ઉત્તર ભારતમાં ઠંડીનું જોર વધ્યું, શ્રીનગરમાં પારો માઇનસ 2 ડિગ્રી

શ્રીનગરઃ ગુજરાત સહિત દેશભરમાં ઠંડીનું જોર દિવસે દિવસે વધી રહ્યું છે. ઉત્તર ભારતમાં તાપમાન સૌથી વધુ ઠંડુ રહ્યું હતું, જેમાં શ્રીનગરમાં તાપમાનનો પારો માઇનસ 2 ડિગ્રી, દિલ્હીમાં 7 ડિગ્રી અને ઉટીમાં પહેલીવાર તાપમાન શૂન્ય કરતાં નીચું નોંધાયું છે. ઉલ્લેખનીય છે કે ઉત્તર ભારતમાં હજુ પણ ઠંડીનો પ્રકોપ વધી શકે છે.

દિલ્હીમાં કાતિલ ઠંડી અને ભારે ધૂમ્મસના કારણે 17 ટ્રેનો રદ્દ કરવામાં આવી હતી. જમ્મુ અને કાશ્મીરમાં 40 દિવસનો શિયાળો શરૂ થઇ ગયો જેને ચિલ્લાઇ કલાન તરીકે ઓળખવામાં આવે છે.

કાતિલ ઠંડીનો પ્રકોપ હજુ ઉત્તર ભારતના રાજ્યો પંજાબ, હરિયાણા, ચંદીગઢ, દિલ્હી અને પશ્ચિમ ઉત્તર પ્રદેશમાં યથાવત રહી શકે છે.

જમ્મુ અને કાશ્મીરમાં હાડ ગાળતી ઠંડીનો પ્રકોપ ચાલું થઇ ગયો છે, કારગિલમાં સતત બીજા દિવસે તાપમાન ગગડીને માઇનસ 11.4 થયું હતું, દિલ્હીમાં 7 અને શ્રીનગરમાં માઇનસ 2 ડિગ્રી સુધી પહોંચી ગયું હતું, જેના કારણે ત્યાં સિઝનની સૌથી ઠંડી રાત બની ગઇ હતી.