અમરેલી-ગીર સોમનાથમાં ધોધમાર વરસાદ: ગુજરાતમાં આ તારીખે થશે ચોમાસાની એન્ટ્રી, આજે યલો એલર્ટ

Gujarat monsoon entry 2026: દક્ષિણ ગુજરાત અને સૌરાષ્ટ્રમાં આજે ભારે વરસાદની આગાહી; અમરેલી, ગીર સોમનાથ અને વલસાડમાં મેઘમહેર થતા ખેડૂતોમાં ખુશી; દરિયામાં કરંટ હોવાથી માછીમારોને દરિયો ન ખેડવા સૂચના.

heavy rain amreli gir somnath gujarat monsoon arrival yellow alert

Source : ai

Show Quick Read

Key points generated by AI, verified by newsroom

• ગુજરાતમાં 26 જૂન આસપાસ ચોમાસાની સત્તાવાર એન્ટ્રી અપેક્ષિત છે.
• દક્ષિણ ગુજરાત, સૌરાષ્ટ્રમાં પ્રિ-મોન્સૂન વરસાદ સક્રિય; યલો એલર્ટ જાહેર.
• અમરેલી, ગીર સોમનાથ, વલસાડમાં ભારે વરસાદથી ખેડૂતોમાં ખુશી.

Gujarat monsoon entry 2026: દેશભરમાં હવે ચોમાસું ધીમે ધીમે જમાવટ કરી રહ્યું છે અને ગુજરાતમાં પણ આગામી 2 દિવસમાં એટલે કે 26 જૂન આસપાસ મેઘરાજા સત્તાવાર રીતે એન્ટ્રી મારી દેશે. જોકે, ચોમાસું બેસે તે પહેલાં જ દક્ષિણ ગુજરાત અને સૌરાષ્ટ્રમાં પ્રિ-મોન્સૂન એક્ટિવિટીના ભાગરૂપે વરસાદી માહોલ જામી ગયો છે. હાલ અમરેલી, ગીર સોમનાથ અને વલસાડમાં ધોધમાર વરસાદ વરસી રહ્યો છે. હવામાન વિભાગે આજે (23 જૂન) દક્ષિણ ગુજરાત અને સૌરાષ્ટ્રના કેટલાક જિલ્લાઓમાં ભારે વરસાદની આગાહી સાથે યલો એલર્ટ જાહેર કર્યું છે. તો બીજી તરફ દરિયામાં ઊંચા મોજાં ઉછળવાની અને પવનની ગતિ વધવાની શક્યતા હોવાથી માછીમારોને પણ સાવચેત કરી દેવાયા છે.

મહારાષ્ટ્ર, તેલંગાણા અને બિહારમાં ધમાકેદાર બેટિંગ કર્યા બાદ મુંબઈ પહોંચેલું ચોમાસું હવે ગુજરાત તરફ તેજ ગતિએ આગળ વધી રહ્યું છે. સાયક્લોનિક સર્ક્યુલેશન સક્રિય થવાથી વરસાદી ગતિવિધિઓ વધી છે. આજે સવારે 6 થી 12 વાગ્યા સુધીમાં જ રાજ્યના 9 તાલુકામાં વરસાદ નોંધાઈ ચૂક્યો છે, જેમાં સૌથી વધુ વરસાદ વલસાડમાં પડ્યો છે. હવામાન વિભાગના જણાવ્યા પ્રમાણે, આજે અમરેલી, ભાવનગર, સુરત, નવસારી, ડાંગ, વલસાડ, દમણ અને દાદરા નગર હવેલીમાં ભારે વરસાદ પડી શકે છે, જેના પગલે ત્યાં યલો એલર્ટ અપાયું છે. જ્યારે મધ્ય અને ઉત્તર ગુજરાતમાં 40 થી 50 કિલોમીટર પ્રતિ કલાકની ઝડપે પવન ફૂંકાવા સાથે છૂટાછવાયા ઝાપટાં પડી શકે છે. હાલ રાજ્યનું તાપમાન 38 થી 40 ડિગ્રી સેલ્સિયસ આસપાસ છે, પણ વરસાદી માહોલના કારણે ગરમીથી લોકોને મોટી રાહત મળશે.

સૌરાષ્ટ્રની વાત કરીએ તો, અમરેલી જિલ્લામાં છેલ્લા 4 દિવસથી સારો એવો વરસાદ પડી રહ્યો છે. આજે જાફરાબાદ તાલુકાના ટીંબી, હેમાળ, માણસા અને ખાંભા તાલુકાના ડેડાણ, શ્યામગઢ સહિતના ગામોમાં વરસાદ પડતાં વાતાવરણમાં સારી એવી ઠંડક પ્રસરી ગઈ છે. આ ઉપરાંત, બપોર પછી ગીર સોમનાથ જિલ્લામાં પણ વાતાવરણ પલટાયું છે અને છેલ્લા 1 કલાકથી સાંબેલાધાર વરસાદ વરસી રહ્યો છે. ઊના અને ગીર ગઢડા પંથકના બેડીયા, મોતીસર, સનખડા સહિતના અનેક ગામોમાં ધોધમાર વરસાદથી રસ્તાઓ પર પાણી ફરી વળ્યાં છે. લાંબા વિરામ પછી આવો સારો વરસાદ જોતા ખેડૂતોના ચહેરા પર ખુશી જોવા મળી રહી છે અને વાવણીના કામને વેગ મળશે તેવી આશા છે.

આ પણ વાંચોઃ ગુજરાતમાં આગામી 3 કલાક ભારે! અમદાવાદ-ગાંધીનગર સહિત 24 જિલ્લામાં વરસાદની આગાહી

બીજી તરફ, દક્ષિણ ગુજરાતમાં પણ મેઘરાજા મન મૂકીને વરસી રહ્યા છે. વલસાડમાં છેલ્લા 3 દિવસથી વાદળછાયું વાતાવરણ હતું, પણ આજે વહેલી સવારે 4 થી 6 વાગ્યાના માત્ર 2 કલાકમાં જ ઉમરગામ પંથકમાં 17 mm જેટલો વરસાદ ખાબકી ગયો છે. તો નવસારી જિલ્લાના જલાલપોર પંથકમાં પણ તોફાની પવન સાથે 1.25 ઇંચ કરતાં વધારે વરસાદ પડ્યો છે. એકંદરે, ગુજરાતમાં ખેડૂતો માટે સારા સમાચાર છે અને ગમે ત્યારે ચોમાસાની વિધિવત શરૂઆત થઈ જશે.

આ પણ વાંચોઃ સુરતમાં ધોધમાર વરસાદથી જળબંબાકાર: મનપાની પ્રિ-મોનસૂન કામગીરીની પોલ ખૂલી, લોકો પરેશાન