રાહુલ ગાંધીના આરોપો પર ચૂંટણી પંચનો સણસણતો જવાબ: 'સોગંદનામું આપો અથવા દેશની માફી માંગો'
તાજેતરમાં લોકસભામાં વિરોધ પક્ષના નેતા રાહુલ ગાંધીએ મતદાનની પ્રક્રિયા અને મતદાર યાદીઓ પર ગંભીર સવાલો ઉઠાવ્યા હતા. તેમણે 'મત ચોરી' ના આરોપો લગાવીને એક પ્રેસ કોન્ફરન્સ પણ કરી હતી.
Rahul Gandhi vote chori: લોકસભામાં વિરોધ પક્ષના નેતા રાહુલ ગાંધી દ્વારા કરવામાં આવેલા 'મત ચોરી' ના આરોપો અને પ્રેસ કોન્ફરન્સ પર ચૂંટણી પંચે અત્યંત કડક પ્રતિક્રિયા આપી છે. મુખ્ય ચૂંટણી કમિશનર જ્ઞાનેશ કુમારે સ્પષ્ટ શબ્દોમાં કહ્યું કે જો રાહુલ ગાંધી 7 દિવસની અંદર પોતાના દાવાઓ સંબંધિત સોગંદનામું (એફિડેવિટ) રજૂ નહીં કરે, તો તેમને દેશની માફી માંગવી પડશે. પંચે આ આરોપોને પાયાવિહોણા અને ખોટા ગણાવીને બંધારણનું અપમાન ગણાવ્યું છે.
17 ઓગસ્ટ 2025 ના રોજ, મુખ્ય ચૂંટણી કમિશનર જ્ઞાનેશ કુમારે રાહુલ ગાંધીના 'મત ચોરી' ના આરોપોને નકારતા એક પ્રેસ કોન્ફરન્સ યોજી હતી. તેમણે જણાવ્યું કે PPT માં રજૂ કરવામાં આવેલા ખોટા આંકડા અને દાવાઓ પાયાવિહોણા છે. કમિશનરે કહ્યું કે રાહુલ ગાંધીએ તેમના દાવાઓને સમર્થન આપવા માટે સોગંદનામું આપવું પડશે, અન્યથા તેમણે દેશની માફી માંગવી પડશે. ચૂંટણી પંચે ભારપૂર્વક જણાવ્યું કે તે કોઈ પણ પક્ષ પ્રત્યે પક્ષપાતી નથી અને તે કાયદા મુજબ કામ કરે છે.
ચૂંટણી પંચનો કડક સંદેશ
મુખ્ય ચૂંટણી કમિશનર જ્ઞાનેશ કુમારે રાહુલ ગાંધીના આરોપોને સીધા પડકાર્યા છે. તેમણે કહ્યું, "જો કોઈ એવું વિચારે છે કે PPT આપીને... ચૂંટણી પંચે સોગંદનામું વિના આવા ગંભીર મુદ્દાઓ પર કામ ન કરવું જોઈએ." તેમણે સ્પષ્ટપણે કહ્યું કે રાહુલ ગાંધીએ કાં તો પોતાના દાવાઓને સાબિત કરવા માટે 7 દિવસમાં સોગંદનામું રજૂ કરવું પડશે, અથવા દેશની માફી માંગવી પડશે.
ચૂંટણી પંચે આ આરોપોની ગંભીરતા પર ભાર મૂકતા કહ્યું કે સૌથી મોટી મતદાર યાદી, ચૂંટણી કાર્યકરોની સૌથી મોટી સેના અને સૌથી વધુ મતદાન કરનારા લોકો સામે આવા પાયાવિહોણા આરોપો લગાવવા એ બંધારણનું અપમાન છે. કમિશનરે કહ્યું કે જો મતદાર યાદીમાં ભૂલો હોય તો કાયદા મુજબ સમયસર ફરિયાદ કરવી જોઈએ, અને જો કોઈ ઉમેદવારને ચૂંટણીમાં ગેરરીતિની શંકા હોય, તો તેને 45 દિવસની અંદર કોર્ટમાં અરજી દાખલ કરવાનો અધિકાર છે.
પક્ષપાતનો આરોપ અને બિહાર SIR
રાહુલ ગાંધીના પક્ષપાતવાળા આરોપો પર ચૂંટણી પંચે પ્રતિક્રિયા આપી કે કાયદા મુજબ દરેક રાજકીય પક્ષ ચૂંટણી પંચની નોંધણીમાંથી જન્મે છે, તેથી પંચ કોઈના પ્રત્યે પક્ષપાતી કેવી રીતે હોઈ શકે. તેમણે બિહારમાં ચાલી રહેલા SIR (સ્પેસિફિક ઈન્ફોર્મેશન રિકવેસ્ટ) પર ફેલાવવામાં આવી રહેલી ખોટી માહિતીને ચિંતાજનક ગણાવી. કમિશનરે સ્પષ્ટતા કરી કે SIR માં ગેરરીતિઓની ફરિયાદ કરવા માટે હજુ 15 દિવસ બાકી છે અને પંચના દરવાજા દરેક માટે ખુલ્લા છે.
ટોપ સ્ટોરી
ટ્રેન્ડિંગ સમાચાર
