ચેતન ચૌહાણના નામે છે ટેસ્ટ ક્રિકેટમાં આ ખાસ રેકોર્ડ, જાણો વિગતે

જુલાઈમાં કોરોના પોઝિટિવ આવ્યા બાદ તેમને એસજીપીજીઆઈમાં દાખલ કરવામાં આવ્યા હતા.

લખનઉઃ ભારતીય ક્રિકેટ ટીમના પૂર્વ ઓપનિંગ બેટ્સમેન અને ઉત્તરપ્રદેશના સૈનિક કલ્યાણ, હોમગાર્ડ, પીઆરડી અને નાગરિક સુરક્ષા મંત્રી ચેતન ચૌહાણનું નિધન થયું છે. 73 વર્ષીય ચેતન ચૌહાણની તબિયત ખરાબ થયા બાદ તેમને શુક્રવારે મેદાંતા હોસ્પિટલમાં દાખલ કરવામાં આવ્યા હતા. જ્યાં તેમને લાઇફ સપોર્ટ સિસ્ટમ પર રાખવામાં આવ્યા હતા. તેઓ કિડનીની બીમારીથી પીડાતા હતા. ચેતન ચૌહાણની ઈન્ટરનેશનલ કરિયર ચેતન ચૌહાણે ઈન્ટરનેશનલ કરિયરમાં દિગ્ગજ બેટ્સમેન સુનીલ ગાવસ્કર સાથે અનેક યાદગાર ઈનિંગ રમી છે. ગાવસ્કર સાથે ચેતનનો તાલમેલ અદભૂત હતો. ચેતન ચૌહાણે 40 ટેસ્ટની 68 ઈનિંગમાં 16 અડધી સાથે 2084 રન બનાવ્યા હતા. તેમનો સર્વોચ્ચ સક્રો 97 રન છે. જ્યારે 7 વન ડેમાં 153 રન બનાવ્યા છે. ટેસ્ટ કરિયરમાં સદી ફટકાર્યા સિવાય બે હજાર રન બનાવનારા વિશ્વના પ્રથમ ક્રિકેટર હતા. ટેસ્ટ ક્રિકેટમાં સદી ફટકાર્યા સિવાય સૌથી વધારે રન બનાવવાનો રેકોર્ડ શેન વોર્નના નામે છે. વોર્ને 1992-2007 દરમિયાન 45 ટેસ્ટમાં 3154 રન બનાવ્યા અને તેનો સર્વોચ્ચ સ્કોર 99 રન હતો. ગાવસ્કર અને ચૌહાણની જોડીએ ટેસ્ટની 60 ઈનિંગમાં 54.85ની સરેરાશથી 3127 રન બનાવ્યા છે. બંનેએ કુલ 11 વખત સદીની પાર્ટનરશિપ કરી છે. જેમાંથી 10 વખત પ્રથમ વિકેટ માટે છે. રાજકીય સફર ચેતન ચૌહાણ ભારતીય જનતા પાર્ટીની ટિકિટ પરથી 1991માં અમરોહાથી ચૂંટણી લડ્યા અને સાંસદ તરીકે ચૂંટાયાય જે બાદ 1996માં આ સીટ પરથી તેમની હાર થઈ હતી. 1998માં ચૌહાણ ફરી સાંસદ તરીકે ચૂંટાયા હતા. વર્ષ 1999 અને 2004માં લોકસભા ચૂંટણીમાં તેમણે કિસ્મત અજમાવ્યું પણ હારનો સામનો કરવો પડ્યો. હાલ તેઓ અમરોહા જિલ્લાના નૌગાંવ વિધાનસભાથી ધારાસભ્ય હતા.