FY એપ્રિલ-માર્ચમાંથી બદલીને જાન્યુઆરી-ડિસેમ્બર કરવા પર સરકાર કરી રહી છે વિચાર, નવેમ્બરમાં રજૂ થઈ શકે છે બજેટ

નવી દિલ્હીઃ નાણાં પ્રધાન અરૂણ જેટલીએ શુક્રવારે સંસદમાં એક સવાલના જવાબમાં કહ્યું કે, સરકાર દેશનું નાણાંકીય વર્ષ એપ્રિલ-માર્ચની જગ્યાએ જાન્યુઆરી-ડિસેમ્બર કરવા પર વિચાર કરી રહી છે. તેમણે કહ્યું કે, નાણાંકીય વર્ષનો સમય બદલવાના મામલે સરકાર ગંભીરતાથી વિચાર કરી રહી છે.

જેટલીએ જણાવ્યું કે, સરકાર તરફથી બનાવવામાં આવેલ એક કમિટીએ આ મામલે એક અહેવાલ તૈયાર કર્યો છે. આ કમિટીના ચેરમેન પૂર્વ મુખ્ય આર્થિક સલાહકાર શંકર આચાર્યને બનાવવામાં આવ્યા છે. અહેવાલ સરકારને મળી ગયો છે. જોકે નાણાં પ્રધાને આ વિષય પર કંઈ કહ્યું નહીં કે બજેટ રજૂ કરતા સમયે પણ કંઈ ફેરફાર કરવામાં આવશે કે નહીં. જણાવીએ કે, ચાલુ વર્ષે સરકારે બજેટ રજૂ કરવા માટે ફેબ્રુઆરીની તારીખ નક્કી કરી હતી.