‘પીનેવાલે કો પીને કા બહાના ચાહિયે’, આ રાજ્યના લોકો ડિસેમ્બર મહિનામાં 1000 કરોડનો દારૂ ગટગટાવી ગયા

વર્ષના અન્ય મહિનાઓમાં આ ડિપાર્ટમેન્ટલ સ્ટોર્સમાં મહિને 15 કરોડ રૂપિયાનો દારૂ વેચાય છે.

નવી દિલ્હીઃ આ વખતે ડિસેમ્બરમાં એક હજાર કરોડ રૂપિયાનો દારૂ દિલ્હીવાસીઓ ગટગટાવી ગયા. આ મહિને આબકારી વિભાગ પાસે સેલ્સ ટેક્સ અને ડ્યૂટીની આવકની ગણતરી કરીએ તો વિતેલા વર્ષની તુલનામાં એક ટકા વધારે રકમ જમા થઈ છે. આ વખતે ડિસેમ્બરમાં આબકારી વિભાગની કુલ આવક 465 કરોડ રૂપિયાની થઈ છે. જે વિતેલા વર્ષે એટલે કે ડિસેમ્બર 2018 કરાતં એક ટકા વધારે છે. એટલે કે વિતેલા વર્ષે 460 કરોડ રૂપિયાની આવક દારૂમાંથી થઈ હતી. દિલ્હીમાં દારૂ પર 48 ટકા સેલ્સ ટેક્સ છે. સરકારી પ્રવક્તાએ કહ્યું હતું કે આ વર્ષે 485 કરોડ સેલ્સ ટેક્સ રૂપે મળવાની ધારણા હતી પરંતુ આ વરસે ડિસેમ્બરમાં દિલ્હીના 120 ડિપાર્ટમેન્ટલ સ્ટોર્સ વિવિધ કારણો અને આંદોલનોના પગલે બંધ હતા એટલે દારૂનું વેચાણ ધાર્યા મુજબ થયું નહોતું. વર્ષના અન્ય મહિનાઓમાં આ ડિપાર્ટમેન્ટલ સ્ટોર્સમાં મહિને 15 કરોડ રૂપિયાનો દારૂ વેચાય છે. ડિસેમ્બરમાં શરાબનું વેચાણ વધીને 22થી 25 કરોડનું થતું હોય છે. આ વર્ષે ઠંડીએ વર્ષોના રેકોર્ડ તોડ્યા હોઈ દારૂના વેચાણમાં સારો એવો ઉછાળો જોવા મળ્યો હતો.