હાર્ટ અટેક અને હાર્ટ સ્ટ્રોકના 99% કેસમાં વ્યક્તિની આ ખરાબ આદત જવાબદાર, સ્ટડીનું ચોંકાવનારૂં તારણ

અમેરિકાના 1,200 થી વધુ દર્દીઓના ડેટાની તપાસ કરવામાં આવી હતી.સંશોધનના પરિણામો આશ્ચર્યજનક હતા. આ રિસર્ચમાં 99 ટકા દર્દીઓમાં હાર્ટ એટેક અથવા સ્ટ્રોક પહેલા એક મોટું રિસ્ક ફેક્ટર હતું.

પ્રતીકાત્મક તસવીર

Source : abplive

આપણે ઘણીવાર એવું વિચારીએ છીએ કે, હાર્ટ એટેક અને સ્ટ્રોક અચાનક અને ચેતવણી વિના થાય છે. પરંતુ સત્ય તદ્દન અલગ છે. તાજેતરમાં જર્નલ ઓફ ધ અમેરિકન કોલેજ ઓફ કાર્ડિયોલોજીમાં પ્રકાશિત થયેલા એક મોટા અભ્યાસમાં જાણવા મળ્યું છે કે, હાર્ટ એટેક અને સ્ટ્રોક અચાનક થતા નથી, પરંતુ જીવનશૈલીની ભૂલોનું પરિણામ છે.

આ અભ્યાસમાં કોરિયામાં 600,000 થી વધુ લોકો અને યુનાઇટેડ સ્ટેટ્સમાં 1,200 થી વધુ દર્દીઓના ડેટાની તપાસ કરવામાં આવી હતી. પરિણામો આશ્ચર્યજનક હતા. આ રિસર્ચમાં 99 ટકા દર્દીઓમાં હાર્ટ એટેક અથવા સ્ટ્રોક પહેલા એક મોટું રિસ્ક ફેક્ટર હતું. જેનો અર્થ છે કે, આપણે આ જોખમોને વહેલા ઓળખીને આપણા હૃદય અને મગજના સ્વાસ્થ્યનું રક્ષણ કરી શકીએ છીએ. ચાલો 99 ટકા સ્ટ્રોક અને હાર્ટ એટેકના કારણો અને તેમને કેવી રીતે અટકાવી શકાય તેનું અન્વેષણ કરીએ.

હાઈ બ્લડ પ્રેશર - અભ્યાસમાં જાણવા મળ્યું છે કે, 96 ટકા દર્દીઓમાં હાઈ બ્લડ પ્રેશર હતું. આ એક સાયલન્ટ કિલર છે કારણ કે તે ધીમે ધીમે શરીરના મહત્વપૂર્ણ અંગો, ખાસ કરીને હૃદય અને મગજને, કોઈપણ લક્ષણો વિના અસર કરે છે. હાઈ બ્લડ પ્રેશર ધમનીઓ પર દબાણ વધારે છે, હૃદયના સ્નાયુઓ નબળા પડે છે અને સ્ટ્રોકનું જોખમ વધારે છે. આને ટાળવા માટે, મીઠાનું સેવન ઓછું કરો, દરરોજ ૩૦ મિનિટ ચાલો અથવા થોડી હળવી કસરત કરો, તણાવ ઓછો કરવાનો પ્રયાસ કરો અને નિયમિતપણે તમારા બ્લડ પ્રેશરની તપાસ કરાવો.

ધૂમ્રપાન - આ અભ્યાસમાં 68 ટકા દર્દીઓ ધૂમ્રપાન કરનારા હતા. સિગારેટમાં રહેલા રસાયણો ધમનીઓને સંકુચિત કરે છે, જેનાથી રક્ત પ્રવાહ અને ઓક્સિજન પુરવઠો બંને ઘટે છે. આ હૃદયને પૂરતો ઓક્સિજન મળતો અટકાવે છે, જેનાથી ધીમે ધીમે જોખમ વધે છે. આને ટાળવા માટે, બીડી હોય કે સિગારેટ, તરત જ ધૂમ્રપાન છોડી દો, નિકોટિન રિપ્લેસમેન્ટ થેરાપી લો અથવા તબીબી મદદ લો.

 હાઈ કોલેસ્ટ્રોલ - ખરાબ કોલેસ્ટ્રોલમાં વધારો થવાથી રક્ત વાહિનીઓની આંતરિક દિવાલો પર પ્લેક એકઠા થાય છે. આ પ્લેક પછીથી બ્લોકેજ બની શકે છે, જે હાર્ટ એટેક અથવા સ્ટ્રોક તરફ દોરી જાય છે. શરીરમાં સારું કોલેસ્ટ્રોલ પણ હોય છે, જે ધમનીઓને સ્વચ્છ રાખવામાં મદદ કરે છે, પરંતુ જો સંતુલન ખરાબ હોય તો જોખમ વધે છે. આને ટાળવા માટે, ફાસ્ટ ફૂડ, તળેલા ખોરાક અને ટ્રાન્સ ચરબી ટાળો, ઓમેગા-3 ફેટી એસિડથી ભરપૂર ખોરાક ખાઓ અને નિયમિત બ્લડ ટેસ્ટ  કરાવો.

હાઈ બ્લડ સુગર - ડાયાબિટીસ ધરાવતા લોકોને સામાન્ય વસ્તુની તુલનામાં હૃદય રોગ અને સ્ટ્રોકનું જોખમ બમણું હોય છે. જ્યારે બ્લડ સુગરનુ સ્તર વધે છે, ત્યારે રક્તવાહિનીઓ સખત થઈ જાય છે, જેનાથી રક્ત પ્રવાહ મર્યાદિત થાય છે. આને ટાળવા માટે, મીઠાઈઓ અને મેદાથી બનેલા ફૂડ લેવાનું ટાળો. નિયમિતપણે તમારા બ્લડ સુગરની તપાસ કરાવો, અને ફાઇબરયુક્ત ખોરાક અને નિયમિત કસરત દ્વારા તમારા બ્લડ સુગરને નિયંત્રિત કરો.

સ્ત્રીઓમાં પણ આ જોખમ ઝડપથી વધી રહ્યું છે.

અગાઉ એવું માનવામાં આવતું હતું કે સ્ત્રીઓમાં હૃદયરોગના હુમલાનું જોખમ ઓછું હોય છે, ખાસ કરીને 60 વર્ષની ઉંમર પહેલા. જો કે, આ અભ્યાસ મુજબ, 60 વર્ષથી ઓછી ઉંમરની સ્ત્રીઓમાં પણ, 95 ટકાથી વધુ કેસોમાં કોઈને કોઈ જોખમ પરિબળ જોવા મળ્યું હતું. હોર્મોનલ ફેરફારો, તણાવ અને બિનઆરોગ્યપ્રદ આહાર આ જોખમને ઝડપથી વધારી રહ્યા છે. તેથી, પિરિયડ,  મેનોપોઝ દરમિયાન હોર્મોનલ ચેકઅપ કરાવવું, તણાવને દૂર કરવા માટે  ધ્યાન યોગનો સહારો લો. હેલ્ધી જીવન શૈલી અપનાવો.