આ તારીખ સુધીમાં ગુજરાતને મળશે નવા પ્રદેશ પ્રમુખ, રાષ્ટ્રીય અધ્યક્ષ પણ બદલાશે 

ભારતીય જનતા પાર્ટીને 20 માર્ચ સુધીમાં નવા રાષ્ટ્રીય અધ્યક્ષ મળી શકે છે. હાલમાં જેપી નડ્ડા આ જવાબદારી સંભાળી રહ્યા છે, પરંતુ તેઓ કેન્દ્ર સરકારમાં મંત્રી પણ છે.

પ્રતિકાત્મક તસવીર

Source : PTI

નવી દિલ્હી:  ભારતીય જનતા પાર્ટીને 20 માર્ચ સુધીમાં નવા રાષ્ટ્રીય અધ્યક્ષ મળી શકે છે. હાલમાં જેપી નડ્ડા આ જવાબદારી સંભાળી રહ્યા છે, પરંતુ તેઓ કેન્દ્ર સરકારમાં મંત્રી પણ છે. સૂત્રોના જણાવ્યા અનુસાર પાર્ટી આવતા મહિને નવા રાષ્ટ્રીય અધ્યક્ષની પસંદગી કરી શકે છે. 12 રાજ્યોમાં ભાજપ અધ્યક્ષની ચૂંટણી પૂર્ણ થઈ ગઈ છે. ટૂંક સમયમાં વધુ 6 રાજ્યોના પ્રદેશ પ્રમુખ માટે ચૂંટણી પૂર્ણ થશે. આ પછી રાષ્ટ્રીય અધ્યક્ષની ચૂંટણી થઈ શકે છે.

નિયમો અનુસાર 18 રાજ્યોમાં અધ્યક્ષની ચૂંટણી બાદ ભાજપના રાષ્ટ્રીય અધ્યક્ષની ચૂંટણીની પ્રક્રિયા શરૂ થશે. ભાજપના બંધારણ મુજબ ઓછામાં ઓછા અડધા રાજ્યોમાં ચૂંટણી યોજાય પછી જ રાષ્ટ્રીય અધ્યક્ષની પસંદગી થઈ શકે છે. જેપી નડ્ડા પહેલા અમિત શાહ અને રાજનાથ સિંહ પણ પાર્ટીના રાષ્ટ્રીય અધ્યક્ષ રહી ચૂક્યા છે.  

ફેબ્રુઆરીના અંત સુધીમાં 18 રાજ્યોના પ્રદેશ પ્રમુખોની પસંદગીની પ્રક્રિયા પૂર્ણ થતાં જ રાષ્ટ્રીય અધ્યક્ષની ચૂંટણીનો કાર્યક્રમ જાહેર કરવામાં આવશે. ભાજપના બંધારણ મુજબ દેશના ઓછામાં ઓછા અડધા રાજ્યોના પ્રદેશ પ્રમુખો ચૂંટાયા હોય ત્યારે જ રાષ્ટ્રીય અધ્યક્ષની ચૂંટણી થઈ શકે છે. પાર્ટીના એક નેતાના જણાવ્યા અનુસાર વર્તમાન રાષ્ટ્રીય અધ્યક્ષ જેપી નડ્ડાને બીજી ટર્મ આપવાને બદલે પાર્ટી નવા રાષ્ટ્રીય અધ્યક્ષની પસંદગી કરશે.

જો કે, ભાજપના બંધારણ મુજબ કોઈ વ્યક્તિ સતત બે ટર્મ માટે રાષ્ટ્રીય અધ્યક્ષ તરીકે ચૂંટાઈ શકે છે. આ દૃષ્ટિએ નડ્ડા ટેકનિકલી રીતે રાષ્ટ્રીય અધ્યક્ષ બનવા માટે લાયક છે, પરંતુ સૂત્રોનું કહેવું છે કે ફરીથી પ્રમુખ બનવાને બદલે તેમણે આ જવાબદારી નવા વ્યક્તિને સોંપવાની વાત કહી છે.

આ વખતે રાષ્ટ્રીય અધ્યક્ષ માટે દક્ષિણ ભારતના કોઈ નેતાના નામ પર સર્વસંમતિ સાધવાનો વિચાર છે. કારણ કે, ભાજપનું ધ્યાન હવે દક્ષિણના રાજ્યો પર છે. ત્યાંથી 20 વર્ષથી કોઈ રાષ્ટ્રીય અધ્યક્ષ નથી. વેંકૈયા નાયડુ (આંધ્ર) 2002-2004 વચ્ચે છેલ્લે અધ્યક્ષ હતા. આ અંગે આરએસએસ અને સંબંધિત સંગઠનો સાથે પણ ચર્ચા કરવામાં આવી છે.

એ નિશ્ચિત છે કે જે કોઈ નવા રાષ્ટ્રીય અધ્યક્ષ બનશે, આગામી લોકસભા ચૂંટણી 2029 તેમના નેતૃત્વમાં જ લડવામાં આવશે. ભાજપમાં રાષ્ટ્રીય અધ્યક્ષનો કાર્યકાળ 3 વર્ષનો છે, આવી સ્થિતિમાં નવા રાષ્ટ્રીય અધ્યક્ષનો કાર્યકાળ જાન્યુઆરી 2028 સુધીનો રહેશે. લોકસભાની ચૂંટણી બરાબર 14 મહિના પછી યોજાશે. જેના કારણે તેમનો કાર્યકાળ લોકસભા ચૂંટણી સુધી લંબાવવામાં આવશે.

રાષ્ટ્રીય અધ્યક્ષની ચૂંટણી યોજતા પહેલા ભાજપમાં તમામ રાજ્યોમાં સંગઠનાત્મક ચૂંટણીઓ યોજાય છે. આ ચૂંટણી વિભાગીયથી માંડીને જિલ્લા અને રાજ્ય સ્તર સુધી થાય છે. રાજ્ય કક્ષાએ ચૂંટણી પ્રક્રિયા ચાલી રહી છે.

જેપી નડ્ડાનો કાર્યકાળ જૂનમાં લંબાવવામાં આવ્યો હતો. ગયા વર્ષે લોકસભા ચૂંટણી માટે તેમનો કાર્યકાળ જૂન સુધી 6 મહિના લંબાવવામાં આવ્યો હતો. નડ્ડા હાલમાં કેન્દ્રીય મંત્રી પણ છે.

અત્યાર સુધી ચૂંટણી બિનહરીફ

ભાજપમાં અત્યાર સુધી રાષ્ટ્રીય અધ્યક્ષની ચૂંટણી બિનહરીફ થઈ છે. મતલબ કે માત્ર એક જ વ્યક્તિ નોમિનેટ કરે છે અને વોટિંગ કર્યા વિના પ્રમુખ તરીકે ચૂંટાય છે. આ વખતે પણ આ જ પરંપરા ચાલુ રહેવાની આશા છે.

ગુજરાતમાં હાલમાં સીઆર પાટીલ પ્રદેશ પ્રમુખ છે. તેઓ કેંદ્રમાં મંત્રી પણ છે. ગુજરાત ભાજપને પણ ટૂંક સમયમાં નવા પ્રદેશ અધ્યક્ષ મળી શકે છે.