“જય રણછોડ, માખણચોર”: 141મી જગન્નાથ ભગવાનની રથયાત્રા શાંતિપૂર્ણ સંપન્ન

અમદાવાદ: ભગવાન જગન્નાથ ભક્તોને દર્શન આપી નીજ મંદીર પરત ફર્યા હતા ત્યારે ‘જય જગન્નાથ’ના નાદ સાથે મંદિર પટાંગણ ગુંજી ઉઠ્યું હતું. ભક્તોને દર્શન આપવા ભગવાન જગન્નાથજી, બહેન સુભદ્રા અને ભાઈ બલરામ નગરચર્યાએ નીકળ્યા હતા. આ અવસર પર હજારોની સંખ્યામાં શ્રદ્ધાળુંઓ ભગવાન જગન્નાથના દર્શન કરવા ઉમટી પડ્યા હતા.ગૃહરાજ્યમંત્રી પ્રદિપસિંહ જાડેજાએ ભગવાન જગન્નાથના દર્શન કર્યા હતા.

મુખ્યમંત્રી વિજય રૂપાણી, નાયબ મુખ્યમંત્રી નીતિન પટેલના હસ્તે સવારે સાત વાગ્યે પહિંદવિધિ બાદ તેઓએ રથ ખેંચી રથયાત્રાનું પ્રસ્થાન કરાવ્યું હતું. રથયાત્રાના દિવસે સવારે ચાર વાગ્યે મંગળા આરતીમાં ભાજપના રાષ્ટ્રીય અધ્યક્ષ અમિત શાહ ઉપસ્થિત રહ્યાં હતાં.

ભગવાન જગન્નાથ, ભાઈ બલરામ અને બહેન સુભદ્રાજી પ્રથમ વખત જ આ રથયાત્રામાં સાડા નવ કિલો સોનાના મુગટ પહેરીને નીકળ્યા હતા. ભગવાનના અલંકારો ખાસ બનારસમાં તૈયાર કરવામાં આવ્યા હતા. ભગવાન માટેનો સાડા નવ કિલોનો મુગટ વિદેશમાં રહેતા રમેશ પટેલ નામના એક ભક્તે આપ્યો હતો. આ ભક્તે વિદેશમાં હતા ત્યારે જ ભગવાનને સોનાનું દાન કરવાનો સંકલ્પ લીધો હતો.

રથયાત્રામાં સુરક્ષા વ્યવસ્થા પણ સઘન કરવામાં આવી હતી. ઈઝરાયેલથી લાવવામાં આવેલા હિલિયમ બલૂન ઉપરાંત 193 કેમેરાથી નજર રાખવામાં આવી હતી. લગભગ 20,225 પોલીસ કર્મચારીઓને બંદોબસ્તમાં ઉતારવામાં આવ્યા છે.

રથયાત્રામાં 17 હાથી, 101 ટ્રક જોડાયા. ટ્રકો મોડી પડતી હોવાથી રથયાત્રા પણ મોડી પડતી હોવાનું ધ્યાનમાં રાખી આ વખતે વહેલી આવનારી પ્રથમ 30 ટ્રકને 3 લાખનું ઈનામ આપવામાં આવશે. વડાપ્રધાન મોદીએ પ્રસાદ મોકલ્યો હતો.

રથયાત્રા સવારે 7 વાગ્યે જગન્નાથજીના મંદિરથી શરૂ થઈ જમાલપુર દરવાજા, ખમાસા ચોકી, રાયપુર ચાર રસ્તા, કાલુપુર સર્કલ, સરસપુર, પ્રેમ દરવાજા, દરિયાપુર, જોર્ડન રોડ, દિલ્લી ચકલા, શાહપુર દરવાજા, શાહપુર અડ્ડા, આર.સી. હાઈસ્કુલથી દિલ્લી ચકલા પરત આવી ઘી કાંટા ચાર રસ્તાથી પાનકોર નાકા અને ખમાસા થઈ રાત્રે 8.30 કલાકે પરત જગન્નાથ મંદિર પહોંચી હતી.

ભગવાન જગન્નાથના સરસપુરમાં મોસાળમાં ભાણેજના વધામણા માટે શ્રદ્ધાળુઓનું ઘોડાપુર ઉમટ્યું હતું. મોસાળમાં ભગવાનનું ભવ્ય સ્વાગત કરવામાં આવ્યું હતું. મામેરુંમાં સરસપુરવાસીઓમાં અનેરો ઉત્સાહ જોવા મળી રહ્યો હતો. મોસાળવાસીઓ મનમૂકીને નાચ્યા હતા.પ્રથમ રથ જગન્નાથનો, બીજો રથ સુભદ્રાજી, ત્રીજા નંબરે મોટા ભાઈ બલભદ્રજીનો રથ હતો.

પ્રેમ દરવાજા વિસ્તારમાં મુસ્લિમ બિરાદરોએ ભગવાન જગન્નાથની રથયાત્રાનું સ્વાગત કર્યું હતું. જગતના નાથના દર્શન કરવા માટે શ્રદ્ધાળુઓની ભારે ભીડ જામી છે.