Jamnagar Rain: જામજોધપુરમાં 6 ઈંચ વરસાદ ખાબક્યો, નીચાણવાળા વિસ્તારોમાં ભરાયા પાણી
હવામાન વિભાગની આગાહી વચ્ચે જામજોધપુર શહેર અને ગ્રામ્ય વિસ્તારોમાં ધોધમાર વરસાદ વરસ્યો છે. સાંજના છ વાગ્યા સુધીમાં 6 ઇંચ જેટલો વરસાદ નોંધાયો છે.
- જામજોધપુરમાં 6 ઇંચ વરસાદથી નીચાણવાળા વિસ્તારોમાં પાણી ભરાયા.
- રાજકોટના ઉપલેટા, જૂનાગઢના માંગરોળમાં ભારે વરસાદ વરસ્યો.
- સૌરાષ્ટ્ર સહિત 19 જિલ્લામાં ઓરેન્જ એલર્ટ જાહેર કરાયું.
જામનગર: હવામાન વિભાગની આગાહી વચ્ચે જામજોધપુર શહેર અને ગ્રામ્ય વિસ્તારોમાં ધોધમાર વરસાદ વરસ્યો છે. સાંજના છ વાગ્યા સુધીમાં 6 ઇંચ જેટલો વરસાદ નોંધાયો છે. જામ જોધપુરમાં મેઘરાજાએ બપોર બાદ ધમાકેદાર એન્ટ્રી કરી હતી. જામ જોધપુર શહેરમાં બપોરના 2 વાગ્યાથી લઈ 4 વાગ્યા સુધીમાં 2 ઇંચ અને બાદમાં 6 વાગ્યા સુધીમાં વધુ 4 ઇંચ વરસાદ ખાબક્યો હતો. જામ જોધપુરમાં કુલ 6 ઈંચ જેટલો વરસાદ વરસતા નીચાણવાળા વિસ્તારોમાં પાણી ભરાયા હતા.
ભારે વરસાદના કારણે નદીઓમાં પૂર જેવી સ્થિતિ
જામજોધપુરના સ્ટેશન રોડ, બાલમંદિર રોડ, આઝાદ ચોક, લીમડા લાઇન, તિરૂપતિ સોસાયટી સહિતના અનેક વિસ્તારોમાં વરસાદ વરસ્યો છે. ગ્રામ્ય વિસ્તારના સીદસર, ગીગણી, વસંતપુર, બાલવા જેવા ગામોમાં પણ સાર્વત્રિક વરસાદ નોંધાયો છે. જામજોધપુરમાં વરસેલા ભારે વરસાદના કારણે નદીઓમાં પૂર જેવી સ્થિતિ સર્જાઈ હતી. ભારે વરસાદને પગલે અનેક નીચાણવાળા વિસ્તારોમાં પાણી ભરાયા હતા. ભારે વરસાદ વરસતા ખેતી માટે અનુકૂળ માહોલ સર્જાતા ખેડૂતોમાં ખુશી છે. રાજ્યના હવામાન વિભાગ દ્વારા આવતીકાલે પણ સૌરાષ્ટ્ર અને કચ્છમાં વરસાદની આગાહી કરવામાં આવી છે. જામનગર જિલ્લામાં પણ વરસાદને લઈ આગાહી કરાઈ છે.
રાજકોટના ઉપલેટા શહેરમાં વીજળીના કડાકા-ભડાકા સાથે વરસાદ
રાજકોટ જિલ્લાના અનેક તાલુકાઓમાં આજે મેઘરાજાએ જમાવટ કરી છે. રાજકોટ જિલ્લાના ઉપલેટામાં આજે મેઘરાજા મન મૂકીને વરસ્યા છે. ઉપલેટા શહેરમાં વીજળીના કડાકા-ભડાકા સાથે એક કલાકમાં દોઢ ઈંચ વરસાદ વરસ્યો હતો. ભારે વરસાદને કારણે ઉપલેટામાં રસ્તાઓ પર જાણે નદીઓ વહેતી હોય તેવા દ્રશ્યો જોવા મળ્યા હતા. ઉપલેટાના ઝકરિયા ચોક, અશ્વિન ચોક, બસ સ્ટેન્ડ ચોક વિસ્તારમાં પાણી ભરાયા હતા. ઉપલેટા અને ગ્રામ્ય પંથકમાં સારા વરસાદથી ખેડૂતો ખુશખુશાલ છે.
આ પણ વાંચો- Amreli Rain: અમરેલી જિલ્લામાં વરસાદની ધમાકેદાર એન્ટ્રી, ધારી, સાવરકુંડલા, બાબરા, લાઠીમાં વરસાદ
હવામાન વિભાગની આગાહી વચ્ચે સક્રિય થયેલી મજબૂત સિસ્ટમના કારણે સૌરાષ્ટ્ર, દક્ષિણ અને મધ્ય ગુજરાતના વિસ્તારોમાં ધોધમાર વરસાદ તૂટી પડ્યો હતો. આકાશી આફત અને મહેરની વચ્ચે સૌથી ગંભીર સ્થિતિ જૂનાગઢ જિલ્લાના માંગરોળમાં જોવા મળી છે, જ્યાં 7 ઈંચથી વધુ વરસાદ ખાબક્યો હતો.
19 જિલ્લામાં વરસાદનું ઓરેન્જ એલર્ટ
રાજ્યના 19 જિલ્લામાં વરસાદનું ઓરેન્જ એલર્ટ આપવામાં આવ્યું છે. દીવ, દમણ અને દાદરા-નગર હવેલીમાં વરસાદનું ઓરેન્જ એલર્ટ આપવામાં આવ્યું છે. રાજ્યના 5 જિલ્લામાં વરસાદનું યલ્લો એલર્ટ આપવામાં આવ્યું છે.
ટોપ સ્ટોરી
ટ્રેન્ડિંગ સમાચાર
