કોંગ્રેસની હાર, AAPનો ઉદય! ગુજરાતમાં બદલાશે રાજકીય સમીકરણો? ગઠબંધન મુદ્દે ઈસુદાન ગઢવીનું મોટું નિવેદન
ગુજરાતની જનતા માટે AAP મજબૂત પક્ષ: વિસાવદરમાં ગોપાલ ઇટાલિયાનો વિજય નિશ્ચિત, ભાજપને ૨૦ હજાર મતથી હરાવશે - ઈસુદાન ગઢવી.
AAP vs BJP Gujarat: આમ આદમી પાર્ટી (AAP) ગુજરાતના પ્રદેશ અધ્યક્ષ ઈસુદાન ગઢવીએ રાજ્યમાં પાર્ટીની મજબૂતાઈ અને આગામી ચૂંટણી રણનીતિ અંગે મહત્વપૂર્ણ નિવેદનો આપ્યા છે. તેમણે ખાસ કરીને વિસાવદર બેઠક પર આમ આદમી પાર્ટીના ઉમેદવાર ગોપાલ ઇટાલિયાના વિજયનો વિશ્વાસ વ્યક્ત કર્યો છે અને ભાજપ પર આકરા પ્રહારો કર્યા છે.
ઈસુદાન ગઢવીએ જણાવ્યું હતું કે ગુજરાતની જનતા માટે લડનારી સૌથી મજબૂત પાર્ટી આમ આદમી પાર્ટી છે. તેમણે દાવો કર્યો કે વિસાવદર વિધાનસભા બેઠક માટે ત્રણેય પાર્ટીઓમાં સૌથી મજબૂત ઉમેદવાર ગોપાલ ઇટાલિયા છે. ભાજપે વિસાવદર માટે ઉમેદવાર જાહેર કર્યા બાદ ત્યાં 'સોંપો' પડી ગયો હોવાનું પણ તેમણે જણાવ્યું હતું. ઈસુદાન ગઢવીએ સ્પષ્ટતા કરી કે આમ આદમી પાર્ટી વિસાવદરમાં મજબૂતાઈથી ચૂંટણી લડશે અને ભાજપને પરાજય આપશે.
ગઠબંધનના મામલે તેમણે કહ્યું હતું કે ગઠબંધન અંગેનો નિર્ણય ભલે કોંગ્રેસનો હોઈ શકે, પરંતુ વિસાવદરમાં જનતાએ નક્કી કર્યું છે કે આમ આદમી પાર્ટીના ઉમેદવાર જ જીતશે. તેમણે પાછળની ચૂંટણીઓમાં કોંગ્રેસને માત્ર ૧૨-૧૪ હજાર જ મત મળ્યા હોવાનું યાદ અપાવ્યું હતું. ૨૦૨૨ની ચૂંટણીમાં આમ આદમી પાર્ટીને ગઠબંધનમાં ૧૪ ટકા મત મળ્યા હતા અને આદિવાસી વિસ્તારમાં તો ૨૫ ટકા મત મેળવ્યા હતા તેમ પણ તેમણે જણાવ્યું હતું.
ઈસુદાન ગઢવીએ ભારપૂર્વક કહ્યું કે ગુજરાતમાં ત્રીજો પક્ષ નહીં ચાલે એવી વાત હવે કરવાનો કોઈ અર્થ રહેતો નથી, કારણ કે આમ આદમી પાર્ટીએ પોતાને સ્થાપિત કરી દીધી છે. તેમણે કોંગ્રેસ અંગે કહ્યું કે કોંગ્રેસ અગાઉ પણ ચૂંટણીઓ લડી, પરંતુ જીત મેળવી શકી નહીં.
હરિયાણાના રાજકારણ અંગેના પ્રશ્ન પર ઈસુદાન ગઢવીએ કહ્યું કે કોંગ્રેસના નેતાઓને વિદિત થાય કે આમ આદમી પાર્ટીના નેતા રાઘવ ચઢ્ઢા ૫ સીટ પર તૈયાર થયા હતા. જોકે, આ વાત જૂની હોવાથી તે અંગે વધુ કંઈ કહેવાનું તેમણે ટાળ્યું હતું.
વિસાવદરની આજની સ્થિતિ અંગે વાત કરતા તેમણે વિશ્વાસ વ્યક્ત કર્યો કે વિસાવદરમાં જનતા ભાજપને હરાવવા માટે તૈયાર છે અને ભાજપને ૨૦ હજાર મતથી હરાવશે. તેમણે કહ્યું કે ભાજપ બધા પ્રકારના ખેલ કરશે, પરંતુ આ વખતે તેમના માટે વિસાવદરમાં જીત મેળવવી મુશ્કેલ બનશે.
લોકસભા ચૂંટણીમાં ઉમેદવારોની જાહેરાત અંગે તેમણે કહ્યું કે અમે પણ કેટલીક બેઠકો જતી કરી હતી. પાર્ટીમાં કાર્યકર્તાઓ આવતા પણ હોય અને જતા પણ હોય તે સામાન્ય પ્રક્રિયા હોવાનું પણ તેમણે જણાવ્યું હતું. આમ આદમી પાર્ટીના સંગઠન અંગે તેમણે માહિતી આપી કે ગુજરાતમાં તેમની ૪૫૦ ટીમો બની ગઈ છે અને ૧૦૦૦ બુથ પર કાર્યકર્તાઓ સક્રિય થઈ ગયા છે.
કોંગ્રેસના નેતાઓને લઈને રાહુલ ગાંધીએ જે વાત કરી છે તે અંગે મારે કંઈ કહેવું નથી તેમ કહીને ઈસુદાન ગઢવીએ આ મુદ્દે ટિપ્પણી કરવાનું ટાળ્યું હતું. ઈસુદાન ગઢવીના આ નિવેદનોથી સ્પષ્ટ થાય છે કે આમ આદમી પાર્ટી ગુજરાતમાં પોતાની સ્થિતિ મજબૂત માની રહી છે અને આગામી ચૂંટણીઓમાં ભાજપને સીધી ટક્કર આપવા માટે તૈયાર છે.
ટોપ સ્ટોરી
ટ્રેન્ડિંગ સમાચાર
