'આર્થિક રીતે સંપન્ન પત્ની ભરષપોષણનો દાવો કરી શકતી નથી', પંજાબ હરિયાણા હાઇકોર્ટનો મોટો આદેશ

હાઈકોર્ટમાં અરજી દાખલ કરતી વખતે મહિલાએ કહ્યું કે ડિસેમ્બર 2018માં ચંડીગઢની ફેમિલી કોર્ટે તેના માટે 10,000 રૂપિયાનું ભરણપોષણ ભથ્થું નક્કી કર્યું હતું

પ્રતિકાત્મક તસવીર

Source : Pexels

પંજાબ-હરિયાણા હાઈકોર્ટે એક મહત્વપૂર્ણ આદેશ જાહેર કરીને સ્પષ્ટ કર્યું છે કે જો કોઈ મહિલા અમીર અને સક્ષમ હોય તો તે તેના પતિ પાસેથી ભરણપોષણનો દાવો ન કરી શકે. આ એક કલ્યાણકારી વ્યવસ્થા છે જેનો હેતુ લાચાર પત્નીને તેના પતિથી અલગ થયા પછી અભાવની સ્થિતિમાંથી બચાવવા અને તેને સમાન જીવન જીવવા માટે સક્ષમ બનાવવાનો છે. આને પતિને હેરાન કરવાનું સાધન ન બનવા દેવુ જોઈએ. આ સાથે હાઈકોર્ટે ભરણપોષણ માટેની મહિલાની અરજીને ફગાવી દીધી હતી.

હાઈકોર્ટમાં અરજી દાખલ કરતી વખતે મહિલાએ કહ્યું કે ડિસેમ્બર 2018માં ચંડીગઢની ફેમિલી કોર્ટે તેના માટે 10,000 રૂપિયાનું ભરણપોષણ ભથ્થું નક્કી કર્યું હતું. આ નિર્ણય સામે પતિએ અપીલ કરતાં એડિશનલ સેશન્સ જજે ભરણપોષણનો હુકમ રદ કર્યો હતો. આ આદેશ સામે અપીલ દાખલ કરતી વખતે અરજદાર મહિલાએ જણાવ્યું હતું કે તે લાયકાત ધરાવતી ડૉક્ટર હોવા છતાં તેનો પુત્ર વિકલાંગ હોવાને કારણે અને 24 કલાક તેની સંભાળ રાખવાના કારણે તે પ્રેક્ટિસ કરી શકતી નથી. અરજદારે 2003માં પરસ્પર સમજૂતીના આધારે તેના પતિથી છૂટાછેડા લીધા હતા. તે દરમિયાન ભરણપોષણ ભથ્થા અંગે કોઈ નિર્ણય લેવામાં આવ્યો ન હતો. બાદમાં અરજદારે ભરણપોષણ માટે કેસ દાખલ કર્યો હતો અને ત્યારબાદ જ તેનો નિર્ણય લેવામાં આવ્યો હતો.

પતિએ આ હુકમ સામે અપીલ કરી હતી જ્યાં હુકમ રદ કરવામાં આવ્યો હતો. અપીલમાં નિર્ણય તેના પતિની તરફેણમાં આવ્યો હતો.  હાઈકોર્ટે એડીશનલ સેશન્સ જજના આદેશ સામે પત્નીની અપીલ પર પોતાનો ચુકાદો આપતાં જણાવ્યું હતું કે ભરણપોષણની વ્યવસ્થા સામાજિક ન્યાયને આગળ વધારવા અને આશ્રિત મહિલાઓ, બાળકો અને માતા-પિતાને રક્ષણ આપવા માટે છે. આ રકમ નક્કી કરતી વખતે એ જોવું જરૂરી છે કે પતિ પાસે પર્યાપ્ત સંસાધનો છે કે કેમ અને પર્યાપ્ત સંસાધનો હોવા છતાં તે પત્નીની સંભાળ રાખવામાં બેદરકારી રાખી રહ્યો નથી ને એ પણ જોવું જરૂરી છે. સાથે એ પણ જોવું જરૂરી છે પત્ની પોતાનું ભરણપોષણ કરવામાં અસમર્થ છે. હાલના કેસમાં એવું નથી કે અરજદાર પાસે પોતાનું અને તેના બાળકોના ભરણપોષણ માટે પૂરતા સંસાધનો નથી.

આ સિવાય અરજદારના પતિ તેમના અપંગ પુત્રના ભરણપોષણ માટે દર મહિને 15,000 રૂપિયા ચૂકવી રહ્યા છે. પત્નીને કોઈ આર્થિક મુશ્કેલી જણાતી નથી. અરજદાર છૂટાછેડા પહેલા જે રીતે જીવતો હતો તે જ જીવનધોરણ જાળવી રાખવા માટે પર્યાપ્ત સંસાધનો ઉપલબ્ધ છે. આવી સ્થિતિમાં આ કોર્ટ તેમને ભરણપોષણ ભથ્થા માટે હકદાર માનતી નથી.