ગુજરાત કોંગ્રેસમાં 'પત્રિકા કાંડ': કાર્યાલયમાં પત્રિકા વિતરણથી ખળભળાટ, ભાજપ સાથે 'સેટિંગ'ના આરોપ, બે નેતાઓના નામ ઉછળ્યા
Gujarat Congress: હિંમતસિંહ પટેલ અને શૈલેષ પરમાર સામે ગંભીર આરોપો, સસ્પેન્ડ કરવાની માંગણી, હિંમતસિંહ પટેલે ષડયંત્ર ગણાવ્યું.
Patrika Kand Gujarat Congress: તાજેતરમાં ભારતીય જનતા પાર્ટીમાં પત્રિકા વિતરણનો મામલો ચર્ચામાં રહ્યા બાદ હવે ગુજરાત કોંગ્રેસમાં પણ આંતરિક વિખવાદ સપાટી પર આવ્યો છે. પ્રદેશ કોંગ્રેસ કાર્યાલય ખાતે કેટલાક લોકો દ્વારા પત્રિકાઓનું વિતરણ કરવામાં આવ્યું હતું, જેમાં પાર્ટીના કેટલાક નેતાઓ પર ગંભીર આરોપો લગાવવામાં આવ્યા છે અને ભાજપ સાથે 'સેટિંગ' કર્યાનો સીધો ઉલ્લેખ કરવામાં આવ્યો છે. આ ઘટનાને કારણે કોંગ્રેસના આંતરિક રાજકારણમાં ભારે ખળભળાટ મચી ગયો છે.
કોંગ્રેસ કાર્યાલય ખાતે વેચાયેલી આ પત્રિકાઓમાં ભાજપ સાથે 'સેટિંગ' કરતા નેતાઓના નામનો ઉલ્લેખ કરવામાં આવ્યો છે. ખાસ કરીને, પત્રિકામાં કોંગ્રેસના બે અગ્રણી નેતાઓ, હિંમતસિંહ પટેલ અને શૈલેષ પરમારના નામ સામે ગંભીર આરોપો લગાવવામાં આવ્યા છે.
પત્રિકામાં આ નેતાઓ પર કોંગ્રેસ કાર્યાલય પર થયેલા પથ્થરમારાની ઘટનામાં ભાજપ સાથે 'સેટિંગ' કર્યું હોવાનો ચોંકાવનારો ઉલ્લેખ છે. આ ઉપરાંત, પોલીસ ફરિયાદમાં પણ ભાજપ સાથે 'સેટિંગ' કર્યાનો આરોપ આ બંને નેતાઓ પર લગાવવામાં આવ્યો હોવાનું પત્રિકામાં જણાવવામાં આવ્યું છે. આ ગંભીર આરોપો બાદ પત્રિકામાં હિંમતસિંહ પટેલ અને શૈલેષ પરમારને તાત્કાલિક પક્ષમાંથી સસ્પેન્ડ કરવાની માંગણી કરવામાં આવી છે.
આ પત્રિકા કાંડ બાદ જેમના નામ ઉછળ્યા છે તેવા કોંગ્રેસના નેતા હિંમતસિંહ પટેલે તમામ આરોપોને પાયાવિહોણા ગણાવી ફગાવી દીધા છે. તેમણે આ ઘટનાને કેટલાક 'બની બેઠેલા નેતાઓ'નું ષડયંત્ર ગણાવ્યું છે. હિંમતસિંહ પટેલે જણાવ્યું કે, આ ખોટી પત્રિકા વાયરલ કરીને કોંગ્રેસ પાર્ટીને બદનામ કરવાનું એક મોટું ષડયંત્ર છે.
મહત્વપૂર્ણ છે કે, પ્રદેશ કોંગ્રેસ કાર્યાલયમાં બી.કે. હરિપ્રસાદની આગેવાનીમાં એક બેઠક મળી હતી, તે દરમિયાન અથવા તે આસપાસના સમયગાળામાં આ પત્રિકા વિતરણનો મામલો બન્યો હતો. આંતરિક વિખવાદ અને નેતાઓ સામેના આરોપોને લઈને કોંગ્રેસના કાર્યકર્તાઓએ નિરીક્ષકો સામે પણ પોતાનો રોષ ઠાલવ્યો હોવાનું જાણવા મળ્યું છે.
ભાજપ બાદ હવે કોંગ્રેસમાં પણ સામે આવેલા આ 'પત્રિકા કાંડ' એ દર્શાવે છે કે બંને મુખ્ય પક્ષોમાં આંતરિક જૂથબંધી અને ખેંચતાણ ચાલી રહી છે. કોંગ્રેસમાં હિંમતસિંહ પટેલ અને શૈલેષ પરમાર જેવા નેતાઓ સામે સીધા અને ગંભીર આરોપો લાગવા અને તેમને સસ્પેન્ડ કરવાની માંગ ઉઠવી એ પક્ષ માટે એક મોટો પડકાર છે.
ટોપ સ્ટોરી
ટ્રેન્ડિંગ સમાચાર
