Weather Update: દેશના આ રાજ્યોમાં આગામી 48 કલાક અતિભારે, 15 જુલાઈ સુધી ભારે વરસાદ-વાવાઝોડાની ચેતવણી
દેશના વિવિધ વિસ્તારોમાં ચોમાસું જોર પકડી રહ્યું છે અને અનેક રાજ્યોમાં ભારે વરસાદને કારણે જનજીવન પ્રભાવિત બન્યું છે. અનેક વિસ્તારોમાં પૂર જેવી સ્થિતિ તેમજ ભૂસ્ખલનની ઘટનાઓ સામે આવી રહી છે.
- દેશભરમાં ચોમાસું સક્રિય, અનેક રાજ્યોમાં વરસાદનો કહેર.
- ઉત્તરાખંડ-પશ્ચિમ યુપીમાં આગામી 48 કલાક અતિભારે વરસાદ.
- દિલ્હી, હરિયાણા, પંજાબ, પૂર્વોત્તરમાં ભારે વરસાદનો દોર.
- ગુજરાતમાં 15 જુલાઈ સુધી હળવાથી મધ્યમ વરસાદની આગાહી છે.
Weather Update: દેશના વિવિધ વિસ્તારોમાં ચોમાસું જોર પકડી રહ્યું છે અને અનેક રાજ્યોમાં ભારે વરસાદને કારણે જનજીવન પ્રભાવિત બન્યું છે. અનેક વિસ્તારોમાં પૂર જેવી સ્થિતિ તેમજ ભૂસ્ખલનની ઘટનાઓ સામે આવી રહી છે. આ દરમિયાન દક્ષિણ-પશ્ચિમ ચોમાસાએ વધુ ગતિ પકડીને 9 જુલાઈએ ઉત્તર અરબી સમુદ્ર, રાજસ્થાન, હરિયાણા અને પંજાબના બાકી રહેલા વિસ્તારોને પણ આવરી લીધા છે. આ સાથે સમગ્ર દેશમાં ચોમાસાનું આગમન પૂર્ણ થયું છે.
ઉત્તર પ્રદેશ માટે આગામી 48 કલાક અત્યંત મહત્વપૂર્ણ
ભારતીય હવામાન વિભાગ (IMD) દ્વારા 15 જુલાઈ સુધી દેશના બે ડઝનથી વધુ રાજ્યોમાં ભારેથી અતિભારે વરસાદ તેમજ ગાજવીજ અને તેજ પવનની આગાહી કરવામાં આવી છે. ખાસ કરીને ઉત્તરાખંડ અને પશ્ચિમ ઉત્તર પ્રદેશ માટે આગામી 48 કલાક અત્યંત મહત્વપૂર્ણ માનવામાં આવી રહ્યા છે.
ઉત્તરાખંડમાં અતિભારે વરસાદનું એલર્ટ
હવામાન વિભાગના જણાવ્યા મુજબ ઉત્તરાખંડમાં 9 અને 10 જુલાઈએ અતિભારે વરસાદનું એલર્ટ જાહેર કરવામાં આવ્યું છે. જ્યારે પશ્ચિમ ઉત્તર પ્રદેશમાં 9 જુલાઈએ અતિભારે વરસાદ વરસી શકે છે. ઉત્તરાખંડ અને હિમાચલ પ્રદેશમાં 15 જુલાઈ સુધી સતત વરસાદી માહોલ રહેવાની શક્યતા છે. ઉત્તરાખંડમાં 11થી 15 જુલાઈ દરમિયાન પણ ભારે વરસાદ ચાલુ રહી શકે છે.
દિલ્હી, હરિયાણા અને પંજાબમાં 9 અને 10 જુલાઈ દરમિયાન ભારે વરસાદની આગાહી છે. હરિયાણા, ચંડીગઢ અને દિલ્હીમાં ભારે વરસાદ સાથે ગાજવીજની શક્યતા વ્યક્ત કરવામાં આવી છે. પંજાબમાં પણ આગામી દિવસોમાં ભારે વરસાદી ઝાપટાં પડી શકે છે.
જમ્મુ-કાશ્મીર, લદ્દાખ અને રાજસ્થાનના કેટલાક વિસ્તારોમાં પણ વરસાદી માહોલ સક્રિય રહેશે. પૂર્વ રાજસ્થાનમાં ભારે વરસાદ અને ગાજવીજની શક્યતા દર્શાવવામાં આવી છે. જમ્મુ-કાશ્મીર અને લદ્દાખમાં 40થી 50 કિમી પ્રતિ કલાકની ઝડપે પવન ફૂંકાઈ શકે છે.
પૂર્વોત્તર ભારતના આસામ, મેઘાલય અને અરુણાચલ પ્રદેશમાં 15 જુલાઈ સુધી ભારે વરસાદનું અનુમાન છે. નાગાલેન્ડ, મણિપુર, મિઝોરમ અને ત્રિપુરામાં પણ સતત વરસાદી માહોલ રહેવાની સંભાવના છે.
પશ્ચિમ ભારતમાં કોંકણ અને ગોવામાં આગામી એક સપ્તાહ સુધી ભારે વરસાદ ચાલુ રહેવાની શક્યતા છે. મધ્ય મહારાષ્ટ્રમાં 9 જુલાઈએ અતિભારે અને 10 જુલાઈએ ભારે વરસાદનું એલર્ટ જાહેર કરવામાં આવ્યું છે.
આ પણ વાંચો- Gujarat Rain: રાજ્યના આ જિલ્લાઓમાં તૂટી પડશે ભારે વરસાદ, જાણો હવામાનનું લેટેસ્ટ અપડેટ
ગુજરાતમાં 15 જુલાઈ સુધી વરસાદની આગાહી
ગુજરાતની વાત કરીએ તો રાજ્યના અલગ-અલગ જિલ્લાઓમાં 15 જુલાઈ સુધી હળવાથી મધ્યમ વરસાદી ઝાપટાં પડવાની શક્યતા છે. દક્ષિણ ગુજરાત, સૌરાષ્ટ્ર અને કચ્છના કેટલાક વિસ્તારોમાં છૂટાછવાયા ભારે વરસાદની સ્થિતિ પણ સર્જાઈ શકે છે. હવામાન વિભાગે નાગરિકોને સાવચેત રહેવા અને સ્થાનિક તંત્રની સૂચનાઓનું પાલન કરવાની અપીલ કરી છે.
ટોપ સ્ટોરી
ટ્રેન્ડિંગ સમાચાર
