સાવધાન! 30 વર્ષ પછી તમારું હૃદય પણ થવા લાગે છે ઘરડું, જાણો કઈ ભૂલો તમને પાડી શકે છે ભારે?

ઉંમર વધવાની સાથે શરીરમાં થતા ફેરફારોની સીધી અસર હૃદય પર પડે છે. 30 વટાવ્યા પછી જો તમે પણ બેદરકાર છો, તો હાર્ટ એટેક સહિતની બીમારીઓનું જોખમ વધી શકે છે. જાણો નિષ્ણાતો શું કહે છે.

30 plus heart health changes expert advice lifestyle tips

Source : Freepik

Show Quick Read

Key points generated by AI, verified by newsroom

• ૩૦ વર્ષ પછી હૃદયની ઉંમર વધે, જીવનશૈલી પર ધ્યાન આપવું.
• મેટાબોલિઝમ ધીમું, તણાવ, કસરતનો અભાવ જોખમ વધારે.
• હૃદયના સ્નાયુઓ કડક, ધમનીઓમાં ચરબી જમા થવી.
• નિયમિત તપાસ, કસરત, સ્વસ્થ આહાર, ઊંઘ જરૂરી.

શું તમે 30 વર્ષની ઉંમર પાર કરી ચૂક્યા છો? જો હા, તો આ સમય તમારા સ્વાસ્થ્ય, ખાસ કરીને હૃદયની કાળજી લેવાનો છે. 30 વર્ષની ઉંમર વટાવવી ભલે સામાન્ય લાગતી હોય, પરંતુ આ સમયગાળા દરમિયાન શરીરની અંદર, અને ખાસ કરીને હૃદયમાં ઘણા ઝીણા-ઝીણા ફેરફારો થવા લાગે છે. આ ફેરફારોની અસર આપણને તરત દેખાતી નથી, પણ ભવિષ્યમાં તે હૃદયના સ્વાસ્થ્ય પર ખૂબ જ ઊંડી અને ગંભીર અસર છોડી શકે છે. જો સમયસર આ ફેરફારોને ઓળખીને યોગ્ય જીવનશૈલી અપનાવવામાં આવે, તો ભવિષ્યમાં હૃદય સંબંધિત ગંભીર રોગોનું જોખમ નોંધપાત્ર રીતે ઘટાડી શકાય છે. તો ચાલો સમજીએ કે 30 પછી શરીરમાં એવા કયા ફેરફારો થાય છે અને હૃદયને સ્વસ્થ રાખવા માટે શું કરવું જોઈએ.

નિષ્ણાતોનો શું મત છે?

જાણીતા કાર્ડિયોલોજિસ્ટ ડૉ. બિપિન કુમાર દુબેના જણાવ્યા અનુસાર, 30 વર્ષ પછી મોટાભાગના લોકોના જીવનની ગતિ એકદમ ઝડપી બની જાય છે. કામનું પ્રેશર, પારિવારિક જવાબદારીઓ અને દોડધામ ભરેલી લાઈફસ્ટાઈલના કારણે શરીરની અંદર ધીમે-ધીમે એવા ફેરફારો થવા લાગે છે જે સીધી હૃદય પર અસર કરે છે, ભલેને બહારથી વ્યક્તિ એકદમ સ્વસ્થ દેખાતી હોય.

ડૉક્ટરો વારંવાર "હાર્ટ એજ" (હૃદયની ઉંમર) નો ઉલ્લેખ કરે છે. આનો અર્થ એ છે કે તમારી વાસ્તવિક ઉંમર કરતા તમારું હૃદય કેટલું ઘરડું થઈ ગયું છે. ઘણીવાર જોવા મળે છે કે જો વ્યક્તિને બ્લડ પ્રેશર, ડાયાબિટીસ, સ્થૂળતા કે ધૂમ્રપાન જેવી આદતો હોય, તો તેમના હૃદયની ઉંમર તેમની અસલી ઉંમર કરતા 5 થી 8 વર્ષ વધારે થઈ ગઈ હોય છે. આ સ્પષ્ટપણે દર્શાવે છે કે હૃદય પર માત્ર વધતી ઉંમરની જ નહીં, પણ તમારી ખરાબ લાઈફસ્ટાઈલની સૌથી વધુ અસર પડે છે.

30 પછી હૃદયમાં શું તકલીફો ઊભી થાય છે?

30 ની ઉંમર પછી શરીરનું મેટાબોલિઝમ (ચયાપચયની ક્રિયા) ધીમું પડવા લાગે છે. આ સમયે ઊંઘ પૂરી ન થવી, સતત સ્ટ્રેસ (તણાવ), શારીરિક કસરતનો અભાવ અને બહારનું જંક ફૂડ ખાવાની આદતોની સીધી અસર વજન, કોલેસ્ટ્રોલ અને બ્લડ પ્રેશર પર પડે છે. આ બધા જ પરિબળો ભેગા મળીને હાર્ટ એટેક કે હૃદય રોગનું જોખમ અનેકગણું વધારી દે છે.

આ ઉંમર પછી હૃદયના બંધારણમાં પણ કેટલાક ફેરફારો થાય છે. હૃદયના સ્નાયુઓ થોડા કડક થઈ શકે છે, જેનાથી હૃદયની પમ્પિંગ ક્ષમતા ઘટે છે. આ ઉપરાંત, શરીરમાં હળવો સોજો (બળતરા) રહેવા લાગે છે, જે ધીમે-ધીમે ધમનીઓ (નળીઓ) માં ચરબી જમાવવાનું શરૂ કરે છે. આ જમા થયેલી ચરબી ભવિષ્યમાં હાઈ બ્લડ પ્રેશર અને હાર્ટ બ્લોકેજ જેવી ગંભીર સમસ્યાઓ નોતરે છે.

આ સમસ્યાઓના લક્ષણો શું છે?

સૌથી મોટી અને ચિંતાજનક વાત એ છે કે આ બધા ફેરફારો શરીરમાં એકદમ છૂપી રીતે થાય છે. હાઈ બ્લડ પ્રેશર, ખરાબ કોલેસ્ટ્રોલ વધવું કે પ્રી-ડાયાબિટીસ જેવી સ્થિતિ લાંબા સમય સુધી શરીરને અંદરથી કોતરી ખાય છે, અને તેના કોઈ જ લક્ષણો બહાર દેખાતા નથી. જ્યારે આપણને તેની ખબર પડે છે, ત્યારે મોટેભાગે રોગ ગંભીર સ્વરૂપ ધારણ કરી ચૂક્યો હોય છે. તેને જ સાયલન્ટ કિલર કહેવાય છે.

તો બચાવનો રસ્તો શું છે?

સારા સમાચાર એ છે કે 30 વર્ષની ઉંમર એ હૃદયને ફરીથી યુવાન અને સ્વસ્થ બનાવવાનો શ્રેષ્ઠ સમય છે.

રોજ ઓછામાં ઓછું 30 મિનિટ ચાલવા જવું કે કસરત કરવી.

ઘરનો અને પૌષ્ટિક આહાર લેવો, જંક ફૂડ ટાળવું.

7 થી 8 કલાકની પૂરતી અને શાંત ઊંઘ લેવી.

યોગ કે મેડિટેશન દ્વારા સ્ટ્રેસ (તણાવ) ને કંટ્રોલ કરવો.

સૌથી અગત્યનું: દર વર્ષે નિયમિતપણે બ્લડ પ્રેશર, કોલેસ્ટ્રોલ અને બ્લડ સુગરનું ચેકઅપ કરાવતા રહેવું.

(ડિસ્ક્લેમર: આ અહેવાલમાં આપવામાં આવેલી માહિતી સામાન્ય સંશોધનો અને નિષ્ણાતોના મંતવ્યો પર આધારિત છે. આને કોઈ તબીબી સલાહનો વિકલ્પ ન ગણવો. જીવનશૈલી કે કસરતમાં કોઈપણ મોટો ફેરફાર કરતા પહેલા તમારા ફેમિલી ડૉક્ટરની સલાહ અવશ્ય લો.)

આ પણ વાંચો

શું ડાયાબિટીસના દર્દીઓ ઉનાળામાં શેરડીનો રસ પી શકે? જાણો આ અંગે નિષ્ણાતોનો શું મત છે