રાજ્યસભાના ઉપનેતા પદેથી હટાવ્યા બાદ રાઘવ ચઢ્ઢાની પહેલી પોસ્ટ: આ ઇમોજી સાથે શેર કર્યો વીડિયો
Raghav Chadha News: આમ આદમી પાર્ટીએ પંજાબના રાજ્યસભા સાંસદ રાઘવ ચઢ્ઢાને ઉપનેતા પદેથી હટાવી દીધા છે અને આ જવાબદારી અશોક કુમાર મિત્તલને સોંપી છે.
Raghav Chadha News: રાજ્યસભામાં આમ આદમી પાર્ટીના ઉપનેતા પદ પરથી હટાવવામાં આવ્યા બાદ સાંસદ રાઘવ ચઢ્ઢાએ સોશિયલ મીડિયા પર પ્રથમ પોસ્ટ શેર કરી છે. જેમાં તેમણે નજર ન લાગે તે માટેની ઇમોજીનો ઉપયોગ કર્યો છે. આ ઇમોજીને 'ઈવિલ આઈ' (Evil Eye) પણ કહેવામાં આવે છે. આ ઇમોજીની સાથે તેમણે તાજેતરના દિવસોમાં સંસદમાં પોતાના દ્વારા ઉઠાવવામાં આવેલા મુદ્દાઓનો વીડિયો શેર કર્યો છે.
— Raghav Chadha (@raghav_chadha) April 2, 2026
2 મિનિટ 45 સેકન્ડનો વીડિયો શેર કર્યો
આપના રાજ્યસભા સાંસદે જે વીડિયો શેર કર્યો છે, તેમાં તેઓ સંસદમાં અનેક મુદ્દાઓ પર બોલતા જોવા મળે છે. તેમણે પોતાના એક્સ (X) હેન્ડલ પર 2 મિનિટ 45 સેકન્ડનો વીડિયો મૂક્યો છે. જેમાં મધ્યમ વર્ગ પર ટેક્સનો બોજ, ડેટા એક્સપાયરી પ્રોબ્લેમ, પેટર્નિટી લીવ (પિતૃત્વ રજા), મિનિમમ બેલેન્સને લઈને લાગતો દંડ, ફૂડ એડલ્ટરેશન (ખોરાકમાં ભેળસેળ), ઇનકમિંગ કોલ ચાર્જ, 28 દિવસનું રિચાર્જ 'સ્કેમ', એક્સેસ બેગેજ ચાર્જીસ, પેપર લીક સ્કેમ, વાયુ પ્રદૂષણ, હેલ્થ ઇન્શ્યોરન્સ પર લાગતો GST અને એરપોર્ટ પર મોંઘા ખોરાક જેવા અનેક મુદ્દાઓ સામેલ છે.
અશોક મિત્તલે શું કહ્યું?
આ સમગ્ર રાજકીય ઘટનાક્રમ પર રાજ્યસભામાં આપના નવા ઉપનેતા અશોક મિત્તલની પ્રતિક્રિયા પણ સામે આવી છે. તેમણે કહ્યું કે આ ફેરફાર એક સામાન્ય પ્રક્રિયા છે અને તેની પાછળ કોઈ વિશેષ કારણ નથી. મીડિયા સાથેની વાતચીતમાં મિત્તલે જણાવ્યું કે આજે તેમની પસંદગી કરવામાં આવી છે અને કાલે કોઈ બીજાની પસંદગી કરવામાં આવશે. રાઘવ ચઢ્ઢાનો ઉલ્લેખ કરતા તેમણે કહ્યું કે તેઓ પાર્ટીના વરિષ્ઠ સાંસદ છે અને તેમની પાસેથી જે શીખ્યા છે તેને આગળ નિભાવશે.
સંજય સિંહે શું કહ્યું?
બીજી તરફ, જ્યારે આ વિષય પર સંજય સિંહ પાસે પ્રતિક્રિયા માંગવામાં આવી ત્યારે તેમણે કહ્યું કે જે કંઈ પણ જણાવવાનું હતું તે રાજ્યસભા સચિવાલયને જણાવી દેવામાં આવ્યું છે.
બે વર્ષ ધારાસભ્ય રહી ચૂક્યા છે રાઘવ ચઢ્ઢા
તમને જણાવી દઈએ કે રાજ્યસભાના સાંસદ બનતા પહેલા રાઘવ ચઢ્ઢા 'આપ'ના ધારાસભ્ય હતા. તેઓ ફેબ્રુઆરી 2020 થી માર્ચ 2022 સુધી દિલ્હી વિધાનસભાના સભ્ય રહ્યા હતા. રાજ્યસભામાં જતા પહેલા તેઓ દિલ્હી જલ બોર્ડના પણ સભ્ય રહ્યા હતા. એપ્રિલ 2022 માં તેઓ રાજ્યસભા માટે ચૂંટાયા હતા.
ટોપ સ્ટોરી
ટ્રેન્ડિંગ સમાચાર
