Chinese garlic: ભારત સહિત દુનિયાના અનેક દેશોમાં ચાઇનીઝ લસણ પર છે પ્રતિબંધ, જાણો ગોંડલ સુધી કેવી રીતે પહોંચ્યું?
Chinese garlic:આ ચાઇનીઝ લસણ ગોંડલ સુધી કેવી રીતે પહોંચ્યું તેને લઇને ચોંકાવનારો ખુલાસો થયો હતો
Chinese garlic: રાજકોટના ગોંડલ માર્કેટ યાર્ડમાં ચાઈનીઝ લસણના વેચાણને લઈને હોબાળો મચી ગયો હતો. અહીં લાવવામાં આવેલા પ્રતિબંધિત ચાઈનીઝ લસણથી નારાજ ખેડૂતોએ સમગ્ર સૌરાષ્ટ્રમાં તેની હરાજી પર પ્રતિબંધ મૂકવાનો નિર્ણય કર્યો છે. આ લસણની આજે ક્યાંય હરાજી થઈ ન હતી. બે દિવસ પહેલા ગુજરાતના ગોંડલ શાક માર્કેટ યાર્ડમાં ભારતીય લસણ સાથે ભેળવવામાં આવેલ પ્રતિબંધિત ચાઈનીઝ લસણના 30 કટ્ટા મળી આવ્યા હતા. આ ચાઇનીઝ લસણ ગોંડલ સુધી કેવી રીતે પહોંચ્યું તેને લઇને ચોંકાવનારો ખુલાસો થયો હતો.
રાજ્યમાં દાણચોરીથી ચાઈનીઝ લસણ પહોંચ્યું હોવાની આશંકા છે.ચાઈનીઝ લસણ બેંગલુરૂથી વાયા મુંબઈ થઈ ગુજરાત પહોંચ્યું હોવાની માહિતી મળી રહી છે. ઉપલેટાનો એક વેપારી ચાઈનીઝ લસણ લાવ્યાનો આરોપ છે. ઉપલેટાના અસફાક નામના વેપારીએ ગોંડલ પોલીસ સમક્ષ કબૂલાત કરી હતી. અસફાકે 30 કટ્ટા ચાઈનીઝ લસણના મંગાવ્યાનો સ્વીકાર કર્યો હતો. ચાઈનીઝ લસણના નમૂના લેબોરેટરીમાં ટેસ્ટિંગ માટે મોકલાયા હતા. ગોંડલ બી ડિવિઝન પોલીસે અલ્તાફ નામના વેપારીનું નિવેદન લીધુ હતું.
ખેડૂતોનો આક્ષેપ છે કે લસણની માંગ વધી જતાં યાર્ડમાં ચાઈનીઝ લસણ લાવવાનો પ્રયાસ કરવામાં આવ્યો હતો. ગુજરાતના ખેડૂતોને પૂરના કારણે પાકનું મોટું નુકસાન થયું છે. આવી સ્થિતિમાં જો ચાઈનીઝ લસણ કે અન્ય ચાઈનીઝ શાકભાજી ભારતીય બજારમાં આવશે તો ખેડૂતોને વધુ નુકસાન થશે. અમેરિકા સહિત વિશ્વના ઘણા દેશોમાં ચાઈનીઝ લસણ પર પ્રતિબંધ છે. ચીન મોટા પાયે લસણની ખેતી કરે છે. આ પછી તે તેને કાયદેસર અને ગેરકાયદેસર રીતે વિશ્વના ઘણા દેશોમાં મોકલે છે.
ચાઈનીઝ લસણમાં ઘણા પ્રકારના હાનિકારક કેમિકલનો ઉપયોગ કરવામાં આવે છે. ચાઇનીઝ લસણ ઉગાડવામાં મેટલ, સીસું અને ક્લોરિનનો ઉપયોગ થાય છે. લોકોને એ પણ ખબર નથી કે તેઓ લસણ સમજીને જે ખાય છે તે નકલી છે. કારણ કે ચાઈનીઝ લસણનો સ્વાદ અસલ જેવો જ હોય છે. એટલા માટે કેટલાક લોકો સરળતાથી અસલી કે ચાઇનીઝ લસણ વચ્ચે તફાવત કરી શકતા નથી. આ લસણ દેખાવમાં સફેદ હોય છે અને તેની કળીઓ જાડી હોય છે.
નિષ્ણાતોના મતે ચાઇનીઝ લસણ ખાવાથી નર્વસ સિસ્ટમ સંબંધિત ગંભીર બીમારીઓ થાય છે. આનાથી કેન્સરનું જોખમ પણ વધી જાય છે. ચાઈનીઝ લસણ આપણા દેશી લસણ કરતા મોટું છે. જેની અંદર રાસાયણિક મિશ્રણ હોય છે. ભારત સરકારે તેના પર પ્રતિબંધ મૂક્યો છે. તે જમીનની ફળદ્રુપતા માટે પણ હાનિકારક છે.
ટ્રેન્ડિંગ સમાચાર
ટોપ સ્ટોરી
