રૂપાલની 5000 વર્ષ જૂની પલ્લીમાં નહીં વહે ઘીની નદીઓ, તેના બદલે શું કરાશે ? જાણો ક્રાંતિકારી નિર્ણય વિશે

ગાંધીનગરઃ નવમા નોરતે રૂપાલમાં થતી પલ્લી જગવિખ્યાત છે અને આ પલ્લીમાં રીતસર ઘીની નદીઓ વહેતી હોય છે. આ રીતે ઘીનો વ્યય કરવાની પરંપરાની ટીકાઓ પણ થાય છે ત્યારે મંદિર ટ્રસ્ટ દ્વારા એક ક્રાંતિકારી નિર્ણય લઈને આ વર્ષથી પલ્લીમાં ઘીનો ચડાવો બંધ કરવાનો નિર્ણય લીધો છે.

આ વખતે ઘી નહીં ચડાવાય તેથી લાખ્ખો શ્રધ્ધાળુઓ માટે ક્રાંતિકારી નિર્ણય સાથેનો ધર્મોત્સવ જીવનભરનું સંભારણું બની જશે. આ પ્રસંગને નિહાળવા અનેક એનઆરઆઇ પરિવારો પણ રૂપાલમાં આવી રહ્યાં છે. ધાર્મિક આસ્થાનો લાભ લઇ ભેળસેળયુક્ત ઘી વેચવાનું કૌભાંડ ગત વર્ષે બહાર આવ્યુ હતું તે પણ હવે બંધ થશે.

આ ક્રાંતિકારી નિર્ણયથી અગાઉ ગામની શેરીઓમાં રીતસર ઘીની નદી વહેતી હતી તે દૃશ્ય હવે ભૂતકાળ બની જશે. આ વખતે પણ બાધા પૂરી કરવા અને માતાજીની પલ્લીનાં દર્શન કરવા મોટી સંખ્યામાં ભક્તો ઉમટી પડશે. હૈયેહૈયુ દળાય તેટલી ભાવિકોની ભીડ વચ્ચે જય જય વરદાયિનીનાં જયઘોષથી ગગન ગુંજી ઉઠશે.

આ અંગે પ્રાંત અધિકારી રાકેશ વ્યાસે જણાવ્યું કે શુધ્ધ ઘીનો દુર્વ્યય ના થાય તે માટે મંદિર ટ્રસ્ટ દ્વારા નવતર અભિગમ અપનાવાયો છે. એ પ્રમાણે હવે શ્રધ્ધાળુઓ દ્વારા નોમની રાત્રે પ્રતિકાત્મક રીતે માતાજીને ચોખ્ખા ઘીનો અભિષેક કરાશે અને બાકીની રકમ દાન તરીકે સ્વીકારી મંદિરને ભવ્ય બનાવાશે.

શુધ્ધ ઘીનો બગાડ ના થાય તે માટે આ વર્ષે મંદિર ટ્રસ્ટ દ્વારા ભક્તોને ઘી ચઢાવવાના બદલે તેટલી રકમ દાન પેટે કાઉન્ટર પર જમા કરાવવા કહેવાયું છે. આ રીતે મળેલી રકમ મંદિરના જીર્ણોધ્ધારમાં વપરાશે. પ્રસાદી રૂપે ઘી ચઢાવવું એ ઘીનો અભિષેક કરવા બરાબર ગણાશે.