ગુજરાતમાં LRD ભરતીમાં લાખો ઉમેદવારોને મોટી રાહત, બોર્ડના પ્રમુખે શું કરી મોટી જાહેરાત ?

આ વર્ષે નવા રચાયેલા LRD ભરતી બોર્ડના અધ્યક્ષ હસમુખ પટેલે ઉમેદવારી ફોર્મ ભરવાના એક દિવસ અગાઉ સોમવારે ટ્વિટરના માધ્યમથી સ્પષ્ટતા કરી હતી

LRD

અમદાવાદઃ રાજ્યના પોલીસતંત્રમાં લોક રક્ષક દળ (LRD)માં 10,988 જગ્યાની ભરતી માટે ફોર્મ ભરવાનો આજે મંગળવારે છેલ્લ દિવસ છે ત્યારે લોક રક્ષક દળ ભરતી બોર્ડના પ્રમુખ આઈપીએસ અધિકારી હસમુખ પટેલે મોટી જાહેરાત કરી છે.

આ વર્ષે નવા રચાયેલા LRD ભરતી બોર્ડના અધ્યક્ષ હસમુખ પટેલે ઉમેદવારી ફોર્મ ભરવાના એક દિવસ અગાઉ સોમવારે ટ્વિટરના માધ્યમથી સ્પષ્ટતા કરી હતી કે, લોક રક્ષક દળ (LRD)માં ફોર્મ ભરવા માટે કમ્પ્યુટર સર્ટિફિકેટની હાલ જરૂર નથી. હસમુખ પટેલની આ સ્પષ્ટતાના કારણે લાખો ઉમેદવારોને મોટી રાહત થઈ છે.

લોક રક્ષક ભરતી ની અરજી કરવા માટે ઉમેદવાર પાસે હાલ કોમ્પ્યુટર સર્ટિફિકેટની જરૂર નથી દસ્તાવેજ ચકાસણી વખતે કોમ્પ્યુટર સર્ટિફિકેટ રજુ કરવાનું રહેશે.#LRD_ભરતી

— Hasmukh Patel (@Hasmukhpatelips) November 8, 2021

લોક રક્ષક દળ ભરતી બોર્ડના પ્રમુખ આઈપીએસ અધિકારી હસમુખ પટેલે સ્પષ્ટતા કરી કે, આ સર્ટિફિકેટ ભરતી પ્રક્રિયાના અંતિમ તબક્કે પસંદગી પામેલા ઉમેદવારને દસ્તાવેજ ચકાસણી દરમિયાન રજૂ કરવાનું હોય છે તેથી લોક રક્ષક દળ (LRD)માં ફોર્મ ભરવા માટે કમ્પ્યુટર સર્ટિફિકેટની હાલ જરૂર નથી. પોલીસમાં વર્ગ- 3માં ત્રણ સંવર્ગોમાં પાંચ વર્ષ માટે રૂપિયા 19,  950ના ફિક્સ પગારે જાહેર થયેલી LRD ભરતીમાં 9 નવેમ્બર ને લાભ પાંચમની રાતે 11-59 કલાક સુધી ઉમેદવારી ફોર્મ ભરી શકાશે.

નવા રચાયેલા LRD ભરતી બોર્ડના અધ્યક્ષ હસમુખ પટેલે સોમવારે સાંજે ટ્વિટર દ્વારા માહિતી આપી હતી કે, અત્યાર સુધીમાં 11,13, 251 ઉમેદવારી ફોર્મ ભરાયાં છે.

આ પૈકી 8,68,422 ફોર્મ કન્ફર્મ થયાં છે. હસમુખ પટેલે આપેલી માહિતી પ્રમાણે કન્ફ્રર્મ થયેલાં ફોર્મમાં 6,35,008 પુરુષ ઉમેદવારો અને 2,33, 414 મહિલા ઉમેદવારનાં ફોર્મ છે. ફોર્મ ભરવા માટે મંગળવાર ને લાભ પાંચમે છેલ્લો દિવસ છે એવી માહિતી પણ હસમુખ પટેલે આપી છે. રાજ્યમાં ચાર વર્ષ પછી થઈ રહેલી આ ભરતી માટે આગામી ડિસેમ્બરથી શારીરિક કસોટી યોજાશે એવી જાહેરાત અગાઉ કરાઈ હતી.

રાજ્ય સરકારે કરેલ જાહેરાત પ્રમાણે રાજ્યના પોલીસતંત્રમાં લોક રક્ષક દળમાં જે 10,988 જગ્યાની ભરતી થશે તેમાં બિનહથિયારધારી કોન્સ્ટેબલની 5,212 જગા છે જ્યારે  હથિયારધારી કોન્સ્ટેબલની 797 જગા છે. આ ઉપરાંત એસઆરપી કોન્સ્ટેબલની 4,450 જગ્યા માટે ભરતી થશે. આ પૈકી  એસઆરપી સિવાયની બંને કેટેગરીમાં મળીને મહિલાઓ માટે 1983 જગ્યા અનામત રખાઇ છે.