હવે મચ્છર કરડશે તો ખુદ મરી જશે, વૈજ્ઞાનિકોએ શોધી એવી ટેકનિક જેનાથી ગાયબ થઇ જશે મચ્છર
Mosquito Killer: સામાન્ય રીતે રિવર બ્લાઇન્ડનેસ અને એલિફેન્ટિયાસિસ જેવા ઉપેક્ષિત રોગોની સારવાર માટે આઇવરમેક્ટીન આપવામાં આવે છે
Mosquito Killer: એક નવા સંશોધનમાં એક એવી ગોળી વિશે ચોંકાવનારી વાત સામે આવી છે જે માનવ લોહીને મચ્છરો માટે ઝેરમાં ફેરવે છે. કેન્યા અને મોઝામ્બિક જેવા આફ્રિકન દેશોમાં કરવામાં આવેલા મોટા પાયે અભ્યાસમાં જાણવા મળ્યું છે કે આઇવરમેક્ટીન નામની દવાએ મેલેરિયાના કેસોમાં 26% ઘટાડો કર્યો છે. આ દવા મનુષ્યોને નુકસાન કરતી નથી પરંતુ જ્યારે મચ્છર કરડે છે, ત્યારે તેઓ પોતે જ મરી જાય છે.
મેલેરિયા અટકાવવા માટે આઇવરમેક્ટીન અસરકારક સાબિત થઈ રહ્યું છે
BOHEMIA નામના સૌથી મોટા અભ્યાસમાં, વૈજ્ઞાનિકોએ શોધી કાઢ્યું કે જ્યારે સમગ્ર સમુદાયને આ દવાનો ડોઝ આપવામાં આવ્યો, ત્યારે મેલેરિયાના નવા કેસોમાં નોંધપાત્ર ઘટાડો થયો. આ અભ્યાસ બાર્સેલોના ઇન્સ્ટિટ્યૂટ ફોર ગ્લોબલ હેલ્થ (ISGlobal) દ્વારા કરવામાં આવ્યો હતો જેમાં લા કેક્સા ફાઉન્ડેશન, મેનહિકા હેલ્થ રિસર્ચ સેન્ટર (CISM) અને KEMRI-વેલકમ ટ્રસ્ટ જેવી સંસ્થાઓએ સહયોગ આપ્યો હતો. અભ્યાસના પરિણામો પ્રતિષ્ઠિત ધ ન્યૂ ઇંગ્લેન્ડ જર્નલ ઓફ મેડિસિનમાં પ્રકાશિત થયા છે.
નવી રણનીતિ શા માટે જરૂરી છે ?
૨૦૨૩ માં, વિશ્વભરમાં ૨૬૩ મિલિયન મેલેરિયાના કેસ અને લગભગ ૫.૯૭ લાખ મૃત્યુ નોંધાયા હતા. મચ્છરદાની (LLIN) અને ઘરની અંદર સ્પ્રે (IRS) જેવા પરંપરાગત પગલાં હવે એટલા અસરકારક રહ્યા નથી કારણ કે મચ્છરોએ જંતુનાશકો સામે પ્રતિકાર વિકસાવી લીધો છે અને હવે તેઓ બહાર અથવા અણધાર્યા સમયે કરડે છે. આવી સ્થિતિમાં, મેલેરિયાને રોકવા માટે નવી વિચારસરણી અને નવી પદ્ધતિઓ જરૂરી બની ગઈ છે.
આ ગોળી કેવી રીતે કામ કરે છે ?
સામાન્ય રીતે રિવર બ્લાઇન્ડનેસ અને એલિફેન્ટિયાસિસ જેવા ઉપેક્ષિત રોગોની સારવાર માટે આઇવરમેક્ટીન આપવામાં આવે છે. પરંતુ હવે એવું બહાર આવ્યું છે કે જ્યારે આ દવા કોઈ વ્યક્તિને આપવામાં આવે છે અને મચ્છર તેને કરડે છે, ત્યારે મચ્છર તરત જ મરી જાય છે. આ દવાનો માસિક ડોઝ ઘણા દિવસો સુધી અસરકારક રહે છે.
આફ્રિકામાં પરીક્ષણ કરવામાં આવ્યું
આ પ્રયોગ બે દેશોમાં કરવામાં આવ્યો હતો, કેન્યાના ક્વાલે કાઉન્ટી અને મોઝામ્બિકના મોપિયા જિલ્લો. કેન્યામાં 5 થી 15 વર્ષની વયના બાળકોને અને મોઝામ્બિકમાં 5 વર્ષથી ઓછી ઉંમરના બાળકોને ત્રણ મહિના માટે 400 mcg/kg નો ડોઝ આપવામાં આવ્યો હતો. આ દવાએ કેન્યામાં ઉત્તમ પરિણામો આપ્યા, આઇવરમેક્ટીન લેતા બાળકોમાં મેલેરિયાના કેસમાં 26% ઘટાડો નોંધવામાં આવ્યો. આ અભ્યાસમાં 20,000 થી વધુ સહભાગીઓ અને 56,000 થી વધુ ડોઝનો સમાવેશ થતો હતો.
WHO પણ રસ દાખવી રહ્યું છે
આ અભ્યાસ WHO ની વેક્ટર કંટ્રોલ એડવાઇઝરી ટીમ સુધી પહોંચ્યો છે અને તેમણે વધુ અભ્યાસની ભલામણ કરી છે. ઘણા દેશો તેમના મેલેરિયા નિયંત્રણ કાર્યક્રમમાં આ દવાનો સમાવેશ કરવાનું વિચારી રહ્યા છે. ISGlobal ના મેલેરિયા ઇનિશિયેટિવના ડિરેક્ટર રેજિના રાબિનોવિચ કહે છે, "આ સંશોધન મેલેરિયાનું ભવિષ્ય બદલી શકે છે. આઇવરમેક્ટીન એક જાણીતો, સલામત વિકલ્પ છે જે હાલના પગલાં સાથે મળીને કામ કરી શકે છે."
ટોપ સ્ટોરી
ટ્રેન્ડિંગ સમાચાર
