Mahisagar: ઈઝરાયલ યુદ્ધ કે ભારત-પાકિસ્તાનની મેચને લઈને કોઈ ઉશ્કેરણીજનક પોસ્ટ કરતા પહેલા સો વખત વિચારજો, પોલીસે આપી વોર્નિંગ

મહીસાગર: વર્તમાન સમયમાં ઈઝરાયલ અને હમાસ વચ્ચે ભીષણ યુદ્ધ ચાલી રહ્યું છે. જેને લઈને સોશિયલ મીડિયા પર તેને લગતા અનેક વીડિયો અને ફોટાઓ શેર કરવામાં આવી રહ્યા છે.

પ્રતિકાત્મક તસવીર ( Image Source :AP )

મહીસાગર: વર્તમાન સમયમાં ઈઝરાયલ અને હમાસ વચ્ચે ભીષણ યુદ્ધ ચાલી રહ્યું છે. જેને લઈને સોશિયલ મીડિયા પર તેને લગતા અનેક વીડિયો અને ફોટાઓ શેર કરવામાં આવી રહ્યા છે. જો કે, ફોટાઓમાં ઘણા ઉશ્કેરણીજનક તો કેટલાક ફેક પણ ફોટા અને માહિતી શેર કરવામાં આવી રહી છે. જેને લઈને પોલીસ અને પ્રશાસન તેના પર ચાપતી નજર રાખી રહ્યું છે. જેથી કોઈ માહોલ ખરાબ ન થાય.

હવે આવી જ ઉશ્કેરણીજનક સામગ્રી પોસ્ટ કરવા બદલ ગુજરાતમાં પણ કાર્યવાહી કરવામાં આવશે. મહીસાગર જિલ્લામાં સોશિયલ મીડિયાનો દુરુપયોગ કરી ઉશ્કેરણીજનક મેસેજ કરનાર સામે પોલીસ દ્વારા કાર્યવાહી કરવામાં આવશે. ઇઝરાઇલ હમાસ યુદ્ધને લગતા કોઈપણ ઉશ્કેરણી જનક મેસેજ ન કરવા પોલીસે અપીલ કરી છે.

ભારત પાકિસ્તાન ક્રિકેટ મેચને અનુસંધાને પણ કોઈની પણ ધાર્મિક લાગણી દુભાય તેવા ખોટા મેસેજ કે અફવા સોશિયલ મીડિયામાં ફોરવર્ડ ન કરવા પણ સુચના અપાઈ છે. મેચના પરિણામની ઉજવણી સમયે પણ અન્ય કોઈને નડતરરૂપ ન થાય તેમજ કોઈ ધર્મ કે સમાજની લાગણી ન દુભાય તે રીતે ઉજવણી કરવા અનુરોધ કરવામાં આવી રહ્યો છે.

સાઇબર ક્રાઇમ પોલીસ સ્ટેશન દ્વારા આ બાબતે whatsapp, facebook, instagram, twitter જેવા સોશિયલ મીડિયા પ્લેટફોર્મ ઉપર તેમજ અલગ અલગ પ્રવૃત્તિઓ ઉપર બાજ નજર રાખવામાં આવી રહી છે. કોઈ વ્યક્તિ આવી ગેરકાયદેસર પ્રવૃતિઓને પ્રોત્સાહિત કરશે તો તેઓ સામે પોલીસ દ્વારા કડક કાર્યવાહી કરવામાં આવશે. સોશિયલ મીડિયા ઉપર આવી પોસ્ટ થાય તો તુરંત પોલીસના કંટ્રોલરૂમ નંબર 02674 250 128 ઉપર જાણ કરવા પોલીસે અપીલ કરી છે.

 

 14 ઓક્ટોબર શનિવારના રોજ ભારત અને પાકિસ્તાન વચ્ચે મેચ યોજાવાની છે. વિશ્વ કપની આ હાઈ વોલ્ટેજ મેચને લઈને ફેન્સમાં અનેરો ઉત્સાહ છે તો બીજી તરફ સુરક્ષાને ધ્યાનમાં રાખીને શહેરની પોલીસ અને વિવિધ એજન્સીઓ પણ સતર્ક બની છે. તો બીજી તરફ ભારત -પાકિસ્તાનની મેચને લઈ રાજ્યના DGP વિકાસ સહાયએ પ્રેસ કોન્ફરન્સ યોજી હતી.

આવતીકાલે રાત્રે ૮ વાગ્યા પછી પોલીસ એલર્ટ થઈ જશે

તેમણે કહ્યું કે, આવતીકાલે રાત્રીના 8 થી12 વાગ્યા સુધી સમગ્ર ગુજરાતમાં હાઇ એલર્ટ રહેશે. ભારત -પાકિસ્તાનની મેચને લઈ રાજ્યના DGP વિકાસ સહાયે મોટું નિવેદન આપ્યું છે. રાત્રિના 8 વાગ્યાથી સમગ્ર રાજ્યમાં એલર્ટ  રહેશે. તમામ પોલીસ જવાન અને SRPFની ટુકડીઓ એલર્ટ પર રહેશે. આ ઉપરાંત વિજય સરઘસ અને ઉજવણી અંગે એસપી અને પોલીસ કમિશનર નિર્ણય લેશે. સાથે જ વિજય સરધસની પરવાનગી સ્થાનિક પોલીસ નક્કી કરશે. આવતીકાલે મેચ રાત્રે 10 કે 10:30 કલાકે પૂર્ણ થવાની હોવાથી આવતીકાલે રાત્રે ૮ વાગ્યા પછી પોલીસ એલર્ટ થઈ જશે. એટલું જ નહીં રાજ્યમાં તમામ પોલીસકર્મી અને એસઆરપીને સતર્ક રખાશે. મેચનું પરિણામ જે આવે તે ગુજરાત પોલીસ સતર્ક છે અને તૈયાર હોવાનો અંતમાં રાજ્ય પોલીસ વડા વિકાસ સહાય એ દાવો કર્યો હતો. ભૂતકાળની મેચના અભુભવના આધારે નિર્ણય લેવામાં આવશે.રાજ્યમાં ક્યાંય છમકલું કે અનિચ્છનીય બનાવ ન બને તે માટે એલર્ટ રહેશે.

પ્રેક્ષકોની સુરક્ષામાં 6 હજાર પોલીસ જવાનો ખડેપગે રહેશે

તેમણે વધુમાં કહ્યું કે, આવતીકાલે અમદાવાદમાં ભારત -પાકિસ્તાનની મેચ યોજાશે.  મેચને અનુસંધાને અમદાવાદ અને ગુજરાત પોલીસે વ્યવસ્થા કરી છે.  ભારત -પાકિસ્તાન મેચની 5 કેન્દ્ર આધારિત સુરક્ષા ગોઠવાઈ છે. સ્ટેડિયમ અને અંદરના પ્રેક્ષકોની સુરક્ષામાં 6 હજાર પોલીસ જવાનો ખડેપગે રહેશે.  ટ્રાફિક અને પાર્કિંગ માટે પણ સઘન સુરક્ષા વ્યવસ્થા કરી છે.  બંને ટીમ અને તેના સ્ટાફ માટે ચુસ્ત સુરક્ષા બંદોબસ્ત રહેશે.  અસામાજિક તત્વો પર પોલીસની વોચ ગોઠવવામાં આવી છે.  મેચ અનુસંધને રાજ્યમા અનિચ્છનીય બનાવ ન બને તે માટે વ્યવસ્થા કરવામાં આવી છે. ખૂબ વ્યપક રીતે સ્ટેડિયમ અને સ્ટેડિયમની આસપાસ પોલીસ બંદોબસ્ત મૂકયો છે. NSG, RAF NDRF પણ સ્થાનિક પોલીસ સાથે જોડાયા છે. ટ્રાફિક અનુસંધાને અમદાવાદ પોલીસ દ્વારા સૂચના આપવામાં આવી છે.