે ભારતીય ટીમ 29 જાન્યુઆરીએ ફાઇનલ મેચ રમશે.

ન્યુઝીલેન્ડે બનાવ્યા 107 રન

પ્રથમ બેટિંગ કરતા ન્યુઝીલેન્ડની અંડર-19 મહિલા ટીમે 20 ઓવરમાં 107 રન બનાવ્યા હતા. આ દરમિયાન ટીમ માટે જ્યોર્જિયા પ્લિમરે સૌથી વધુ 35 રન બનાવ્યા હતા. તેણે 32 બોલનો સામનો કરતી વખતે 2 ચોગ્ગા ફટકાર્યા હતા. આ દરમિયાન ભારત તરફથી પાર્શ્વી ચોપરાએ 3 વિકેટ ઝડપી હતી. તેણે 4 ઓવરમાં 20 રન આપીને મેડન ઓવર લીધી. કેપ્ટન શેફાલી વર્માએ ખતરનાક બોલિંગ કરી. તેણે 4 ઓવરમાં માત્ર 7 રન આપીને એક વિકેટ લીધી હતી.