એક એપ્રિલથી બદલાઇ જશે ક્રેડિટ કાર્ડ, મ્યુચ્યુઅલ ફંડ, ઇન્કમટેક્સ અને UPI સંબંધિત અનેક નિયમો
મ્યુચ્યુઅલ ફંડમાં રોકાણ સંબંધિત કેટલાક નિયમોમાં ફેરફાર કર્યા છે, જે 1 એપ્રિલ, 2025થી અમલમાં આવશે
નવું નાણાકીય વર્ષ 2025-26 આવતીકાલથી એટલે કે 1 એપ્રિલથી શરૂ થશે. નવા વર્ષની શરૂઆત સાથે મ્યુચ્યુઅલ ફંડ, ક્રેડિટ કાર્ડ, UPI ટ્રાન્જેક્શન, આવકવેરા અને GST સંબંધિત ઘણા નિયમો બદલાશે. આનાથી રોકાણકારો, કરદાતાઓ અને સામાન્ય લોકો પર અસર પડશે. તેથી જો તમે મ્યુચ્યુઅલ ફંડ, ક્રેડિટ કાર્ડ, UPI ટ્રાન્જેક્શન અને ઇન્કમટેક્સ સાથે સંકળાયેલા છો તો તમારા માટે નિયમોમાં આ ફેરફારો વિશે જાણવું ખૂબ જ મહત્વપૂર્ણ છે.
સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (SEBI) એ મ્યુચ્યુઅલ ફંડમાં રોકાણ સંબંધિત કેટલાક નિયમોમાં ફેરફાર કર્યા છે, જે 1 એપ્રિલ, 2025થી અમલમાં આવશે. ન્યૂ ફંડ ઑફર્સ (NFO) હેઠળ એકત્ર કરાયેલા ભંડોળનું રોકાણ હવે 30 કાર્યકારી દિવસોમાં કરવું પડશે. જો કોઈ એસેટ મેનેજમેન્ટ કંપની (AMC) આ સમયગાળામાં રોકાણ કરવામાં અસમર્થ હોય તો તેને રોકાણ સમિતિની મંજૂરીથી 30 દિવસનો વધુ સમય લંબાવી શકાય છે. જો 60 દિવસની અંદર રોકાણ કરવામાં નહીં આવે તો AMC ને નવા રોકાણો લેવા પર પ્રતિબંધ મૂકવામાં આવશે અને રોકાણકારોને કોઈપણ દંડ વિના બહાર નીકળવાની મંજૂરી આપવામાં આવશે.
સેબીએ સ્પેશિયલાઇઝ્ડ ઇન્વેસ્ટમેન્ટ ફંડ્સ (SIFs) નામની એક નવી કેટેગરી રજૂ કરી છે, જે મ્યુચ્યુઅલ ફંડ્સ અને પોર્ટફોલિયો મેનેજમેન્ટ સર્વિસિસ (PMS) વચ્ચેનો ક્રોસ હશે. આમાં ઓછામાં ઓછા 10 લાખ રૂપિયાનું રોકાણ કરવાની જરૂર પડશે. છેલ્લા ત્રણ વર્ષમાં જેમની સરેરાશ સંપત્તિ અંડર મેનેજમેન્ટ (AUM) 10,000 કરોડ રૂપિયાથી વધુ રહી છે, ફક્ત તે AMC જ તેને લોન્ચ કરી શકે છે.
ડિજીલોકર સુવિધા
1 એપ્રિલથી રોકાણકારો ડિજીલોકરમાં તેમના ડીમેટ અને મ્યુચ્યુઅલ ફંડ હોલ્ડિંગ સ્ટેટમેન્ટ ડિજિટલ રીતે સ્ટોર અને એક્સેસ કરી શકશે. આનાથી દાવો ન કરાયેલી સંપત્તિની સમસ્યા ઓછી થશે અને નોમિની માટે સંપત્તિ મેળવવાનું સરળ બનશે.
નવા ટેક્સ સ્લેબ
નવો ટેક્સ સ્લેબ 1 એપ્રિલથી અમલમાં આવશે. નવા ટેક્સ માળખા હેઠળ, સરકારે કરમુક્ત આવકની મર્યાદા 7 લાખ રૂપિયાથી વધારીને 12 લાખ રૂપિયા કરી છે, જેનાથી મધ્યમ વર્ગના કરદાતાઓને મોટો ફાયદો થશે.
GST અને ઈ-ઇનવોઇસિંગના નવા નિયમો
1 એપ્રિલ, 2025થી 10 કરોડ કે તેથી વધુ વાર્ષિક ટર્નઓવર ધરાવતા વ્યવસાયોએ 30 દિવસની અંદર ઇન્વોઇસ નોંધણી પોર્ટલ પર ઇ-ઇન્વોઇસ અપલોડ કરવા જરૂરી રહેશે. અગાઉ આ નિયમ ફક્ત 100 કરોડ રૂપિયાથી વધુ ટર્નઓવર ધરાવતા વ્યવસાયોને જ લાગુ પડતો હતો.
યુનિફાઇડ પેન્શન યોજના લાગુ કરવામાં આવશે
1 એપ્રિલ, 2025થી નેશનલ પેન્શન સિસ્ટમ (NPS) હેઠળ યુનિફાઇડ પેન્શન સ્કીમ (UPS) લાગુ કરવામાં આવશે. આ યોજના કેન્દ્રીય કર્મચારીઓને નિશ્ચિત પેન્શનની ગેરન્ટી આપશે. ઓછામાં ઓછા 25 વર્ષની સેવા ધરાવતા કર્મચારીઓને છેલ્લા 12 મહિનાના સરેરાશ મૂળ પગારના 50 ટકા પેન્શન તરીકે મળશે.
UPI ટ્રાન્જેક્શન સંબંધિત ફેરફારો
નેશનલ પેમેન્ટ્સ કોર્પોરેશન ઓફ ઈન્ડિયા (NPCI) એ બેન્કો અને પેમેન્ટ સર્વિસ પ્રોવાઈડર્સ (PSPs) ને 31 માર્ચ, 2025 સુધીમાં તેમના ડેટાબેઝને અપડેટ કરવાનો નિર્દેશ આપ્યો છે. રિસાયકલ અથવા ઇન એક્ટિવ કરાયેલા મોબાઈલ નંબરોને ડિલીટ કરવા માટે સૂચના આપવામાં આવી છે. જો તમારો મોબાઇલ નંબર ડિપાર્ટમેન્ટ ઓફ ટેલિકોમ્યુનિકેશન્સ (DoT) ના નિયમો હેઠળ બ્લોક કરવામાં આવ્યો હોય તો તમારી બેન્ક અને UPI એપ તેને તેમના રેકોર્ડમાંથી દૂર કરી શકે છે, જે UPI સેવાઓને અસર કરી શકે છે. તેથી ખાતરી કરો કે તમારું બેન્ક ખાતું એક્ટિવ મોબાઇલ નંબર સાથે જોડાયેલું છે.
ટીડીએસ મુક્તિ
1એપ્રિલ, 2025થી લિબરલાઈઝ્ડ રેમિટન્સ સ્કીમ (LRS) હેઠળ વિદેશમાં અભ્યાસ કરતા બાળકોની ફી અથવા અન્ય ખર્ચ માટે 10 લાખ રૂપિયા સુધી મોકલવા પર કોઈ TDS લાગશે નહીં. અગાઉ 7 લાખ રૂપિયાથી વધુની રકમ પર 5 ટકા TDS ચૂકવવો પડતો હતો.
ક્રેડિટ કાર્ડના નિયમો બદલાશે
ઘણી બેન્કો 1 એપ્રિલથી ક્રેડિટ કાર્ડ સંબંધિત નિયમોમાં પણ ફેરફાર કરી રહી છે. SBI SimplyCLICK ક્રેડિટ કાર્ડ સાથે, Swiggy પર રિવોર્ડ પોઈન્ટ્સ હવે 10X ને બદલે 5X થશે, પરંતુ તમને Myntra, BookMyShow અને Apollo 24|7 પર 10X રિવોર્ડ પોઈન્ટ્સ મળતા રહેશે. એર ઇન્ડિયા SBI પ્લેટિનમ ક્રેડિટ કાર્ડનો ઉપયોગ કરીને એર ઇન્ડિયા ટિકિટ બુકિંગ પર ઉપલબ્ધ રિવોર્ડ પોઈન્ટ્સ પ્રતિ 100 રૂપિયા ખર્ચવા પર 15 થી ઘટાડીને 5 કરવામાં આવશે. IDBI ફર્સ્ટ બેન્કના ક્લબ વિસ્તારા ક્રેડિટ કાર્ડ માટે કોઈ નવો માઇલસ્ટોન લાભ નહીં હોય.
ટોપ સ્ટોરી
ટ્રેન્ડિંગ સમાચાર
