રાજકોટમાં સમૂહ લગ્નના નામે કરોડોનું કૌભાંડ: મુખ્ય સૂત્રધાર ચંદ્રેશ છત્રોલા આખરે ઝડપાયો, ૨૮ યુગલો રઝળી પડ્યા!
રેલનગર ખાતેથી ધરપકડ, દાતાઓ પાસેથી લાખોનું દાન ઉઘરાવી રફુચક્કર થયો હતો; છેતરપિંડી સહિતની કલમો હેઠળ ગુનો દાખલ.
Samuh Lagan fraud Rajkot: રાજકોટ: રાજકોટમાં ઋષિવંશી સમાજના સમૂહ લગ્નના નામે લાખો રૂપિયાનું કૌભાંડ આચરીને ફરાર થયેલા મુખ્ય સૂત્રધાર ચંદ્રેશ છત્રોલાને આખરે પ્રદ્યુમન નગર પોલીસે ઝડપી પાડ્યો છે. લગભગ બે મહિનાથી પોલીસને થાપ આપીને સુરત, નડિયાદ સહિતના શહેરોમાં નાસતો ફરતો ચંદ્રેશ, રાજકોટના રેલનગર ખાતે આવેલા પોતાના ઘરેથી જ પોલીસના હાથે ઝડપાઈ ગયો હતો. આ પહેલા પોલીસે આ કેસમાં અન્ય ત્રણ આરોપીઓની ધરપકડ કરી લીધી હતી.
રાજકોટમાં ઋષિવંશી સમાજના બેનર હેઠળ સમૂહ લગ્નનું ભવ્ય આયોજન કરીને લાખો રૂપિયાની છેતરપિંડી આચરનાર મુખ્ય સૂત્રધાર ચંદ્રેશ છત્રોલાની પ્રદ્યુમન નગર પોલીસે ધરપકડ કરી છે. આ કૌભાંડનો પર્દાફાશ થયાના લગભગ બે મહિના બાદ પોલીસને આ મોટી સફળતા મળી છે.
કૌભાંડની સમગ્ર ઘટના
૨૨ ફેબ્રુઆરીના રોજ રાજકોટના રેલનગર ખાતે ઋષિવંશી સમાજના સમૂહ લગ્નનું આયોજન કરવામાં આવ્યું હતું. મુખ્ય આયોજક ચંદ્રેશ છત્રોલા સહિત કુલ ચાર આયોજકોએ આ કાર્યક્રમની જવાબદારી સંભાળી હતી. જોકે, લગ્નના દિવસે સવારે પાંચ વાગ્યાની આસપાસ જ ચંદ્રેશ છત્રોલા અને તેના સાથીઓએ પોતાના ફોન બંધ કરી દીધા અને ફરાર થઈ ગયા. આના કારણે લગ્ન માટે પહોંચેલા વર પક્ષ અને કન્યા પક્ષના ૨૮ યુગલોનો શુભ પ્રસંગ રઝળી પડ્યો હતો.
આ કૌભાંડીઓએ માત્ર વર-વધૂ પાસેથી જ નહીં, પરંતુ દાતાઓ પાસેથી પણ લાખો રૂપિયાનું દાન અને કરિયાવરના નામે વસ્તુઓ વસૂલ કરી હતી. પૈસા ઉઘરાવીને ચંદ્રેશ રફુચક્કર થઈ જતા તેના સહિત ચાર લોકો સામે પ્રદ્યુમન નગર પોલીસ સ્ટેશનમાં છેતરપિંડી સહિતની વિવિધ કલમો હેઠળ ગુનો દાખલ કરવામાં આવ્યો હતો.
પોલીસની કાર્યવાહી અને ધરપકડ
ચંદ્રેશ છત્રોલા છેતરપિંડી આચર્યા બાદ સુરત, નવસારી, નડિયાદ સહિતના વિવિધ શહેરોમાં નાસતો ફરતો હતો. પ્રદ્યુમન નગર પોલીસે ટેકનિકલ સર્વેલન્સ અને બાતમીના આધારે તેની તપાસ ચાલુ રાખી હતી. આખરે, પોલીસને સફળતા મળી અને ચંદ્રેશ છત્રોલાની તેના રાજકોટના રેલનગર વિસ્તારમાં આવેલા ઘરેથી ધરપકડ કરવામાં આવી. આ પહેલા, પોલીસે આ કેસમાં અન્ય ત્રણ આરોપીઓની ધરપકડ પણ કરી હતી.
પોલીસ અને દાતાઓના સહયોગથી ૧૧ યુગલોના લગ્ન
આ કૌભાંડને કારણે ૨૮ યુગલોના લગ્નો અટકી પડ્યા હતા, પરંતુ પોલીસ અને દાતાઓના સહયોગ અને સમયસર હસ્તક્ષેપને કારણે તેમાંથી ૧૧ યુગલોના લગ્ન સફળતાપૂર્વક કરાવી શકાયા હતા.
હવે પ્રદ્યુમન નગર પોલીસ દ્વારા મુખ્ય સૂત્રધાર ચંદ્રેશ છત્રોલાની ઊંડાણપૂર્વક પૂછપરછ હાથ ધરવામાં આવશે. આ પૂછપરછમાં આ કૌભાંડમાં સંડોવાયેલા અન્ય લોકો, ઉઘરાવેલા નાણાં ક્યાં ગયા અને કૌભાંડની સંપૂર્ણ મોડસ ઓપરેન્ડી જેવી વિગતો બહાર આવવાની શક્યતા છે.
ટોપ સ્ટોરી
ટ્રેન્ડિંગ સમાચાર
