24 કલાકમાં આકાશમાં ભયનો માહોલ: ત્રણ પ્લેનમા ડખા પડ્યા, બે વિમાનોએ યુ-ટર્ન લીધો તો એકનું ઈમરજન્સી લેન્ડિંગ
અમદાવાદ દુર્ઘટના બાદ હવાઈ મુસાફરોમાં વધતી ચિંતા; ટેકનિકલ ખામી અને બોમ્બની ધમકી જેવી ઘટનાઓથી હવાઈ સુરક્ષા પર સવાલ.
- છેલ્લા 24 કલાક હવાઈ મુસાફરી માટે ભયાવહ: અમદાવાદ દુર્ઘટના બાદ 3 ગંભીર હવાઈ ઘટનાઓ નોંધાઈ.
- બ્રિટિશ ફાઈટર જેટનું ઈમરજન્સી લેન્ડિંગ: કેરળમાં ઇંધણના અભાવે ફાઈટર પ્લેનને ઉતરાણ કરવું પડ્યું.
- લુફ્થાન્સા અને બોમ્બની ધમકી: હૈદરાબાદ જઈ રહેલી લુફ્થાન્સાની ફ્લાઇટમાં બોમ્બની ધમકી મળતા ફ્રેન્કફર્ટ પરત ફરી.
- એર ઇન્ડિયાના વિમાનને યુ-ટર્ન લેવો પડ્યો: હોંગકોંગથી દિલ્હી આવતી AI-315 ફ્લાઇટમાં ટેકનિકલ ખામી સર્જાતા તેને હોંગકોંગ પરત ફરવું પડ્યું.
- મુસાફરોમાં વધતી ચિંતા: જોકે કોઈ જાનહાનિ નથી થઈ, પણ વારંવાર બનતી આવી ઘટનાઓથી હવાઈ મુસાફરોમાં ભયનો માહોલ છે.
Air India flight emergency: ગુજરાતના અમદાવાદમાં તાજેતરમાં એર ઇન્ડિયા AI171 વિમાન દુર્ઘટનામાં 270 લોકોના કરુણ મૃત્યુ બાદ હવાઈ મુસાફરોમાં ભયનો માહોલ છવાયેલો છે. આ ભય વચ્ચે છેલ્લા 24 કલાકમાં બનેલી ત્રણ અલગ-અલગ હવાઈ ઘટનાઓએ ચિંતામાં વધુ વધારો કર્યો છે. આ 24 કલાક હવાઈ મુસાફરી કરતા લોકો માટે ખૂબ જ ડરામણા રહ્યા છે, જ્યાં 2 વિમાનોએ યુ-ટર્ન લીધો અને એક વિમાનને ઇમરજન્સી લેન્ડિંગ કરવું પડ્યું.
24 કલાકમાં ત્રણ વખત આકાશમાં આતંક
છેલ્લા 24 કલાકમાં પ્રકાશમાં આવેલી ત્રણ હવાઈ ઘટનાઓમાંથી, પહેલી ઘટના બ્રિટિશ ફાઇટર જેટ સાથે બની હતી. આ ફાઇટર પ્લેનને કેરળમાં ઇમરજન્સી લેન્ડિંગ કરવું પડ્યું હતું, જેનું કારણ ઇંધણનો અભાવ હોવાનું કહેવાય છે. બીજી ઘટના લુફ્થાન્સાની ફ્લાઇટ સાથે બની, જે હૈદરાબાદ માટે રવાના થઈ હતી, પરંતુ હવામાં જ વિમાનમાં બોમ્બ હોવાની ધમકી મળતા તેને તરત જ ફ્રેન્કફર્ટ પરત ફરવું પડ્યું. આ ઘટનાએ મુસાફરોમાં ભારે ગભરાટ પેદા કર્યો હતો.
તે જ સમયે, ત્રીજી ઘટના એર ઇન્ડિયાની ફ્લાઇટ AI-315 સાથે બની. આ ફ્લાઇટ હોંગકોંગથી દિલ્હી માટે 200 થી વધુ મુસાફરો સાથે ઉડાન ભરી હતી. જોકે, બોઇંગ 787 વિમાનમાં હવામાં કોઈ ટેકનિકલ ખામી હોવાની શંકાને કારણે ફ્લાઇટને અધવચ્ચેથી જ હોંગકોંગ પરત ફરવું પડ્યું.
એર ઇન્ડિયાનું નિવેદન અને મુસાફરોની ચિંતા
વિમાનમાં ટેકનિકલ ખામી અંગે એર ઇન્ડિયાએ જણાવ્યું હતું કે, "અમે મુસાફરોને તેમના ગંતવ્ય દિલ્હી લઈ જવા માટે શક્ય તેટલી વહેલી તકે વૈકલ્પિક વ્યવસ્થા કરી રહ્યા છીએ. એર ઇન્ડિયા મુસાફરોને થતી અસુવિધા ઘટાડવા માટે શક્ય તેટલી મદદ કરી રહી છે."
રાહતની વાત એ છે કે આ ત્રણેય ઘટનાઓમાં કોઈ હવાઈ મુસાફર કે ક્રૂ મેમ્બરને કોઈ નુકસાન થયું નથી, પરંતુ હવાઈ મુસાફરીને લગતી આવી વારંવારની ઘટનાઓએ મુસાફરોમાં ચિંતા અને ભય વધારી દીધો છે. આ ઘટનાઓ હવાઈ સુરક્ષા અને વિમાનોની જાળવણી પર ગંભીર સવાલો ઉભા કરે છે.
ટોપ સ્ટોરી
ટ્રેન્ડિંગ સમાચાર
