યુરિયા પર પ્રતિ બોરી 3700 રૂપિયાની સબસિડી મળે છે, ઘણા દેશો કરતા ભારતમાં યુરિયા સસ્તું છે - કેન્દ્ર સરકારે સંસદમાં આપી જાણકારી

મનસુખ માંડવિયાએ જણાવ્યું કે વિદેશમાં તેની કિંમત 4000 રૂપિયા પ્રતિ બેગની આસપાસ છે, જ્યારે ભારતમાં તેની કિંમત 266 રૂપિયાની આસપાસ છે.

પ્રતિકાત્મક તસવીર

Fertilizer Subsidy:  કેન્દ્ર સરકારે આજે સંસદમાં જણાવ્યું હતું કે તે ખેડૂતોને યુરિયા સહિત વિવિધ ખાતરો પૂરતા પ્રમાણમાં અને યોગ્ય કિંમતે મળે તે સુનિશ્ચિત કરવા તમામ પ્રયાસો કરી રહી છે અને આ માટે તે સબસિડીનો સંપૂર્ણ બોજ ઉઠાવી રહી છે. રસાયણ અને ખાતર મંત્રી મનસુખ માંડવિયાએ રાજ્યસભામાં પ્રશ્નકાળ દરમિયાન પૂરક પ્રશ્નોના જવાબમાં આ માહિતી આપી હતી. તેમણે કહ્યું કે ભારતમાં યુરિયાનો કુલ વપરાશ 325 લાખ મેટ્રિક ટન છે જ્યારે અહીં સ્થાનિક ઉત્પાદન 250 લાખ ટન છે અને બાકીના 75 લાખ મેટ્રિક ટન વિદેશમાંથી આયાત કરવામાં આવે છે.

વિદેશમાં યુરિયાની કિંમત રૂ.4000 પ્રતિ બોરી છે, તો ભારતમાં યુરિયાની કિંમત રૂ.266 છે

મનસુખ માંડવિયાએ જણાવ્યું કે વિદેશમાં તેની કિંમત 4000 રૂપિયા પ્રતિ બેગની આસપાસ છે, જ્યારે ભારતમાં તેની કિંમત 266 રૂપિયાની આસપાસ છે અને સરકાર તેના પર લગભગ 3700 રૂપિયાની સબસિડી આપી રહી છે. ડીએપી ખાતરનો ઉલ્લેખ કરતાં માંડવિયાએ કહ્યું કે તેના પર પ્રતિ થેલી 2650 રૂપિયાની સબસિડી આપવામાં આવી રહી છે. તેમણે કહ્યું કે સરકાર પૂરો પ્રયાસ કરી રહી છે કે ભાવ વધારાનો બોજ ખેડૂતો પર ન પડે, તેથી સબસિડીનો સંપૂર્ણ બોજ તે ઉઠાવી રહી છે.

ભારતમાં યુરિયા ઘણા દેશો કરતા સસ્તું છે

પ્રશ્નકાળ દરમિયાન જ, રસાયણ અને ખાતર રાજ્ય મંત્રી ભગવંત ખુબાએ જણાવ્યું હતું કે કેન્દ્ર તમામ રાજ્યોને સમાન દરે ખાતર આપે છે અને કિંમતોને લઈને રાજ્યો સાથે કોઈ ભેદભાવ નથી. તેમણે કહ્યું કે ભારત સરકાર સમગ્ર દેશના ખેડૂતોના હિતની ચિંતા કરે છે અને તે યોગ્ય ભાવે અને પૂરતા પ્રમાણમાં ખાતર આપવાનો પ્રયાસ કરી રહી છે. તેમણે કહ્યું કે ભારતમાં યુરિયાની કિંમત 266.70 રૂપિયા પ્રતિ થેલી છે, જ્યારે પાકિસ્તાનમાં 800 રૂપિયા, ઈન્ડોનેશિયામાં 600 રૂપિયા, ચીનમાં 2100 રૂપિયા, બાંગ્લાદેશમાં 719 રૂપિયા, અમેરિકામાં 3060 રૂપિયા અને બ્રાઝિલમાં 3600 રૂપિયા છે.