ફોન સાથે આવતી એપ્સ ચોરે છે તમારો ડેટા! સરકાર આ પ્રી-ઇન્સ્ટોલ એપ્સને કરશે રિલીઝ, ટૂંક સમયમાં આવશે આ નિયમ

સરકાર મોબાઈલ કંપનીઓ અને એપ્સ દ્વારા યુઝર્સના ડેટાના દુરુપયોગથી ચિંતિત છે. ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલય ડેટાના દુરુપયોગને રોકવા માટે પ્રયાસો કરી રહ્યું છે.

પ્રતિકાત્મક તસવીર (Image: Freepik)

Remove Pre-Installed Apps: જ્યારે તમે નવો મોબાઈલ ખરીદો છો તો તમે જોયું જ હશે કે તેમાં ઘણી એપ્સ પહેલાથી જ ડાઉનલોડ થઈ ગઈ હોય છે. ચીનની કેટલીક કંપનીઓના મોબાઈલમાં આ એપ્સની સંખ્યા ઘણી વધારે છે. જેના કારણે મોબાઈલની ઘણી બધી રેમ આ એપ્સથી ભરાઈ જાય છે. આ એપ્સનો કોઈ ચોક્કસ ઉપયોગ નથી. સામાન્ય રીતે આ એપ્સને અનઇન્સ્ટોલ કરી શકાતી નથી. હવે સરકાર આના પર કડક પગલાં લેવાની તૈયારી કરી રહી છે. સરકારે છેલ્લા બે વર્ષમાં સેંકડો એપ્સ પર પ્રતિબંધ મૂક્યો છે. સુરક્ષાના જોખમને ધ્યાનમાં રાખીને તેમના પર પ્રતિબંધ મુકવામાં આવ્યો હતો. હવે સરકાર પ્રી-ઇન્સ્ટોલ એપ્સ પર પણ કડકતા બતાવવાની તૈયારી કરી રહી છે.

સરકાર સ્માર્ટફોન બનાવતી કંપનીઓ પર કડક કાર્યવાહી કરવાની તૈયારી કરી રહી છે. સરકાર એવો નિયમ લાવશે કે કંપનીઓ ફોનમાં એપ્સ પ્રી-ઇન્સ્ટોલ કરી શકશે નહીં. આ સાથે સરકાર ઓપરેટિંગ સિસ્ટમમાં અપડેટ્સને પણ સ્ક્રીન કરશે. આવી સ્થિતિમાં, તે કંપનીઓને મોટો ફટકો પડશે, જે ફોનમાં એપ્સને પ્રી-ઇન્સ્ટોલ કરે છે.

ડેટાના દુરુપયોગથી સરકાર ચિંતિત છે

સરકાર મોબાઈલ કંપનીઓ અને એપ્સ દ્વારા યુઝર્સના ડેટાના દુરુપયોગથી ચિંતિત છે. ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલય ડેટાના દુરુપયોગને રોકવા માટે પ્રયાસો કરી રહ્યું છે. ભારત વિશ્વમાં બીજા નંબરનો સૌથી મોટો સ્માર્ટફોન ઉત્પાદક છે. આવી સ્થિતિમાં સરકારના આ નિર્ણયની સ્માર્ટફોન બનાવતી કંપનીઓ પર મોટી અસર પડશે. સૂત્રોના જણાવ્યા અનુસાર, સ્માર્ટફોનમાં પ્રી-ઇન્સ્ટોલ કરેલી એપ્સ યુઝરના ડેટા-સિક્યોરિટી માટે યોગ્ય નથી. આ એપ્સનો ઉપયોગ યુઝરના ડેટાની જાસૂસી કરવા માટે થાય છે. ભારત હવે આ સ્માર્ટફોન કંપનીઓ પર લગામ લગાવવાનો પ્રયાસ કરી રહ્યું છે. સમાચાર એજન્સી રોઈટર્સના એક અહેવાલમાં સૂત્રોના હવાલાથી આ માહિતી આપવામાં આવી છે.

કંપનીઓના ધંધાને અસર થશે

નવા નિયમોની રજૂઆત સાથે, ભારતમાં નવા સ્માર્ટફોન લોન્ચ કરવાની સમયરેખા આગળ વધી શકે છે. આના કારણે દિગ્ગજ સ્માર્ટફોન કંપનીઓ સેમસંગ, શાઓમી, વિવો અને એપલ સહિત ઘણી કંપનીઓની પ્રી-ઇન્સ્ટોલ એપ્સથી આવતા બિઝનેસમાં ઘણું નુકસાન થશે.

રાષ્ટ્રીય સુરક્ષાનો મામલો

એક વરિષ્ઠ સરકારી અધિકારીએ જણાવ્યું હતું કે, "પ્રી-ઇન્સ્ટોલ કરેલ એપ્સ નબળા સુરક્ષા બિંદુ બની શકે છે અને અમે ચીન સહિત કોઈપણ વિદેશી દેશને આ કરવાની મંજૂરી આપી શકતા નથી." તે રાષ્ટ્રીય સુરક્ષાનો મામલો છે.