Modi Govt To Tesla: બજાર ભારતનું અને રોજગાર ચીનને, મોદી સરકારની નથી આ નીતિ, કેંદ્ર સરકારનો ટેસ્લાના એલન મસ્કને જવાબ

રાજ્યકક્ષાના મંત્રી કૃષ્ણપાલ ગુર્જરે લોકસભામાં પ્રશ્નકાળ દરમિયાન કહ્યું કે એવું ન બને કે બજાર ભારતમાં હોય પરંતુ ચીનમાં નોકરીની તકો ઊભી થઈ શકે

Modi Government On Tesla: મોદી સરકાર અમેરિકન ઇલેક્ટ્રિક વાહન કંપની ટેસ્લાને સરકારી છૂટ આપવાના મૂડમાં નથી. ભારે ઉદ્યોગ મંત્રાલયના રાજ્યકક્ષાના મંત્રી કૃષ્ણપાલ ગુર્જરે લોકસભામાં પ્રશ્નકાળ દરમિયાન કહ્યું કે એવું ન બને કે બજાર ભારતમાં હોય પરંતુ ચીનમાં નોકરીની તકો ઊભી થઈ શકે. તેમણે ગૃહને જણાવ્યું કે સરકારની નીતિઓ હેઠળની યોજનાઓ માટે ટેસ્લા તરફથી હજુ સુધી કોઈ અરજી આવી નથી.

હકીકતમાં, ગયા વર્ષે, ટેસ્લાના એલન મસ્કે સરકાર પાસે ઇલેક્ટ્રિક વાહનો પરની આયાત ડ્યુટી ઘટાડવાની માંગ કરી હતી. પરંતુ ભારે ઉદ્યોગ મંત્રાલયે કહ્યું હતું કે ટેસ્લા ભારતમાં ઇલેક્ટ્રિકલ વાહનોનું ઉત્પાદન કરે તે પછી જ સરકાર કોઈપણ ટેક્સ મુક્તિ પર વિચાર કરશે. કૃષ્ણ પાલ ગુર્જરે જણાવ્યું હતું કે સરકાર ઓટોમોબાઈલ અને ઓટો કમ્પોનન્ટ્સ અને એડવાન્સ કેમેસ્ટ્રી સેલ બેટરી માટે PLI ( Production Linked Incentives) સ્કીમ લાવી છે. આ યોજના સ્થાનિક તેમજ વિદેશી કંપનીઓને લાગુ પડે છે.

કૃષ્ણ પાલ ગુર્જર કોંગ્રેસના સાંસદ કે સુરેશના પ્રશ્નનો જવાબ આપી રહ્યા હતા. કે સુરેશે પૂછ્યું હતું કે શું સરકાર ટેસ્લાને ભારતીય બજારમાં પ્રવેશવા માટે આમંત્રણ આપશે અને તે દેશમાં ઇલેક્ટ્રિક વાહનોના ઉત્પાદન માટે શું કરી રહી છે. ક્રિષ્ના પાલ ગુર્જરે કહ્યું કે મોદી સરકારમાં એવું ન થઈ શકે કે ચીનને રોજગાર અને ભારતમાં માર્કેટ. મોદી સરકારની નીતિ છે કે બજાર ભારતનું હશે તો ભારતના લોકોને પણ રોજગારી મળશે.

કૃષ્ણપાલ ગુર્જર કેટલાક રાજ્યો તરફથી ટેસ્લાને આમંત્રણ અને કંપની દ્વારા માંગવામાં આવેલી કર મુક્તિ સંબંધિત પ્રશ્નોના જવાબ આપી રહ્યા હતા. ગયા મહિને, એલોન મસ્કએ કહ્યું હતું કે ટેસ્લા ભારતમાં તેની પ્રોડક્ટ્સ લોન્ચ કરવા માટે તમામ પગલાં લઈ રહી છે.