Patan: ધારાસભ્ય કિરીટ પટેલે કહ્યું- 'લંગસિયા' નાખનારા ફાવશે નહીં, 2027માં ધાબું બદલવાનો નથી
Kirit Patel Patan MLA: કોંગ્રેસના ધારાસભ્યનો વિરોધીઓને સણસણતો જવાબ; ફાફડા-જલેબીની જિયાફત સાથે કહ્યું- 'મારી દોરી મજબૂત છે, પક્ષપલટાની અફવા ફેલાવનારા નિષ્ફળ જશે.'
Kirit Patel Patan MLA: સમગ્ર ગુજરાતમાં મકરસંક્રાંતિ (Makar Sankranti) ની ધામધૂમથી ઉજવણી થઈ રહી છે, ત્યારે પાટણનું રાજકીય વાતાવરણ પણ ગરમાયું છે. પાટણના કોંગ્રેસના ધારાસભ્ય (Congress MLA) કિરીટ પટેલે પોતાના પરિવાર અને કાર્યકર્તાઓ સાથે ઉત્તરાયણની મજા માણી હતી. જોકે, પતંગની પેચ લડાવતા લડાવતા તેમણે રાજકીય વિરોધીઓ પર આકરા પ્રહારો કર્યા હતા અને પક્ષપલટાની તમામ અટકળો પર પૂર્ણવિરામ મૂકી દીધું હતું.
"લંગસિયા નાખનારાઓથી કોઈ ફરક નથી પડતો"
ધારાસભ્ય કિરીટ પટેલે (Patan MLA Kirit Patel) વર્તમાન રાજકીય સ્થિતિ પર કટાક્ષ કરતા જણાવ્યું હતું કે, "જેમ ઉત્તરાયણમાં આપણો પતંગ ઊંચે ચગે ત્યારે કેટલાક લોકો ઈર્ષ્યાથી લંગસિયા (પથ્થર કે વજન બાંધેલી દોરી) નાખીને પતંગ કાપવાનો પ્રયાસ કરે છે, તેમ રાજકારણમાં પણ આવું જ છે." તેમણે આત્મવિશ્વાસ સાથે ઉમેર્યું હતું કે, "જો તમારી દોરી અને પતંગ મજબૂત હોય, તો આવા લંગસિયા નાખનારાઓથી કોઈ ફરક પડતો નથી. મારો પતંગ ક્યારેય કપાવાનો નથી."
"2027 માં હું ધાબું નહીં બદલું"
છેલ્લા કેટલાક સમયથી કિરીટ પટેલ (Kirit Patel) પક્ષ બદલશે તેવી ચર્ચાઓ ચાલી રહી હતી. આ અંગે સ્પષ્ટતા કરતા તેમણે કહ્યું કે, "જ્યારથી હું ધારાસભ્ય બન્યો છું, ત્યારથી મારા વિશે જાતજાતની વાતો કરવામાં આવે છે. પરંતુ કિરીટ પટેલ કોંગ્રેસમાં અડીખમ (Steadfast) છે અને અડીખમ જ રહેશે. હું સ્પષ્ટ કરવા માંગુ છું કે 2027 ની વિધાનસભા ચૂંટણીમાં હું મારું 'ધાબું' (પક્ષ) બદલવાનો નથી. મારું ભવિષ્ય કોંગ્રેસ સાથે જ જોડાયેલું છે."
સ્થાનિક ચૂંટણી અને ઉમેદવારોની પસંદગી
ફાફડા-જલેબીની લિજ્જત માણતા કિરીટ પટેલે આગામી સ્થાનિક સ્વરાજ્યની ચૂંટણી (Local Body Elections) અંગે પણ મહત્વનું નિવેદન આપ્યું હતું. તેમણે કહ્યું કે, "જેમ આપણે બજારમાં જઈને મજબૂત અને સારો પતંગ પસંદ કરીએ છીએ, તેવી જ રીતે આગામી ચૂંટણીમાં પ્રજાનો વિશ્વાસ જીતી શકે તેવા મજબૂત ઉમેદવારોની પસંદગી કરવામાં આવશે."
તેમણે પાટણની જનતાનો આભાર માનતા કહ્યું કે મતદારોએ તેમને સતત 2 ટર્મથી વિજેતા બનાવ્યા છે, તેથી તેમનો પાયો અને ટેકેદારો મજબૂત છે. અંતમાં તેમણે પાટણવાસીઓને શુભેચ્છા પાઠવતા કહ્યું હતું કે, જીવનમાં સુખ-દુઃખ આવે તો પણ રંગબેરંગી પતંગોની જેમ હંમેશા આનંદિત રહેવું જોઈએ.
ટોપ સ્ટોરી
ટ્રેન્ડિંગ સમાચાર
