શું તમે પણ ટ્રેડમિલ પર 'યુસૈન બોલ્ટ' બનવાનો પ્રયાસ કરો છો? ચેતી જજો, ઘૂંટણને થશે નુકસાન!

ટ્રેડમિલ પર વધુ પડતી સ્પીડ તમારા ઘૂંટણનું આયુષ્ય ઘટાડી શકે છે, જાણો કેવી રીતે અને શું છે યોગ્ય રીત.

પ્રતિકાત્મક તસવીર

Treadmill Mistakes: આજકાલ ફિટ રહેવા માટે ટ્રેડમિલનો ઉપયોગ ખૂબ જ સામાન્ય બની ગયો છે. વજન ઘટાડવા અને હૃદયના સ્વાસ્થ્ય માટે ટ્રેડમિલ પર દોડવું ફાયદાકારક છે, પરંતુ જો તમે તેને ખોટી રીતે ઉપયોગ કરો છો તો તે તમારા માટે નુકસાનકારક સાબિત થઈ શકે છે. ઘણા લોકો ટ્રેડમિલ પર એટલી સ્પીડમાં દોડવાનો પ્રયાસ કરે છે જાણે કે તેઓ યુસૈન બોલ્ટ બની ગયા હોય. જો તમે પણ આવું કરી રહ્યા છો તો તમારે સાવધાન રહેવાની જરૂર છે, કારણ કે આ તમારા ઘૂંટણ માટે ખતરનાક સાબિત થઈ શકે છે.

ટ્રેડમિલ પર દરરોજ વધુ સ્પીડમાં અને લાંબા સમય સુધી દોડવાથી તમારી ફિટનેસ સુધરવાની જગ્યાએ તમારા ઘૂંટણનું આયુષ્ય ઘટી શકે છે. ટ્રેડમિલ પર ઝડપથી દોડવાથી તમારા ઘૂંટણને વારંવાર આંચકા લાગે છે. જ્યારે તમે પગ જમીન પર પટકાવો છો ત્યારે તમારા શરીરનું આખું વજન ઘૂંટણ પર આવે છે. જો સ્પીડ ખૂબ વધારે હોય અથવા તમે લાંબા સમય સુધી દોડો છો તો આ આંચકા તમારા ઘૂંટણની ગાદી (કાર્ટિલેજ)ને નુકસાન પહોંચાડે છે. આના કારણે ધીમે ધીમે ઘૂંટણમાં સોજો, દુખાવો અને સંધિવા જેવી સમસ્યાઓ થઈ શકે છે, ખાસ કરીને જો તમારી ઉંમર 30 વર્ષથી વધુ હોય.

ટ્રેડમિલ પર મર્યાદાથી વધુ દોડવાના ગેરફાયદા:

• સાંધા પર વધુ પડતું દબાણ આવે છે.
• સ્નાયુઓ જલદી થાકી જાય છે અને ઈજા થવાનું જોખમ વધે છે.
• ઘૂંટણની ટોપીમાં દુખાવો થઈ શકે છે.
• શરીરનું સંતુલન ગુમાવવાનું અને પડી જવાનું જોખમ રહે છે.
• પીઠ અને પગની ઘૂંટીમાં તાણ આવી શકે છે.

તો શું તમારે ટ્રેડમિલનો ઉપયોગ કરવાનું બંધ કરી દેવો જોઈએ? હેલ્થ એક્સપર્ટ્સનું કહેવું છે કે ટ્રેડમિલ પર ચાલવું અથવા હળવું દોડવું વજન ઘટાડવા અને હૃદયના સ્વાસ્થ્ય માટે ખૂબ જ ફાયદાકારક છે, પરંતુ તે ત્યારે જ જ્યારે તમે મર્યાદામાં રહો. યાદ રાખો કે ફિટનેસ એક લાંબી પ્રક્રિયા છે, તે કોઈ રેસ નથી. એક જ દિવસમાં 'યુસૈન બોલ્ટ' બનવાની લાયમાં પોતાના શરીરને નુકસાન પહોંચાડવાને બદલે ધીમે ધીમે આગળ વધો. જો તમને ટ્રેડમિલનો ઉપયોગ કર્યા પછી તમારા ઘૂંટણમાં સતત દુખાવો, સોજો અથવા ચાલવામાં તકલીફ થતી હોય તો તમારે તાત્કાલિક ફિઝિયોથેરાપિસ્ટ અથવા ઓર્થોપેડિક ડોક્ટરની સલાહ લેવી જોઈએ. શરૂઆતમાં ધ્યાન રાખવાથી તમે ભવિષ્યમાં થનારી મોટી સમસ્યાઓને ટાળી શકો છો.

ટ્રેડમિલ પર સ્વસ્થ રીતે દોડવા માટેની ટિપ્સ:

• ટ્રેડમિલ પર 20-30 મિનિટ દોડવું પૂરતું છે, તેનાથી વધુ સમય ન આપો.
• માત્ર દોડવું જ નહીં, વર્કઆઉટ શરૂ કરતા પહેલા વોર્મ-અપ કરો અને પછી કૂલ-ડાઉન પણ કરો.
• આંચકા શોષી લે તેવા સારા શૂઝ પહેરો જેથી તમારા ઘૂંટણ પર ઓછી અસર પડે.
• ટ્રેડમિલ પર તમારી સ્પીડ પર ધ્યાન આપો. 5-7 કિમી/કલાકની ઝડપે ચાલવું અથવા જોગિંગ કરવું સારું છે.
• અઠવાડિયામાં બે દિવસ તમારા શરીરને આરામ આપો જેથી તમારા સાંધાને આરામ મળી શકે.

ડિસ્ક્લેમર: આ સમાચારમાં આપવામાં આવેલી કેટલીક માહિતી મીડિયા રિપોર્ટ્સ પર આધારિત છે. કોઈપણ સૂચનને અમલમાં મૂકતા પહેલાં તમારે સંબંધિત નિષ્ણાતની સલાહ લેવી જોઈએ.