પેટ્રોલ-ડીઝલ બાદ હવે રાંધણ ગેસનો બાટલો થયો મોંઘો, જાણો હવે કેટલા રૂપિયા ચુકવવા પડશે

14.2 કિલોવાળા સિલિન્ડરની કિંમતમાં 50 રૂપિયાનો વધારો કરવામાં આવ્યો છે. જ્યારે 5 કિલોગ્રામના સિલિન્ડરની કિંમતમાં 18 રૂપિયાનો વધારો થયો છે.

(ફાઈલ તસવીર)

નવી દિલ્હીઃ સરકારે આમ આદમીને વધુ એક ઝટકો આપ્યો છે. ઓઇલ કંપનીઓઓએ એલપીજી ગેસની કિંમતમાં વધારો કર્યો છે. 14.2 કિલોવાળા સિલિન્ડરની કિંમતમાં 50 રૂપિયાનો વધારો કરવામાં આવ્યો છે. આવી જ રીતે 5 કિલોગ્રામના સિલિન્ડરની કિંમતમાં 18 રૂપિયાનો વધારો થયો છે. 19 કિલોગ્રામના સિલિન્ડરમાં 36.50 રૂપિયાનો વધારો થયો છે. દેશની સૌથી મોટી ઓઇલ કંપની ઓઇઓસી મુજબ દિલ્હીમાં સબ્સિડી વગરના 14.2 કિલોગ્રામના સિલિન્ડરનો ભાવ હવે 644 રૂપિયા થઈ ગયો છે. કોલકાતામાં તે 670.50 રૂપિયા, મુંબઈમાં 644 રૂપિયા અને ચેન્નઈમાં 660 રૂપિયા થઈ ગયો છે. આ પહેલા 1 ડિસેમ્બરે 19 કિલોગ્રામના કોમર્શિયલ ગેસ સિલિન્ડરના ભાવમાં વધારો થયો હતો. ચેન્નઇમાં સૌથી વધુ 56 રૂપિયા પ્રતિ સિલિન્ડરનો વધારો થયો હતો. એક કોમર્શિયલ સિલિન્ડર માટે 1410 રૂપિયા આપવા પડશે. આ ઉપરાંત દેશની રાજધાની દિલ્હીમાં 55 રૂપિયાનો વધારો થયો. તેનો ભાવ 1296 રૂપિયા થયો હતો. કોલકાતા અને મુંબઈમાં પણ 55 રૂપિયાનો વધારો થયો હતો. ત્યારબાદ આ બંને શહેરોમાં નવા ભાવ ક્રમશઃ 1351 અને 1244 રૂપિયા થયો હતો. હાલ સરકાર એક વર્ષમાં 14.2 કિલોગ્રામના 12 સિલિન્ડર પર સબ્સિડી આપી રહી છે. જો ગ્રાહક વધારે સિલિન્ડર લેવા માંગે તો બજારમાં જે ભાવ ચાલતો હોય તે ચુકવવો પડે છે. ગેસ સિલિન્ડરની કિંમત દર મહિને બદલાય છે.