અમદાવાદમાં પ્રેમલગ્નનો કરુણ અંત! પત્નીને 'સબક' શીખવવા પતિએ ખેલ્યો કેમિકલ એટેકનો ખોફનાક ખેલ

2 વર્ષ પહેલાં જ થયા હતા પ્રેમલગ્ન; મેણાં મારતી પત્નીને પાઠ ભણાવવા હેલમેટ પહેરીને હુમલો કર્યો, અને પછી કંઈ જ ન થયું હોય તેમ હોસ્પિટલ ખબર કાઢવા પહોંચ્યો!

ahmedabad naroda husband throws corrosive chemical on wife revenge attack crime branch arrest

Source : abp asmita

Show Quick Read

Key points generated by AI, verified by newsroom

• પતિએ બદલો લેવા પત્ની પર ફેંક્યું કોરોઝિવ કેમિકલ.
• ઘરકંકાસ અને મેણાંથી કંટાળી પતિએ રચ્યું હતું કાવતરું.
• પોલીસે ગણતરીના કલાકોમાં આરોપી પતિની કરી ધરપકડ.
• પ્રેમલગ્નમાં રહેતા યુગલ વચ્ચે છેલ્લા ૬ મહિનાથી હતો વિખવાદ.

અમદાવાદના નરોડા વિસ્તારમાંથી એક અત્યંત ચોંકાવનારી અને રૂંવાડા ઊભા કરી દે તેવી ઘટના સામે આવી છે. અહીં એક પતિએ જ પોતાની પત્ની પર બદલો લેવાની ભાવનાથી ખતરનાક કોરોઝિવ કેમિકલ (એસિડ જેવું જલદ પ્રવાહી) ફેંકીને જીવલેણ હુમલો કર્યો છે. મળતી માહિતી મુજબ, પતિ-પત્ની વચ્ચે લાંબા સમયથી ઘરકંકાસ ચાલતો હતો અને બંને અલગ રહેતા હતા. પત્નીના મેણાં અને ઝઘડાઓથી કંટાળીને પતિએ આ ભયંકર કાવતરું રચ્યું હતું. જોકે, અમદાવાદ ક્રાઈમ બ્રાન્ચે ગણતરીના કલાકોમાં જ આરોપી પતિની ધરપકડ કરીને આખી ઘટના પરથી પડદો ઉઠાવી લીધો છે.

કેવી રીતે બની આ ઘટના?

આ ઘટના નરોડા વિસ્તારમાં ગેલેક્સી ચાર રસ્તા પાસે આવેલી એક સોસાયટીમાં બની હતી. પીડિત યુવતી જ્યારે નોકરી પૂરી કરીને ઘરે પાછી ફરી રહી હતી, ત્યારે જતીન પટેલ નામનો તેનો પતિ હેલમેટ પહેરીને આવ્યો હતો જેથી તેની ઓળખ છુપાવી શકાય. તેણે અચાનક પોતાની જ પત્ની પર જલદ કેમિકલ ફેંક્યું અને ત્યાંથી ફરાર થઈ ગયો.

આ હુમલામાં યુવતી ગંભીર રીતે દાઝી ગઈ હતી, જેના કારણે તેને તાત્કાલિક સારવાર માટે સિવિલ હોસ્પિટલ ખસેડવામાં આવી હતી. સૌથી નવાઈની અને બેશરમીની વાત તો એ છે કે, હુમલો કર્યા પછી પોતે કંઈ જ નથી કર્યું તેવો દેખાવ કરવા આરોપી પતિ પત્નીને કેટલી ઈજા થઈ છે તે જોવા માટે સિવિલ હોસ્પિટલ પણ પહોંચી ગયો હતો!

પોલીસ તપાસ અને ભેદ ઉકેલાયો

આ ગંભીર ઘટનાની જાણ થતાં જ ક્રાઈમ બ્રાન્ચ તરત જ એક્શનમાં આવી ગઈ હતી. પોલીસે અલગ અલગ ટીમો બનાવીને તપાસ શરૂ કરી દીધી. સ્થાનિક લોકોની પૂછપરછ અને આસપાસના CCTV ફૂટેજ બારીકાઈથી ચેક કર્યા બાદ, પોલીસને મહિલાના પતિ જતીન પર જ શંકા ગઈ અને તેને તાત્કાલિક રાઉન્ડઅપ કરવામાં આવ્યો.

હુમલા પાછળનું કારણ શું હતું?

પોલીસની કડક પૂછપરછમાં આરોપી જતીને ચોંકાવનારો ખુલાસો કર્યો. તેણે જણાવ્યું કે પત્ની તેને વારંવાર મર્દાનગીના મેણાં મારતી હતી અને તેના માતા-પિતા તેમજ કુટુંબીજનો સાથે સતત ઝઘડા કરતી હતી. આ વાતથી ઉશ્કેરાઈને પત્નીને પાઠ ભણાવવા અને સબક શીખવાડવા માટે તેણે આ હુમલો કર્યો હતો. તપાસમાં એવું પણ જાણવા મળ્યું છે કે જતીન અગાઉ GIDC ની એક કંપનીમાં કામ કરતો હતો, એટલે તેને આવા રાસાયણિક કેમિકલ વિશે સારી એવી સમજ અને જાણકારી હતી.

પ્રેમલગ્નનો કરુણ અંજામ

ઉલ્લેખનીય છે કે, જતીન અને તેની પત્નીના માત્ર 2 વર્ષ પહેલાં જ પ્રેમલગ્ન થયા હતા. પરંતુ લગ્ન પછી થોડા સમયમાં જ બંને વચ્ચે ઘરકંકાસ શરૂ થઈ ગયો હતો. છેલ્લા 6 મહિનાથી બંને વચ્ચે એટલા બધા ઝઘડા થતા હતા કે તેઓ એકબીજાથી અલગ રહેવા લાગ્યા હતા. હાલમાં પોલીસે આરોપી પતિ જતીન પટેલની ધરપકડ કરીને કાયદેસરની કાર્યવાહી હાથ ધરી છે.

આ પણ વાંચો

અમદાવાદ: પત્નીના આડા સંબંધોએ હસતો-ખેલતો પરિવાર પીંખી નાખ્યો, પતિએ સુસાઇડ નોટ લખી ગળેફાંસો ખાધો