વર્લ્ડ બોક્સિંગ ચેમ્પિયનશીપમાં સિલ્વર મેડલ જીતી અમિત પંઘલે રચ્યો ઇતિહાસ

ભારતના સ્ટાર બોક્સર અમિત પંઘલે વર્લ્ડ ચેમ્પિયનશીપમાં સિલ્વર મેડલ હાંસલ કરનાર પ્રથમ ભારતીય પુરુષ બોક્સર બની ગયો છે.

નવી દિલ્હીઃ એશિયન ચેમ્પિયન અમિત પંઘલે શનિવારે રશિયાના એકાતેરિનબર્ગમાં આયોજીત વર્લ્ડ બોક્સિંગ ચેમ્પિયનશીપ 2019ના 52 કિલોગ્રામ વર્ગમાં સિલ્વર મેડલ જીતીને ઇતિહાસ રચી દીધો છે. ભારતના સ્ટાર બોક્સર અમિત પંઘલે વર્લ્ડ ચેમ્પિયનશીપમાં સિલ્વર મેડલ હાંસલ કરનાર પ્રથમ ભારતીય પુરુષ બોક્સર બની ગયો છે. ટુનામેન્ટમાં બીજો ક્રમ ધરાવનાર પંઘલને ફાઇનલમાં રિયો ઓલિમ્પિકમાં ગોલ્ડ મેડલ વિજેતા ઉઝ્બેકિસ્તાની બોક્સર  શાખોબિદિન જોઇરોવે 5-0થી હાર આપી હતી. તમામ પાંચ જજોએ એક મતથી શાખોબિદિનના પક્ષમાં પોતાનો નિર્ણય સંભળાવ્યો હતો અને પંઘલને સિલ્વર મેડલથી સંતોષ માનવો પડ્યો હતો. અમિત પંઘલ સેમિફાઇનલ મેચમાં કઝાકિસ્તાનના સાકેન બિબિસિનોવને હરાવીને વર્લ્ડ બોક્સિંગ ચેમ્પિયનશીપની ફાઇનલમાં પહોંચનાર પ્રથમ ભારતીય પુરુષ બોક્સર બન્યો હતો. ભારતીય બોક્સર પ્રથમ રાઉન્ડરમાં ડિફેન્સિલ અંદાજમાં રમતો જોવા મળ્યો હતો. બીજી રાઉન્ડમાં તેમણે તક બનાવવાની શરૂઆત કરી થોડી આક્રમકતા બતાવી હતી. ત્રીજા અને અંતિમ રાઉન્ડમાં જોઇરોવે કેટલાક સારા પંચ  માર્યા હતા. પરંતુ જજનો અંતિમ નિર્ણય સર્વસંમતિથી જોઇરોવના પક્ષમાં ગયો હતો અને તે ગોલ્ડ મેડલ જીતવામાં સફળ રહ્યો હતો. ભારતે આ અગાઉ વર્લ્ડ બોક્સિંગ ચેમ્પિયનશીપમાં બ્રોન્ઝ મેડલ જીત્યો હતો. મનીષ કૌશિકે આ વખતે 63 કિલોગ્રામ વર્ગમાં બ્રોન્ઝ મેડલ જીત્યો હતો. તે સિવાય વિજેન્દ્ર સિંહે 2009, વિકાસ કૃષ્ણએ 2011, શિવ થાપાએ 2015 અને ગૌરવ બિઘુડીએ 2017માં વર્લ્ડ ચેમ્પિયનશીપમાં બ્રોન્ઝ મેડલ જીત્યા હતા. આ પ્રકારે અમિત પંઘલે આ વખતે ફાઇનલ મેચમાં હાર છતા રેકોર્ડ બનાવ્યો હતો. અમિત અને મનીષે ભારત માટે પોતપોતાના વર્ગમાં ઓલિમ્પિક ક્વોટા હાંસલ કરી લીધો છે.