મુંબઈમાં ભારે વરસાદ, નીચાણવાળા વિસ્તારોમાં પાણી ભરાયા, અંધેરી સબ વે બંધ, 29 જિલ્લાઓમાં યલો એલર્ટ
Mumbai News: મહારાષ્ટ્રના વિવિધ જિલ્લાઓમાં હાલ જોરદાર વરસાદ પડી રહ્યો છે. રાજધાની મુંબઈમાં પણ સાંજના સમયે અચાનક વાતાવરણમાં પલટો આવ્યો અને ધોધમાર વરસાદ શરૂ થઈ ગયો.
Mumbai Rains: મુંબઈ અને તેની આસપાસના વિસ્તારોમાં છેલ્લા એક કલાકથી ભારે વરસાદ ચાલુ છે. મુંબઈમાં વીજળીના કડાકા સાથે ઠાણે, કલ્યાણ ડોંબિવલી, પશ્ચિમ ઉપનગર, કુર્લામાં વરસાદ પડી રહ્યો છે. અચાનક આવેલા આ વરસાદથી સામાન્ય લોકો પરેશાન છે. વરસાદને કારણે નીચાણવાળા વિસ્તારોમાં પાણી ભરાવાનું શરૂ થઈ ગયું છે. અંધેરી સબવેમાં પાણી ઘૂસી જતાં તેને હંગામી ધોરણે બંધ કરી દેવામાં આવી છે.
મહારાષ્ટ્રના 29 જિલ્લાઓમાં આવતીકાલે એટલે કે 11 ઓક્ટોબર માટે યલો એલર્ટ જાહેર કરવામાં આવ્યું છે. આ જિલ્લાઓમાં ભારે વરસાદની આગાહી છે. હવામાન વિભાગ તરફથી મુંબઈના પૂર્વ ઉપનગરો, નવી મુંબઈ અને રાયગઢ જિલ્લાઓમાં પણ વીજળીના કડાકા સાથે વરસાદની આગાહી કરવામાં આવી છે. હવામાન વિભાગે જાણકારી આપી છે કે આગામી બે કલાક સુધી તોફાની પવન સાથે વરસાદની છૂટાછવાઈ બૌછારો જોવા મળી શકે છે.
આ વિસ્તારોમાં વરસાદ પડી રહ્યો છે
મુંબઈના પશ્ચિમ ઉપનગર અંધેરી, જોગેશ્વરી, ગોરેગાંવ, મલાડ, કાંદિવલી, બોરીવલી, દહીસર, વિલેપાર્લે, સાંતાક્રુઝ, બાંદ્રામાં આ સમયે ભારે વરસાદ પડી રહ્યો છે. જો આવો જ ભારે વરસાદ થોડા સમય સુધી ચાલુ રહ્યો તો પશ્ચિમ ઉપનગરોના નીચાણવાળા વિસ્તારોમાં પાણી ભરાવાનું શરૂ થઈ જશે. ભિવંડી શહેર અને તાલુકામાં ગડગડાટ અને વીજળી સાથે ભારે વરસાદ પડી રહ્યો છે.
વરસાદની વાપસીથી ભિવંડી શહેર અને તાલુકામાં ગડગડાટ અને વીજળી સાથે વરસાદ અને તોફાની પવન ફૂંકાયા. સાંજ થતાં જ ધોધમાર વરસાદ પાછો ફર્યો, જોકે આ વરસાદ લોકોને ગરમીમાંથી રાહત આપતો દેખાઈ રહ્યો છે.
વીજળીના કડાકા સાથે વરસાદનો દોર જારી
વરસાદને (Rain) લગતા વીડિયો સામે આવ્યા છે જેમાં મુંબઈના એલફિન્સ્ટન રોડ પર પાણી ભરાઈ ગયું છે અને લોકોને એ પાણીમાંથી પસાર થવું પડી રહ્યું છે. વડાલા વિસ્તારમાં પણ ધોધમાર વરસાદ પડી રહ્યો છે અને વીજળી પણ ચમકી રહી છે. ચુનાભટ્ટી વિસ્તારનો પણ વીડિયો આવ્યો છે જ્યાં વીજળીના ચમકારા સાથે વરસાદ પડી રહ્યો છે. આ વરસાદમાં સૌથી વધુ મુશ્કેલી દ્વિચક્રી વાહન ચાલકોને થઈ રહી છે.
આ પણ વાંચોઃ
ટ્રેન્ડિંગ સમાચાર
ટોપ સ્ટોરી
