Modi Cabinet Decisions: કેબિનેટ બેઠકમાં મહિલા અનામત બિલને મળી મંજૂરી, આ તારીખે સંસદમાં રજૂ થઈ શકે 

સંસદના વિશેષ સત્રની વચ્ચે સોમવારે (18 સપ્ટેમ્બર)ના રોજ સંસદ ભવન એનેક્સીમાં કેન્દ્રીય કેબિનેટની બેઠક મળી હતી. સૂત્રોનો દાવો છે કે મોદી કેબિનેટની બેઠકમાં મહિલા અનામત બિલને મંજૂરી આપવામાં આવી છે.

પ્રધાનમંત્રી મોદી ( Image Source : PTI )

Modi Cabinet Decisions: સંસદના વિશેષ સત્રની વચ્ચે સોમવારે (18 સપ્ટેમ્બર)ના રોજ સંસદ ભવન એનેક્સીમાં કેન્દ્રીય કેબિનેટની બેઠક મળી હતી. સૂત્રોનો દાવો છે કે મોદી કેબિનેટની બેઠકમાં મહિલા અનામત બિલને મંજૂરી આપવામાં આવી છે. આ સાથે એવી માહિતી પણ સામે આવી છે કે મહિલા અનામત બિલ 20 સપ્ટેમ્બર એટલે કે આવતા બુધવારે સંસદમાં રજૂ કરવામાં આવી શકે છે. સૂત્રોના જણાવ્યા અનુસાર કેબિનેટે મહિલાઓ માટે 33 ટકા મહિલા અનામતને મંજૂરી આપી છે.

વર્તમાન લોકસભામાં 78 મહિલા સભ્યો ચૂંટાયા હતા, જે કુલ 543 ની સંખ્યાના 15 ટકા કરતા પણ ઓછા છે. આંધ્ર પ્રદેશ, અરુણાચલ પ્રદેશ, આસામ, ગોવા, ગુજરાત, હિમાચલ પ્રદેશ, કર્ણાટક, કેરળ, મધ્ય પ્રદેશ, મહારાષ્ટ્ર, મણિપુર, મેઘાલય, ઓડિશા, સિક્કિમ, તમિલનાડુ, તેલંગાણા, ત્રિપુરા અને પુડુચેરી સહિતની ઘણી રાજ્યોની વિધાનસભાઓમાં મહિલા પ્રતિનિધિત્વ 10 ટકાથી નીચે છે.

બીજેપી બુધવારે (20 સપ્ટેમ્બર) અથવા તેના એક દિવસ પછી દિલ્હી અથવા દિલ્હીને અડીને આવેલા રાજસ્થાનના કોઈપણ શહેરમાં મહિલાઓની મોટી સભાનું આયોજન કરી શકે છે. પીએમ મોદી પોતે સભાને સંબોધિત કરી શકે છે. સૂત્રોએ જણાવ્યું કે આ સમગ્ર કાર્યક્રમને હાલ પૂરતો ગુપ્ત રાખવામાં આવ્યો છે.

છેલ્લા કેટલાક સપ્તાહમાં કોંગ્રેસ, બીજુ જનતા દળ (BJD) અને ભારત રાષ્ટ્ર સમિતિ (BRS) સહિત અનેક પક્ષોએ મહિલા અનામત બિલ રજૂ કરવાની માંગ કરી છે. 

ભાજપ અને કોંગ્રેસ બંને પક્ષોએ હંમેશા તેને સમર્થન આપ્યું છે. જો કે, કેટલાક અન્ય પક્ષોએ મહિલા ક્વોટામાં ઓબીસી અનામતની કેટલીક માંગણીઓને લઈને તેનો વિરોધ કર્યો હતો. હવે ફરી એકવાર ઘણા પક્ષોએ આ વિશેષ સત્રમાં મહિલા અનામત બિલ લાવવા અને પસાર કરવાની જોરદાર હિમાયત કરી હતી, પરંતુ સરકારે કહ્યું છે કે યોગ્ય સમયે યોગ્ય નિર્ણય લેવામાં આવશે.

લગભગ 27 વર્ષથી પેન્ડિંગ મહિલા આરક્ષણ બિલ હવે સંસદમાં  આવશે. આંકડાઓ અનુસાર, લોકસભામાં મહિલા સાંસદોની સંખ્યા 15 ટકાથી ઓછી છે, જ્યારે રાજ્યની વિધાનસભામાં તેમનું પ્રતિનિધિત્વ 10 ટકાથી ઓછું છે. છેલ્લી વખત આ મુદ્દા પર કાર્યવાહી 2010 માં કરવામાં આવી હતી, જ્યારે રાજ્યસભાએ હંગામા વચ્ચે બિલ પસાર કર્યું હતું અને માર્શલોએ કેટલાક સાંસદોને હાંકી કાઢ્યા હતા જેમણે મહિલાઓ માટે 33 ટકા અનામતનો વિરોધ કર્યો હતો. જો કે, આ બિલ રદ્દ કરવામાં આવ્યું કારણ કે તે લોકસભામાં પસાર થઈ શક્યું ન હતું.