ફરી ઉડી આ જાણીતી એક્ટ્રેસની મોતની અફવા, જાણો એક્ટ્રેસે શું કહ્યું.....

મોતની અફવા બાદ તેની દીકરી તાન્યા માધવાનીએ પણ સોશિયલ મીડિયા દ્વારા પોતાના માતાના સ્વસ્થ હોવાની પુષ્ટિ કરી છે. જોકે બાદમાં ખોટી જાણકારી આપવા બદલ કોમલ નાહટાએ માફી માગી હતી.

મુંબઈઃ વિતેલા જમાનાની જાણીતી અભિનેત્રી મુમતાઝ સંપૂર્ણ સ્વસ્થ છે અને લંડનમાં પોતાના ઘરમાં મજા કરી રહી છે. થોડા સમય પહેલા અહેવાલ આવ્યા હતા કે મુંબઈની એક હોસ્પિટલમાં તેમનું નિધન થઈ ગયું છે. આવું ત્યારે થયું જ્યારે પત્રકાર અને ટ્રેડ એનાલિસ્ટ કોમલ નાહટાએ મુંબઈની એક હોસ્પિટલમાં મુમતાઝનું હૃદય રોગના હુમલાથી મોત થવાનું ટ્વિટ કર્યું હતું. જોકે હવે આ અહેવાલ અફવા સાબિત થયા છે. જોકે આ મામલે એબીપીએ 71 વર્ષીય મુમતાઝ સાથે વાત કરી જે હાલમાં લંડનમાં છે અને ઘણાં વર્ષોથી ત્યાં જ રહે છે. મુમતાઝે ફોન પર એબીપી ન્યૂઝ સાથે વાત કરતાં કહ્યું કે, “કોણ જાણે અને કેવી અફવાઓ ફેલાવવામાં આવી રહી છે? લોકોએ આ પ્રકારની અફવા ફેલાવીને શું મળે છે? અને મારી સાથે આવું પ્રથમ વખત નથી થયું, પરંતુ બીજી વખત થયું છે.” બાદમાં હસતા હસતા મુમતાઝે એબીપીને જણાવ્યું કે, “હાલમાં હું લંડનમાં મારા ઘરે છું અને એન્જોય કરી રહી છું અને ખુશી કુશી મારું જીવન જીવી રહી છું.” મુમતાઝે આગળ કહ્યું કે, “તમે સમજી શકો છો કે આ પ્રકારની અફવાથી મારા ફેન કેટલા દુખી થતા હશે. મને પણ અફસોસ થાય જ્યારે હું મારા વિશેની આવી અફવાઓ સાંભળું છું.” મુમતાઝની મોતની અફવા બાદ તેની દીકરી તાન્યા માધવાનીએ પણ સોશિયલ મીડિયા દ્વારા પોતાના માતાના સ્વસ્થ હોવાની પુષ્ટિ કરી છે. જોકે બાદમાં ખોટી જાણકારી આપવા બદલ કોમલ નાહટાએ માફી માગી હતી.