છત્તીસગઢઃ ભિલાઈ સ્ટીલ પ્લાન્ટમાં ગેસ પાઇપલાઇન ફાટવાથી 8નાં મોત, 14 ઘાયલ

તમામ ઘાયલોને નજીકની હોસ્પિટલમાં દાખલ કરવામાં આવ્યા છે. ઘટનાની જાણકારી મળતાં જ જિલ્લા કલેકટર ઉમેશ અગ્રવાલ ત્યાં પહોંચી ગયા છે. તેમણે કહ્યું કે અત્યાર સુધી 14 લોકોને દાખલ કરવામાં આવ્યા છે.

ભિલાઈઃ છત્તીસગઢના ભિલાઈ સ્થિત સ્ટીલ પ્લાન્ટમાં મંગળવારે સવારે બ્લાસ્ટ થયો હતો. આ ઘટનામાં 8 લોકોના મોત થયા છે, જ્યારે એક ડઝનથી વધારે લોકો ઘાયલ થયા છે. સ્ટીલ પ્લાન્ટમાં ગેસ પાઇપલાઇન ફાટવાથી આ દુર્ઘટના થઈ છે.

પ્રત્યક્ષદર્શીના કહેવા મુજબ, પ્લાન્ટની અંદર 11 નંબરનું ઓવન છે. જ્યાં ગેસ પાઇપલાઇનના રિપેરિંગનું કામ ચાલતું હતું. ત્યારે અચાનક ધડાકો થયો. આ કારણે ત્યાં હાજર રહેલા લોકોને ભાગવાનો મોકો પણ ન મળ્યો.