ભાજપમાં 'ભૂકંપ': પોતાની જ પાર્ટી વિરુદ્ધ મેદાને પડ્યા મનસુખ વસાવા, ટિકિટ ફાળવણીના નિયમો સામે ઉઠાવ્યા સવાલ

3 ટર્મના નિયમથી પાર્ટીને જ ભયંકર નુકસાન થશે અને સિનિયર કાર્યકરો નારાજ થશે તેવી સાંસદે વ્યક્ત કરી આશંકા; બીજી તરફ આજે સાંજ સુધીમાં ભાજપ ઉમેદવારોની પ્રથમ યાદી જાહેર કરી શકે છે.

mansukh vasava questions bjp ticket allocation gujarat elections 2026

Source : FB @mansukh vasava

Show Quick Read

Key points generated by AI, verified by newsroom

• સ્થાનિક ચૂંટણી: ટિકિટ નિયમો પર ભાજપમાં આંતરિક વિવાદ.
• મનસુખ વસાવા: ત્રણ ટર્મ નિયમ સામે જાહેરમાં બળવો.
• ૩ ટર્મ નિયમ: અનુભવી નેતાઓ નિષ્ક્રિય, પક્ષને નુકસાન.
• ભાજપ આજે ઉમેદવારોની પ્રથમ યાદી જાહેર કરી શકે.

Gujarat Local Body Elections 2026: ગુજરાતમાં આગામી સ્થાનિક સ્વરાજ્યની ચૂંટણીઓને લઈને રાજકીય ગરમાવો જોવા મળી રહ્યો છે, ત્યારે ભારતીય જનતા પાર્ટીની અંદર જ ટિકિટ ફાળવણીના નવા નિયમોને લઈને મોટો આંતરિક વિવાદ સપાટી પર આવ્યો છે. પ્રદેશ ભાજપના નેતૃત્વ અને ચૂંટણી સમિતિના નિર્ણયો સામે પહેલીવાર ભાજપના જ વરિષ્ઠ સાંસદ મનસુખ વસાવાએ જાહેરમાં બળવો પોકાર્યો છે. વસાવાએ આશંકા વ્યક્ત કરી છે કે પાર્ટીએ બનાવેલા આ નવા નિયમોના કારણે ભાજપ જ ભાજપને હરાવશે. આ આંતરિક નારાજગી વચ્ચે, એવી પણ શક્યતા છે કે ભાજપ આજે સાંજ સુધીમાં પોતાના ઉમેદવારોની પ્રથમ યાદી જાહેર કરી દેશે.

સાંસદ મનસુખ વસાવાએ (Mansukh Vasava) ખાસ કરીને એ નિયમ સામે ભારે આક્રોશ વ્યક્ત કર્યો છે, જેમાં 3 ટર્મ કે તેથી વધુ વખત ચૂંટણી લડેલા ઉમેદવારોને ટિકિટ ન આપવાની વાત છે. તેમણે સીધો જ સવાલ ઉઠાવ્યો છે કે જ્યારે લોકસભા અને વિધાનસભાની ચૂંટણીઓમાં આવા કોઈ જ નિયમો નથી હોતા, તો પછી માત્ર સ્થાનિક સ્વરાજ્યની ચૂંટણીઓમાં જ આ નિયમ શા માટે થોપી બેસાડવામાં આવ્યો? વસાવાએ સ્પષ્ટપણે કહ્યું છે કે પાર્ટીમાં આ પ્રકારના નિયમો બિલકુલ ન હોવા જોઈએ.

તેમનું માનવું છે કે જો 3 ટર્મ સુધી ચૂંટણી લડનારા અને જીતનારા અનુભવી નેતાઓને ટિકિટ નહીં અપાય, તો તેઓ નિષ્ક્રિય થઈ જશે, જેના પરિણામે પાર્ટીને ભયંકર નુકસાન વેઠવાનો વારો આવશે. વસાવાએ એવો પણ દાવો કર્યો છે કે ટિકિટ ફાળવણીના આ નવા અને કડક નિયમોને કારણે માત્ર કોઈ એક જ વિસ્તારમાં નહીં, પરંતુ સમગ્ર ગુજરાતભરમાં પાર્ટીના સિનિયર અને પાયાના કાર્યકરોમાં ભારે નિરાશા અને નારાજગી ફેલાઈ ગઈ છે.

એક તરફ ટિકિટના નિયમોને લઈને પાર્ટીના દિગ્ગજો નારાજ છે, ત્યારે બીજી તરફ ઉમેદવારોની જાહેરાતને લઈને મોટા સમાચાર સામે આવ્યા છે. ભાજપ આજે સાંજે જ ઉમેદવારોની પોતાની પ્રથમ યાદી જાહેર કરી શકે છે. સૂત્રોના જણાવ્યા અનુસાર, દક્ષિણ ગુજરાત અને ઉત્તર ગુજરાતના ઉમેદવારોના નામો પર ચર્ચા પૂર્ણ થઈ ચૂકી છે. આથી, પહેલી યાદીમાં આ બંને ઝોનના ઉમેદવારોના નામ હોવાની પ્રબળ શક્યતા છે. આ અંગે પ્રદેશ કક્ષાએથી ટૂંક સમયમાં જ જિલ્લાઓને ઉમેદવારોના નામની સત્તાવાર જાણ કરવામાં આવશે.

આ પણ વાંચો

ગોપાલ ઇટાલિયાની મુશ્કેલી વધી, મહેસાણા કોર્ટે કાઢ્યું બિનજામીનપાત્ર વોરંટ