વાર્ષિક માત્ર ₹20 માં ₹2 લાખનું વીમા કવચ: ગુજરાતમાં 2.01 કરોડ લોકોએ લાભ લીધો, અરજી કરવાની પ્રોસેસ સાવ સહેલી

PMSBY: આકસ્મિક મૃત્યુ કે અપંગતા માટે ₹2 લાખનું સુરક્ષા કવચ, 18 થી 70 વર્ષના બેંક ખાતેદારોને મળશે લાભ.

વાર્ષિક માત્ર ₹20 માં ₹2 લાખનું વીમા કવચ

Source : freepik

Pradhan Mantri Suraksha Bima Yojana Gujarat: ગુજરાતમાં ‘જન સુરક્ષા સંતૃપ્તિ અભિયાન’ હેઠળ ‘પ્રધાનમંત્રી સુરક્ષા વીમા યોજના (PMSBY)’ ને જબરદસ્ત સફળતા મળી છે. તાજેતરના આંકડા મુજબ, 27 ઓગસ્ટ, 2025 સુધીમાં રાજ્યમાં 2.01 કરોડથી વધુ લોકો આ યોજનામાં જોડાઈ ચૂક્યા છે. આ યોજના હેઠળ વાર્ષિક માત્ર ₹20 ના નજીવા પ્રીમિયમ પર અકસ્માતથી થતા મૃત્યુ અથવા અપંગતાના કિસ્સામાં ₹2 લાખ સુધીનું વીમા કવરેજ મળે છે. આ અભિયાનનો મુખ્ય ઉદ્દેશ્ય સમાજના છેવાડાના અને અસંગઠિત ક્ષેત્રના કામદારોને આર્થિક સુરક્ષા પ્રદાન કરવાનો છે.

ગુજરાતમાં જન સુરક્ષા અભિયાનની સફળતા

વડાપ્રધાન શ્રી નરેન્દ્ર મોદીના નેતૃત્વ હેઠળ શરૂ થયેલી વિવિધ સામાજિક સુરક્ષા યોજનાઓને ગુજરાતમાં મુખ્યમંત્રી શ્રી ભૂપેન્દ્ર પટેલના નેતૃત્વમાં વ્યાપક પ્રતિસાદ મળ્યો છે. ખાસ કરીને ‘જન સુરક્ષા સંતૃપ્તિ અભિયાન’ અંતર્ગત પ્રધાનમંત્રી સુરક્ષા વીમા યોજના (PMSBY) માં ગુજરાતે રેકોર્ડ બનાવ્યો છે. અત્યાર સુધીમાં 2.01 કરોડથી વધુ લાભાર્થીઓ આ યોજના સાથે જોડાઈને પોતાના અને પોતાના પરિવાર માટે આર્થિક સુરક્ષા સુનિશ્ચિત કરી છે. આ યોજના ઓછી આવક ધરાવતા લોકો માટે આશીર્વાદરૂપ સાબિત થઈ રહી છે.

યોજનાના મુખ્ય ઉદ્દેશ્યો અને લાભ

પ્રધાનમંત્રી સુરક્ષા વીમા યોજના એ કેન્દ્ર સરકારની એક મહત્ત્વપૂર્ણ યોજના છે, જેનો લાભ 18 થી 70 વર્ષની વયજૂથના અને બેંકમાં બચત ખાતું ધરાવતા કોઈ પણ ખાતેદાર લઈ શકે છે. આ યોજના વાર્ષિક માત્ર ₹20 ના પ્રીમિયમ પર નીચે મુજબના વીમા કવરેજ પૂરા પાડે છે:

• આકસ્મિક મૃત્યુ: ₹2 લાખનું વીમા કવચ.
• સંપૂર્ણ કાયમી અપંગતા: ₹2 લાખનું વીમા કવચ.
• આંશિક કાયમી અપંગતા: ₹1 લાખનું વીમા કવચ.

આ યોજનાનો મુખ્ય ઉદ્દેશ્ય અસંગઠિત ક્ષેત્રના કામદારો અને ગરીબ પરિવારોને આર્થિક મુશ્કેલીઓથી બચાવવાનો છે, જેઓ કોઈ દુર્ઘટનાનો ભોગ બને છે.

રાજ્યમાં અભિયાનનું અમલીકરણ

કેન્દ્ર સરકાર દ્વારા 1 જુલાઈ થી 30 સપ્ટેમ્બર, 2025 સુધી ચલાવવામાં આવી રહેલા ‘જન સુરક્ષા સંતૃપ્તિ અભિયાન’ ને ગુજરાતમાં સફળ બનાવવા માટે 14,610 ગ્રામ પંચાયતો અને શહેરી સંસ્થાઓમાં તેનો વ્યાપક પ્રચાર કરવામાં આવી રહ્યો છે. મુખ્યમંત્રી શ્રી ભૂપેન્દ્ર પટેલે તાજેતરમાં ગ્રામ કોમ્પ્યુટર સાહસિક (VCE) ને આ અભિયાનમાં મદદ કરવાની જવાબદારી સોંપી છે, જેનાથી છેવાડાના નાગરિકોને ઘરઆંગણે આ યોજનાઓનો લાભ મળી શકે. આ અભિયાન હેઠળ બેંક ખાતા ખોલાવવા, KYC અપડેટ કરવા અને વારસદારોની નોંધણી કરાવવા જેવી સેવાઓ પણ પૂરી પાડવામાં આવે છે.

આ યોજના અને અન્ય સંબંધિત માહિતી માટે, નાગરિકો નજીકની બેંક શાખા, બેંક મિત્ર અથવા VCE નો સંપર્ક કરી શકે છે. વધુમાં, jansuraksha.gov.in વેબસાઇટ અને હેલ્પલાઇન નંબર 1800-110-001 નો પણ ઉપયોગ કરી શકાય છે.