શ્રીનગર એરપોર્ટ પર 2 અમેરિકી નાગરિકોની અટકાયત, બેગમાંથી સેટેલાઇટ ફોન મળી આવતા હડકંપ, સુરક્ષા એજન્સીઓ એલર્ટ
US Nationals Detained: રવિવારે શ્રીનગર એરપોર્ટ પર નિયમિત સુરક્ષા તપાસ દરમિયાન બે અમેરિકન નાગરિકોના કબજામાંથી સેટેલાઇટ ફોન મળી આવ્યા બાદ તેમને કસ્ટડીમાં લેવામાં આવ્યા હતા.
- શ્રીનગર એરપોર્ટ પર બે અમેરિકી નાગરિકો પાસે સેટેલાઇટ ફોન મળ્યો.
- બંને નાગરિકોની સુરક્ષા તપાસ બાદ પોલીસે અટકાયત કરી.
- ભારતમાં સેટેલાઇટ ફોન રાખવા પર કડક પ્રતિબંધ છે.
- DGCA એ એરલાઇન્સને મુસાફરોને આ નિયમ વિશે જાણ કરવા કહ્યું.
US Nationals Detained: શ્રીનગર એરપોર્ટ પર રવિવારે તે સમયે ફફડાટ વ્યાપી ગયો જ્યારે નિયમિત સુરક્ષા તપાસ દરમિયાન બે અમેરિકી નાગરિકોના સામાનમાંથી સેટેલાઇટ ફોન મળી આવ્યો. સુરક્ષા અધિકારીઓએ તાત્કાલિક બંનેને કસ્ટડીમાં લઈને પૂછપરછ શરૂ કરી હતી અને બાદમાં વધુ તપાસ માટે પોલીસને હવાલે કર્યા હતા. હિરાસતમાં લેવામાં આવેલા વ્યક્તિઓ પૈકી એકની ઓળખ મોન્ટાનાના રહેવાસી જેફ્રી સ્કોટ તરીકે થઈ છે. અધિકારીઓના જણાવ્યા અનુસાર, સેટેલાઇટ ફોન તેમના સામાનમાંથી મળી આવ્યો હતો.
જેફ્રી સ્કોટ કોણ છે?
જે વ્યક્તિની બેગમાંથી સેટેલાઇટ ફોન મળી આવ્યો છે તેનું નામ જેફ્રી સ્કોટ છે. તે અમેરિકાના મોન્ટાના રાજ્યનો રહેવાસી છે. મોન્ટાના અમેરિકાનું એક પહાડી રાજ્ય છે. હાલમાં એ સ્પષ્ટ નથી કે બંને અમેરિકી નાગરિકો કયા હેતુથી શ્રીનગર આવ્યા હતા અને તેમની પાસે સેટેલાઇટ ફોન શા માટે હતો.
ભારતમાં છે પ્રતિબંધ
ભારતમાં સરકારની પૂર્વ મંજૂરી વિના સેટેલાઇટ ફોનનો ઉપયોગ સંપૂર્ણપણે પ્રતિબંધિત છે. 'થુરાયા' (Thuraya) અને 'ઇરિડિયમ' (Iridium) જેવા સેટેલાઇટ ફોન કડક નિયમો હેઠળ આવે છે. પરવાનગી વગર આ ઉપકરણો પાસે હોવા બદલ અટકાયત, ધરપકડ અને ઉપકરણ જપ્ત કરવા જેવી કાર્યવાહી થઈ શકે છે. આ કાર્યવાહી ભારતીય ટેલિગ્રાફ એક્ટ અને અન્ય સુરક્ષા નિયમો હેઠળ કરવામાં આવે છે. સુરક્ષાના કારણોસર ભારતમાં ટેલિકોમ સંબંધિત નિયમો અત્યંત કડક છે. અગાઉ પણ વિદેશી નાગરિકો અને ભારતીયો વિરુદ્ધ આવા કિસ્સાઓમાં કાર્યવાહી થઈ ચૂકી છે.
અગાઉ પણ આવી ઘટનાઓ બની છે
ગયા વર્ષે મે મહિનામાં એક અમેરિકી નેત્રરોગ નિષ્ણાતને પુડુચેરી એરપોર્ટ પર તે સમયે અટકાવવામાં આવ્યા હતા, જ્યારે તેમની પાસે ઇરિડિયમ સેટેલાઇટ ફોન મળ્યો હતો. તેમને હૈદરાબાદ જતી ફ્લાઈટમાં બેસતા અટકાવી દેવામાં આવ્યા અને તપાસ શરૂ કરવામાં આવી હતી. અધિકારીઓના જણાવ્યા મુજબ, અગાઉ પણ ઘણા વિદેશી નાગરિકો, જેમાં એક ચીની નાગરિક અને એક બ્રિટિશ અધિકારીનો સમાવેશ થાય છે, દેશના અલગ-અલગ એરપોર્ટ અને હોટલોમાં પરવાનગી વગર સેટેલાઇટ ડિવાઇસ રાખવા બદલ પકડાઈ ચૂક્યા છે.
DGCA એ જારી કર્યા છે આદેશ
આવા કિસ્સાઓ રોકવા માટે ડાયરેક્ટોરેટ જનરલ ઓફ સિવિલ એવિએશન (DGCA) એ 30 જાન્યુઆરી, 2025 ના રોજ ભારત આવતી તમામ એરલાઈન્સને નિર્દેશો જારી કર્યા હતા. જેમાં જણાવાયું હતું કે મુસાફરોને ફ્લાઈટ દરમિયાન જાહેરાત (announcement), વિદેશમાં આવેલી ઓફિસો અને ઓનબોર્ડ મેગેઝિન દ્વારા આ પ્રતિબંધ વિશે જાણકારી આપવામાં આવે.
ટોપ સ્ટોરી
ટ્રેન્ડિંગ સમાચાર
