Mamata Machinery IPO: મમતા મશીનરીના IPOએ લિસ્ટિંગ પર મચાવી ધમાલ, પ્રથમ દિવસે રોકાણકારોના રૂપિયામાં દોઢ ગણો વધારો

મમતા મશીનરીના IPOનું સ્ટોક એક્સચેન્જમાં ધમાકેદાર લિસ્ટિંગ થયું હતું

પ્રતિકાત્મક તસવીર

Source : KFinTech

Mamata Machinery IPO Listing: મમતા મશીનરીના IPOનું સ્ટોક એક્સચેન્જમાં ધમાકેદાર લિસ્ટિંગ થયું હતું. 243 રૂપિયાના ઇશ્યૂ પ્રાઇઝ ધરાવતો આ સ્ટોર 147 ટકાના વધારા સાથે 600 રૂપિયા પર લિસ્ટ થયો હતો. પરંતુ શેરમાં વધારો અહીં અટકાયો નહી અને લિસ્ટિંગ બાદ શેરમાં વધુ 5 ટકાનો વધારો થયો હતો. 5 ટકાના ઉછાળા સાથે શેર 630 રૂપિયા પર પહોંચ્યો હતો, જે પછી શેરમાં અપર સર્કિટ લાગી હતી. એટલે કે આ IPO એ રોકાણકારોને 160 ટકા વળતર આપ્યું છે.

243 રૂપિયાની ઇશ્યૂ કિંમતે નાણાં એકત્ર કર્યા

મમતા મશીનરીએ IPO દ્વારા મૂડીબજારમાંથી 179.39 કરોડ રૂપિયા એકત્ર કર્યા હતા. અને IPOમાંના તમામ રૂપિયા 0.74 કરોડ શેરના ઓફર ફોર સેલ મારફતે એકઠા કર્યા હતા. કંપનીના IPOમાં 19 ડિસેમ્બરથી 23 ડિસેમ્બર સુધી રોકાણ માટે અરજી કરી શકાતી હતી. 27 ડિસેમ્બરે સફળ રોકાણકારોને શેરની ફાળવણી કરવામાં આવી હતી. મમતા મશીનરીએ IPOની પ્રાઇસ બેન્ડ 230 થી 243 રૂપિયા નક્કી કરી હતી. જેમાં કંપનીના કર્મચારીઓને પ્રતિ શેર 12 રૂપિયાનું ડિસ્કાઉન્ટ આપવામાં આવ્યું હતું.

IPO ને બમ્પર પ્રતિસાદ મળ્યો હતો.

મમતા મશીનરીના IPOને રોકાણકારોનો જોરદાર પ્રતિસાદ મળ્યો હતો. આઇપીઓ કુલ 195 ગણો સબસ્ક્રાઇબ થઇને ક્લોઝ થયો હતો. જેમાં સંસ્થાકીય રોકાણકારોની કેટેગરીમાં 235.88 ગણું, બિન-સંસ્થાકીય રોકાણકારોની કેટેગરીમાં 274 ગણું અને રિટેલ રોકાણકારોની કેટેગરીમાં 138 ગણું સબ્સ્ક્રિપ્શન મળ્યું હતું.

મમતા મશીનરી શું કરે છે?

મમતા મશીનરી લિમિટેડની સ્થાપના 1979માં થઈ હતી. કંપની પ્લાસ્ટિકની થેલીઓ, પાઉચ, પેકેજિંગ અને એક્સટ્રુઝન ઇક્વિપમેન્ટ મશીનોનું ઉત્પાદન અને નિકાસ કરે છે. એફએમસીજી, ફૂડ અને બેવરેજ કંપનીઓ મમતા મશીનરીની ક્લાયન્ટ છે. 31 મે, 2024 સુધી કંપનીએ તેના મશીનોની 75 દેશોમાં નિકાસ કરી છે. નાણાકીય વર્ષ 2022-23માં કંપનીની આવક 210 કરોડ રૂપિયા હતી અને નેટ પ્રોફિટ 22.51 કરોડ રૂપિયા હતો. જ્યારે 2023-24માં આવક 241.31 કરોડ રૂપિયા હતી અને કંપનીને 36.13 કરોડ રૂપિયાનો નફો થયો હતો.