Lok Sabha Elections 2024: શું હીટવેવથી મતદાન ઘટશે? ચૂંટણી પંચે બનાવી ટાસ્ક ફોર્સ, દરેક તબક્કા પર રાખશે નજર

Heat Wave: સમગ્ર એપ્રિલ-જૂન સમયગાળામાં, સામાન્ય ચારથી આઠ દિવસની સરખામણીએ ગરમીનું મોજું 10 થી 20 દિવસ સુધી રહેવાની ધારણા છે.

મુખ્ય ચૂંટણી કમિશનર રાજીવ કુમાર સાથે ચૂંટણી કમિશનર જ્ઞાનેશ કુમાર

Source : PTI

Lok Sabha Elections 2024: કાળઝાળ ગરમી અને તીવ્ર ગરમીના મોજા વચ્ચે યોજાનારી લોકસભા ચૂંટણી 2024ને ધ્યાનમાં રાખીને ચૂંટણી પંચે સોમવારે (22 એપ્રિલ, 2024) એક ટાસ્ક ફોર્સની રચના કરી છે, જે સામાન્ય ચૂંટણીઓ પર ગરમીની અસરની સમીક્ષા કરશે. આ ટાસ્ક ફોર્સમાં ચૂંટણી પંચ, ભારતીય હવામાન વિભાગ, નેશનલ ડિઝાસ્ટર મેનેજમેન્ટ ઓથોરિટી અને આરોગ્ય મંત્રાલય વગેરેના અધિકારીઓ સામેલ હશે.

ચૂંટણી પંચના જણાવ્યા અનુસાર, આ ટાસ્ક ફોર્સ મતદાનના દરેક તબક્કાના પાંચ દિવસ પહેલા ગરમી અને ગરમીના મોજાની સમીક્ષા કરશે. શુક્રવારે (26 મે, 2024) બીજા તબક્કાના મતદાન માટે, ચૂંટણી પંચે કહ્યું - ભારતીય હવામાન વિભાગે હીટવેવ વિશે માહિતી આપી છે કે આવી કોઈ 'મોટી ચિંતા' નથી. હવામાનની આગાહી સામાન્ય છે.

ચૂંટણી પંચ દ્વારા આ પગલું એવા સમયે લેવામાં આવ્યું છે જ્યારે ભારતના ઘણા ભાગોમાં રવિવાર (21 એપ્રિલ, 2024) ના રોજ તીવ્ર ગરમીનો અનુભવ થયો હતો અને ઘણા વિસ્તારોમાં મહત્તમ તાપમાન સામાન્ય કરતા ચારથી છ ડિગ્રી સેલ્સિયસ વધુ નોંધાયું હતું. IMD અનુસાર, ઓડિશા અને રાયલસીમા, પશ્ચિમ બંગાળ, ઝારખંડ, વિદર્ભ, છત્તીસગઢ, મધ્યપ્રદેશ, તેલંગાણા અને આંધ્રપ્રદેશના ભાગોમાં મહત્તમ તાપમાન 42 થી 45 ડિગ્રી સેલ્સિયસ વચ્ચે નોંધાયું હતું. બિહાર, મધ્યપ્રદેશ, તમિલનાડુ, પુડુચેરી અને ઉત્તર પ્રદેશના કેટલાક ભાગોમાં મહત્તમ તાપમાન 40 થી 42 ડિગ્રી સેલ્સિયસ વચ્ચે રહ્યું હતું.

ECI takes proactive measures to mitigate heat wave impact during #GeneralElections2024; holds meeting with IMD, NDMA & MoHFW ; Meeting chaired by CEC Rajiv Kumar & ECs Gyanesh Kumar and Sukhbir Singh Sandhu sets up task force to monitor heat wave impact during election period pic.twitter.com/f2LkT2flin

— Spokesperson ECI (@SpokespersonECI) April 22, 2024

આ મહિનામાં ગરમીનું આ બીજું મોજું છે. ઓડિશા, ઝારખંડ, પશ્ચિમ બંગાળના ભાગો, તેલંગાણા, આંધ્રપ્રદેશ, તમિલનાડુ અને ગુજરાત પ્રથમ તબક્કામાં ભારે ગરમીથી પ્રભાવિત થયા હતા, જ્યારે હવામાન વિભાગે અગાઉ અલ નીનોની સ્થિતિ નબળી પડી જવાની વચ્ચે એપ્રિલ-જૂન સમયગાળા દરમિયાન ભારે ગરમીની આગાહી કરી હતી.

IMDનો અંદાજ શું કહે છે?

IMDનો અંદાજ છે કે એપ્રિલમાં દેશના વિવિધ ભાગોમાં ચારથી આઠ દિવસ સુધી હીટ વેવ રહેવાની શક્યતા છે અને સામાન્ય રીતે એકથી ત્રણ દિવસ હીટ વેવના દિવસો છે. સમગ્ર એપ્રિલ-જૂન સમયગાળામાં, સામાન્ય ચારથી આઠ દિવસની સરખામણીએ ગરમીનું મોજું 10 થી 20 દિવસ સુધી રહેવાની ધારણા છે. જે વિસ્તારોમાં મોટી સંખ્યામાં હીટ વેવ દિવસો જોવાની આગાહી કરવામાં આવી છે તેમાં મધ્યપ્રદેશ, ગુજરાત, ઓડિશા, આંધ્રપ્રદેશ, મધ્ય મહારાષ્ટ્ર, વિદર્ભ, મરાઠવાડા, બિહાર અને ઝારખંડનો સમાવેશ થાય છે. કેટલાક સ્થળોએ ગરમીની લહેર 20 દિવસથી વધુ ચાલી શકે છે. કાળઝાળ ગરમીને કારણે વીજળીના ગ્રીડ પર દબાણ આવી શકે છે અને તેના કારણે દેશના કેટલાક ભાગોમાં પાણીની તંગી પણ સર્જાઈ શકે છે.

લોકસભાની ચૂંટણી સાત તબક્કામાં યોજાવાની છે

આ વખતે લોકસભાની ચૂંટણી સાત તબક્કામાં યોજાઈ રહી છે. પ્રથમ તબક્કામાં 19 એપ્રિલે મતદાન થયું હતું, જ્યારે બીજા તબક્કામાં 26 એપ્રિલે, ત્રીજા તબક્કામાં 7 મેના રોજ, ચોથા તબક્કામાં 13 મેના રોજ, પાંચમાં તબક્કામાં 20 મેના રોજ મતદાન યોજાશે. છઠ્ઠો તબક્કો 25 મેના રોજ અને સાતમા તબક્કામાં 1 જૂને. સામાન્ય ચૂંટણીના પરિણામો 4 જૂન, 2024ના રોજ આવશે.