Cyclone: વધુ એક વાવાઝોડાનો ખતરો, તામિલનાડુ સહિતા આ પાંચ રાજ્યોમાં ટકરાશે ફેંગલ, દરિયામાં હલચલ શરૂ...

Cyclone Fengal: તમિલનાડુમાં સ્થિત દરિયાકાંઠાના વિસ્તારો આ વાવાઝોડાથી સૌથી વધુ પ્રભાવિત થશે

(તસવીર- એબીપી લાઇવ)

Source : એબીપી લાઇવ

Cyclone Fengal: આંદામાન સમુદ્રમાં ઉદ્દભવેલું ભયાનક ચક્રવાતી વાવાઝોડું ફેંગલ ઝડપથી ભારતીય દરિયાકાંઠા તરફ આગળ વધી રહ્યું છે, બુધવારે એટલે કે આજે વધુ તીવ્ર બનવાની આશંકા છે. આ તોફાનના કારણે શ્રીલંકા અને દક્ષિણ ભારતના ઘણા ભાગોમાં ભારે તબાહી થઈ શકે છે. આ વાવાઝોડાની અસરને લઈને હવામાન વિભાગે ઘણા રાજ્યોમાં એલર્ટ જાહેર કર્યું છે. હાલ તોફાનના કારણે તમિલનાડુના વિવિધ ભાગોમાં ખાસ કરીને ચેન્નાઈમાં ભારે વરસાદ થઈ રહ્યો છે.

હવામાન વિભાગના જણાવ્યા અનુસાર, વાવાઝોડું ફેંગલને કારણે તામિલનાડુ અને પુડુચેરીમાં 27 અને 28 નવેમ્બરના રોજ ભારે વરસાદ અને તેજ પવનનો સામનો કરવો પડી શકે છે. ખાસ કરીને તમિલનાડુમાં સ્થિત દરિયાકાંઠાના વિસ્તારો આ વાવાઝોડાથી સૌથી વધુ પ્રભાવિત થશે. રાહત કામગીરીની તૈયારીના ભાગરૂપે NDRFની 7 ટીમો તૈનાત કરવામાં આવી છે અને રાજ્ય સરકારે શાળાઓ બંધ રાખવાની ભલામણ કરી છે. તોફાનનો સામનો કરવા માટે રાહત શિબિરો અને ઈમરજન્સી ઓપરેશન સેન્ટરોમાં કડક વ્યવસ્થા કરવામાં આવી છે.

માછીમારોને અપાયા ખાસ નિર્દેશો 
વાવાઝોડુંની અસરને કારણે ચેન્નાઈમાં ભારે વરસાદને કારણે ઘણી જગ્યાએ પાણી ભરાઈ ગયા છે, જેના કારણે ટ્રાફિક જામ થઈ ગયો છે અને લોકોને ઘણી મુશ્કેલી પડી રહી છે. મુખ્યમંત્રી એમકે સ્ટાલિને આ સંકટનો સામનો કરવા માટે એક ઉચ્ચ સ્તરીય બેઠક યોજી હતી અને સંવેદનશીલ જિલ્લાઓમાં રાહત કામગીરી માટે અધિકારીઓને તૈનાત કર્યા હતા. તેમજ માછીમારોને દરિયાથી દૂર રહેવાની સલાહ આપવામાં આવી છે અને શક્ય તમામ તકેદારી રાખવા સૂચના આપવામાં આવી છે.

આંધ્રપ્રદેશમાં પણ વરસાદની સંભાવના 
તમિલનાડુની સાથે દક્ષિણ તટીય આંધ્રપ્રદેશમાં 27 થી 29 નવેમ્બર દરમિયાન ભારે વરસાદની સંભાવના છે. આ વિસ્તારોમાં સતત વરસાદને કારણે સામાન્ય જનજીવન પ્રભાવિત થઈ શકે છે. ખાસ કરીને દરિયાકાંઠાના વિસ્તારોમાં જ્યાં ઊંચા મોજાઓનું જોખમ હોઈ શકે છે. હવામાન વિભાગે પણ આ વિસ્તારમાં એલર્ટ જાહેર કર્યું છે.

ઉત્તરભારતમાં પણ સંકટના વાદળ 
જ્યારે દક્ષિણ ભારતમાં તોફાનના કારણે ભારે વરસાદ પડી રહ્યો છે, ત્યારે ઉત્તર ભારતમાં 28 નવેમ્બરથી 1 ડિસેમ્બર સુધી ગાઢ ધુમ્મસની શક્યતા છે. પંજાબ, હરિયાણા, ઉત્તરપ્રદેશ અને ચંદીગઢ જેવા વિસ્તારોમાં ધુમ્મસને કારણે દૃશ્યતામાં ઘટાડો થવાની ચેતવણી આપવામાં આવી છે, જેના કારણે રસ્તાઓ અને હવાઈ સેવાઓ પરના ટ્રાફિકને અસર થઈ શકે છે. હિમાચલ પ્રદેશમાં પણ 27 થી 30 નવેમ્બર દરમિયાન ધુમ્મસને કારણે નબળી દૃશ્યતા જોવા મળી શકે છે.

દિલ્હી-એનસીઆરમાં પણ ખતરો 
દિલ્હી NCRમાં AQI આગામી થોડા દિવસો સુધી "ખૂબ જ નબળી" શ્રેણીમાં રહેવાની ધારણા છે. આ ખાસ કરીને વરસાદ અને ચક્રવાતના કારણે થતા પ્રદૂષણના સંયોજનને કારણે થઈ શકે છે. હવાની ગુણવત્તામાં આ ઘટાડાને કારણે સ્વાસ્થ્ય સમસ્યાઓ વધવાની શક્યતા છે. ખાસ કરીને બાળકો અને વૃદ્ધો માટે આ એક મોટો ખતરો બની શકે છે.

આગામી 24 કલાકમાં હવામાનનું પૂર્વાનુમાન 
સ્કાયમેટ વેધર અનુસાર, આગામી 24 કલાક દરમિયાન તમિલનાડુ અને શ્રીલંકાના દરિયાકાંઠાના વિસ્તારોમાં ભારે વરસાદ થઈ શકે છે. આંદામાન અને નિકોબાર ટાપુઓમાં કેટલાક સ્થળોએ ભારે વરસાદ સાથે હળવાથી મધ્યમ વરસાદની શક્યતા છે. દરિયાકાંઠાના આંધ્રપ્રદેશમાં પણ હળવો વરસાદ થઈ શકે છે, જ્યારે દિલ્હી NCRની હવાની ગુણવત્તામાં કોઈ ખાસ ફેરફાર થવાની કોઈ શક્યતા નથી. માહિતી અનુસાર, ચક્રવાત ફેંગલને કારણે, હવામાન વિભાગે તમામ દરિયાકાંઠાના રાજ્યો અને સંબંધિત વિસ્તારોને સાવચેત રહેવા અને સલામતીના તમામ પગલાં લાગુ કરવાની સલાહ આપી છે.

આ પણ વાંચો