IPL 2024: રોમાંચક મુકાબલામાં KKRની જીત,હૈદરાબાદને કામ ન આવી ક્લાસેનની તોફાની ઈનિંગ 

IPL 2024 માં કોલકાતા નાઈટ રાઈડર્સ (KKR) અને સનરાઈઝર્સ હૈદરાબાદ (SRH) વચ્ચે 23 માર્ચે ઈડન ગાર્ડન્સ ખાતે મેચ રમાઈ હતી.

તસવીર સોશિયલ મીડિયા

KKR vs SRH: IPL 2024 માં કોલકાતા નાઈટ રાઈડર્સ (KKR) અને સનરાઈઝર્સ હૈદરાબાદ (SRH) વચ્ચે 23 માર્ચે ઈડન ગાર્ડન્સ ખાતે મેચ રમાઈ હતી. SRHના કેપ્ટન પેટ કમિન્સે ટોસ જીત્યા બાદ બોલિંગ કરવાનું પસંદ કર્યું અને શરૂઆતમાં તેની ટીમના બોલરોએ કોલકાતાના બેટ્સમેનોને પરેશાન કર્યા. પરંતુ આન્દ્રે રસેલના તોફાનના કારણે કોલકાતાની ટીમ 208 રન બનાવી શકી હતી. લક્ષ્યનો પીછો કરતી વખતે સનરાઇઝર્સ હૈદરાબાદને સારી શરૂઆત મળી હતી, પરંતુ મોટો સ્કોર હાંસલ કરવાના દબાણમાં ટીમ સતત વિકેટો ગુમાવતી રહી હતી. અંતે હેનરિક ક્લાસેનની ઇનિંગ્સે SRHને જીતની  આશા આપી હતી, પરંતુ અંતે તેમને 4 રનથી હારનો સામનો કરવો પડ્યો હતો.

KKR માટે આન્દ્રે રસેલની તોફાની ઇનિંગ્સ

કોલકાતા નાઈટ રાઈડર્સ તરફથી ફિલિપ સોલ્ટ અને સુનીલ નારાયણે ઈનિંગની શરૂઆત કરી હતી, પરંતુ નારાયણ માત્ર 2 રન બનાવીને પેવેલિયન પરત ફર્યો હતો. જે બાદ 28 રનની અંદર શ્રેયસ અય્યર, નીતીશ રાણા અને વેંકટેશ અય્યર પણ પેવેલિયન પરત ફર્યા હતા. ટીમનો સ્કોર 51 રનમાં 4 વિકેટે હતો. રમનદીપ સિંહે પણ 17 બોલમાં 35 રન બનાવીને પ્રભાવિત કર્યા હતા, પરંતુ આન્દ્રે રસેલના વાવાઝોડા સામે તેની ઇનિંગ્સ ફિક્કી પડી હતી. રસેલે માત્ર 20 બોલમાં પોતાની અડધી સદી પૂરી કરી હતી. તેણે 25 બોલની ઈનિંગમાં 3 ચોગ્ગા અને 7 છગ્ગા સાથે 64 રનની તોફાની ઈનિંગ રમી હતી. આ દરમિયાન રિંકુ સિંહે પણ 15 બોલમાં 23 રનનું યોગદાન આપ્યું હતું.

SRH માટે ક્લાસેનની મહેનત પાણીમાં ગઈ

સનરાઇઝર્સ હૈદરાબાદ તરફથી મયંક અગ્રવાલ અને અભિષેક શર્મા ઓપનિંગ કરવા આવ્યા હતા. આ જોડીએ છઠ્ઠી ઓવર પુરી થાય તે પહેલા જ ટીમનો સ્કોર 60 સુધી પહોંચાડી દીધો હતો, પરંતુ મયંક અગ્રવાલના આઉટ થયા બાદ ટીમના બેટ્સમેનો આઉટ થવા લાગ્યા હતા. મયંકે 21 બોલમાં 32 અને અભિષેકે 19 બોલમાં 32 રન બનાવ્યા હતા. રાહુલ ત્રિપાઠી અને એડન માર્કરામે પણ અનુક્રમે 20 અને 18 રનની ઇનિંગ રમી હતી, પરંતુ જવાબદારી સંભાળતા કોઇપણ ખેલાડી મોટી ઇનિંગ રમી શક્યો નહોતો. ટીમ 20-30 રનના અંતરાલમાં વિકેટો ગુમાવતી રહી. હેનરિચ ક્લાસને ચોક્કસપણે અંતમાં મોટા શોટ મારવાનો પ્રયાસ કર્યો, પરંતુ રન રેટ ખૂબ જ ઊંચો હતો. ક્લાસને 29 બોલમાં 63 રનની શાનદાર ઇનિંગ રમી હતી, પરંતુ અંતે SRHને 4 રનથી હારનો સામનો કરવો પડ્યો હતો.