‘Instagram ફક્ત છોકરીઓ માટે છે!’ એલોન મસ્કના આ નિવેદનથી સોશિયલ મીડિયા પર હોબાળો

Elon Musk on Instagram: આ નિવેદનને લઈને સોશિયલ મીડિયા પર ઘણી ટીકા થઈ. ઘણા યુઝર્સે તેને મહિલાઓ અને જેન્ડર ઓળખને લઈને અપમાનજનક વિચાર ગણાવ્યો.

ઇન્સ્ટાગ્રામ અંગે મસ્કની વિવાદિત ટિપ્પણી

Source : x

Show Quick Read

Key points generated by AI, verified by newsroom

• એલોન મસ્કે ઇન્સ્ટાગ્રામને છોકરીઓનું પ્લેટફોર્મ ગણાવી નવો વિવાદ સર્જ્યો.
• વાયરલ પોસ્ટ પર કોમેન્ટ કરતાં તેમણે આ નિવેદન આપ્યું હતું.
• મસ્કની ટિપ્પણીને મહિલાઓ અને જેન્ડર ઓળખ સંબંધિત અપમાનજનક ગણાવી.
• આ નિવેદનોથી X પ્લેટફોર્મને પ્રોત્સાહન આપવાનો પ્રયાસ હોઈ શકે.

Elon Musk on Instagram: એલોન મસ્ક ફરી એકવાર પોતાના નિવેદનને કારણે ચર્ચામાં છે. આ વખતે તેમણે Instagram ને છોકરીઓનું પ્લેટફોર્મ કહીને નવો વિવાદ ઊભો કર્યો છે. મસ્કનું આ નિવેદન સોશિયલ મીડિયા પર ઝડપથી વાયરલ થઈ ગયું અને લોકો વચ્ચે ચર્ચાઓ શરૂ થઈ ગઈ.

 

વાયરલ પોસ્ટ પર કરી કોમેન્ટ

આખો મામલો ત્યારે શરૂ થયો જ્યારે સોશિયલ મીડિયા પર એક વાયરલ થ્રેડ ચાલી રહ્યો હતો જેમાં લોકો રમુજી અંદાજમાં જણાવી રહ્યા હતા કે કોઈ વ્યક્તિની સોશિયલ મીડિયા ટેવો તેની જિંદગીના અલગ-અલગ ફેઝને દર્શાવે છે. જેમાં સતત સ્ટોરી મૂકવી, આકર્ષક તસવીરો પોસ્ટ કરવી, જમવાની ફોટો શેર કરવી અને લાઈફસ્ટાઈલ કન્ટેન્ટ જેવી વસ્તુઓનો ઉલ્લેખ હતો. આ ચર્ચા વચ્ચે એલોન મસ્કે નાની અમસ્તી કોમેન્ટ કરી કે ‘Instagram is for girls’. એટલે કે તેમના મતે ઇન્સ્ટાગ્રામ મુખ્યત્વે છોકરીઓના ઉપયોગનું પ્લેટફોર્મ છે. તેમનું આ નિવેદન થોડી જ વારમાં ઇન્ટરનેટ પર વાયરલ થઈ ગયું.

બીજા નિવેદને વિવાદ વધાર્યો

મામલો અહીં જ અટક્યો નહીં. જ્યારે લોકોની પ્રતિક્રિયાઓ આવવા લાગી ત્યારે મસ્કે વધુ એક ટિપ્પણી કરી. તેમણે લખ્યું કે ઘણીવાર પુખ્ત પુરુષો તેમને પોતાની ઇન્સ્ટાગ્રામ પ્રોફાઇલ મોકલે છે અને તેમને લાગે છે જાણે તેઓ ટ્રાન્ઝિશન કરી રહ્યા હોય. આ નિવેદનને લઈને સોશિયલ મીડિયા પર ઘણી ટીકા થઈ. ઘણા યુઝર્સે તેને મહિલાઓ અને જેન્ડર ઓળખને લઈને અપમાનજનક વિચાર ગણાવ્યો. તો વળી કેટલાક લોકોનું માનવું છે કે મસ્ક અવારનવાર જાણીજોઈને આવા નિવેદનો આપે છે જેથી ઇન્ટરનેટ પર ચર્ચા છેડાય અને તેમનું નામ ચર્ચામાં જળવાઈ રહે.

ઇન્સ્ટાગ્રામના કન્ટેન્ટને લઈને મસ્કની વિચારધારા

એલોન મસ્ક પહેલા પણ ઘણીવાર એવા સંકેતો આપી ચૂક્યા છે કે તેઓ અમુક પ્રકારના સોશિયલ મીડિયા કન્ટેન્ટને ગંભીર માનતા નથી. ખાસ કરીને ફેશન, લાઈફસ્ટાઈલ, સેલ્ફી, ગોસિપ અથવા રોજબરોજની તસવીરોવાળા કન્ટેન્ટને તેઓ હળવું અને બિનજરૂરી માને છે. આ જ કન્ટેન્ટ ઇન્સ્ટાગ્રામ પર સૌથી વધુ લોકપ્રિય પણ છે.

મસ્ક લાંબા સમયથી જેન્ડર ટ્રાન્ઝિશન અને આધુનિક સોશિયલ ટ્રેન્ડ્સને લઈને પણ ટીકાત્મક અભિપ્રાય ધરાવે છે. તેથી તેમના આ નિવેદનને માત્ર મજાક નહીં પરંતુ તેમની અંગત વિચારધારા સાથે જોડીને પણ જોવામાં આવે છે.

X ને પ્રોત્સાહન આપવાનો પ્રયાસ?

ઘણા લોકોનું માનવું છે કે મસ્કના આવા નિવેદનો માત્ર વિવાદ પેદા કરવા માટે જ નથી હોતા પરંતુ તેઓ આના દ્વારા પોતાના પ્લેટફોર્મ X ને પણ પ્રમોટ કરે છે. આ દરમિયાન તેમણે સોશિયલ મીડિયા એલ્ગોરિધમ પર ચર્ચા કરતા દાવો કર્યો કે માત્ર X જ એવું પ્લેટફોર્મ છે જે ખુલીને કામ કરે છે જ્યારે બાકીની કંપનીઓ બંધ સિસ્ટમ દ્વારા યુઝર્સને કન્ટેન્ટ બતાવે છે.

મેટા પ્લેટફોર્મ્સ પર પહેલા પણ સાધ્યું છે નિશાન

Meta અને તેના સીઈઓ Mark Zuckerberg સાથે એલોન મસ્કની ખેંચતાણ કોઈનાથી છૂપી નથી. બંને વચ્ચે પહેલા પણ ઘણીવાર જાહેરમાં નિવેદનબાજી થઈ ચૂકી છે. થોડા અઠવાડિયા પહેલા મસ્કે WhatsApp ને લઈને પણ સવાલો ઉઠાવ્યા હતા. તેમણે કહ્યું હતું કે વોટ્સએપ પર ભરોસો કરી શકાય નહીં અને લોકોએ ઓડિયો-વીડિયો કોલિંગ માટે X નો ઉપયોગ કરવો જોઈએ. હવે ઇન્સ્ટાગ્રામ પર આપવામાં આવેલા તેમના તાજા નિવેદને સોશિયલ મીડિયાની દુનિયામાં એક નવી ચર્ચાને જન્મ આપી દીધો છે.

આ પણ વાંચો

Smartwatch Vs Fitness Band: બંનેમાં શું હોય છે તફાવત? જાણો કઈ વસ્તુ ખરીદવી તમારા માટે છે ફાયદાકારક

WiFi Vs LiFi: WiFi અને LiFi માં શું છે ફરક? જાણો ક્યાં કઈ ટેક્નોલોજી કયાં આવે છે કામ