Hun To Bolish: હું તો બોલીશ: લોહિયાળ દિવાળી

ભાવનગર શહેર અને ગ્રામ્યમાં દિવાળીની રાત્રે 3 હત્યાના બનાવ બન્યા. ભાવનગર શહેરમાં એક ડૉક્ટરની જ કરી દેવાઈ હત્યા. ડૉક્ટર શિવરાજ લાખાણીનો પુત્ર કહાન રાત્રે કારમાં ડીઝલ પૂરાવવા જઈ રહ્યો હતો. આ સમયે યોગી નગર વિસ્તારમાં રોડ પર કેટલાક શખ્સો ફટાકડા ફોડી. નાચી રહ્યા હતા. કહાને હોર્ન વગાડી. આ શખ્સોને દૂર ખસી જવાનું કહેતા તેઓ ઉશ્કેરાયા અને ગાડીમાં તોડફોડ કરી. કહાને પિતાને જાણ કરતાં જ શિવરાજભાઈ ઘટનાસ્થળે દોડી આવ્યા. આ સમયે આરોપીઓએ શિવરાજભાઈ પર તીક્ષ્ણ હથિયારથી હુમલો કરતાં તેમનું મોત થયું. પિતાને બચાવવા જતાં કહાન પણ હુમલામાં ગંભીર રીતે ઈજાગ્રસ્ત થયો. જેની હોસ્પિટલમાં સારવાર ચાલી રહી છે.ઘટનાની જાણ થતાં જ પોલીસ દોડી આવી. પોલીસે પ્રકાશ ખોખર... ભાવેશ પંડ્યા. કિશન ડગલા... દેવ ચુડાસમા.. રિતેશ સહિત અન્ય શખ્શો સામે ગુનો દાખલ કર્યો છે. 

ભાવનગર શહેરના ગજ્જર ચોકમાં રહેતા 24 વર્ષીય ફરદીન કુરૈશી નામના યુવકની છરીના ઘા મારી હત્યા કરી દેવાઈ. દિવાળીમાં મોડી રાત્રીના સમયે યુવક ફટાકડા ફોડી રહ્યો હતો એ સમયે ઝગડો થયો. એક મહિલા સહિત ઈસમોએ તીક્ષ્ણ હથિયાર વડે હુમલો કર્યો. સી-ડિવિઝન પોલીસની હાજરીમાં જ જીવલેણ હુમલો કરાયો છતાં પણ પોલીસ હત્યા કરનાર ઈસમોને રોકી શકી નહીં. હાલ આ મુદ્દે પોલીસ ફરિયાદ નોંધાઈ છે. પરણિતા સાથે પ્રેમ સંબંધમાં હત્યા થઈ હોવાનું ખુલ્યું છે. 

ઘોઘા તાલુકાના હાથબ ગામમાં બુધાભાઈ બારૈયા નામના વ્યક્તિની હત્યા કરી દેવાઈ. ચારેક શખ્સો ફટાકડા ફોડતી વખતે અપશબ્દો બોલી રહ્યા હતા. આ સમયે બુધાભાઈએ અપશબ્દો ન બોલવાનું કહેતા ચારેય શખ્શો ઉશ્કેરાયા અને બુધાભાઈને પાઈપ ફટકારી છરીના ઘા મારી દીધા. લોહીલુહાણ હાલતમાં બુધાભાઈને ભાવનગરની સર ટી હોસ્પિટલ ખસેડાયા. જ્યાં તેમનું સારવાર દરમિયાન મૃત્યુ થયું. પોલીસે ચાર આરોપી સામે ગુનો નોંધી તેમની શોધખોળ શરૂ કરી છે