Chaitar Vasava: વિધાનસભામાં કલાકારોને આમંત્રિત કરવા મુદ્દે હવે નવો વિવાદ, ચૈતર વસાવાનો આરોપ

ગુજરાત વિધાનસભામાં કલાકારોને આમંત્રિત કરવાના મુદ્દે ચાલી રહેલો વિવાદ વધુ વકર્યો છે. તાજેતરમાં આ મામલે એક નવો વિવાદ સામે આવ્યો છે, જેમાં આદિવાસી સમુદાયના કલાકારોને આમંત્રણ ન આપવામાં આવ્યું હોવાનો આરોપ લગાવવામાં આવ્યો છે. આ મુદ્દે ધારાસભ્ય ચૈતર વસાવાએ આદિવાસી સમુદાયનું અપમાન કરાયું હોવાનો ગંભીર આરોપ મૂક્યો છે.

કલાકારોને વિધાનસભામાં આમંત્રણ આપવાના મુદ્દે અગાઉ પણ વિવાદ થયો હતો, અને હવે આદિવાસી કલાકારોને આમંત્રણ ન આપવાના કારણે આ વિવાદે નવું સ્વરૂપ ધારણ કર્યું છે. ધારાસભ્ય ચૈતર વસાવાએ આ અંગે પોતાની નારાજગી વ્યક્ત કરતા જણાવ્યું હતું કે આદિવાસી સમાજમાં પણ મોટા ગજાના અને પ્રતિભાશાળી કલાકારો છે, જેમની કલાને રાષ્ટ્રીય અને આંતરરાષ્ટ્રીય સ્તરે પણ ઓળખ મળી છે. તેમ છતાં, વિધાનસભા દ્વારા તેમને આમંત્રણ ન આપવું એ આદિવાસી સમુદાયનું સીધું અપમાન છે.