સુરતમાંથી ફરી એકવાર 5 કરોડનું 'તરતું સોનું' ઝડપાયું: 3 આરોપીઓની ધરપકડ
વ્હેલની ઊલટી ગણાતા એમ્બરગ્રીસનો મોટો જથ્થો અડાજણ વિસ્તારમાંથી કબજે; આરોપીઓ વેરાવળથી વેચાણ માટે સુરત આવ્યા હતા.
- સુરત પોલીસની SOG (સ્પેશિયલ ઓપરેશન્સ ગ્રુપ) ટીમે ₹5 કરોડથી વધુ કિંમતનું 'તરતું સોનું' એટલે કે એમ્બરગ્રીસ (ambergris) ઝડપી પાડ્યું છે.
- આ મામલે પોલીસે ઉસામાખાન પઠાણ, મોઈનુદ્દીન મન્સૂરી અને વસીમ ઈકબાલ મુલાઉ નામના 3 આરોપીઓની ધરપકડ કરી છે.
- ઝડપાયેલું એમ્બરગ્રીસનું વજન 5.04 કિલોગ્રામ છે, જે આરોપીઓ વેરાવળથી વેચાણ માટે સુરત લાવ્યા હતા.
- એમ્બરગ્રીસ એ વ્હેલ માછલીની ઊલટી છે, જેનો ઉપયોગ મોંઘા પરફ્યુમ બનાવવા માટે થાય છે. ભારતમાં તેનો વેપાર કરવો વન્યજીવન સંરક્ષણ અધિનિયમ, 1972 હેઠળ ગેરકાયદેસર છે.
- છેલ્લા 3 દિવસમાં સુરત SOG દ્વારા કુલ ₹10.76 કરોડનો એમ્બરગ્રીસનો જથ્થો જપ્ત કરવામાં આવ્યો છે, જે ગેરકાયદે વેપારની મોટા પાયે ચાલતી પ્રવૃત્તિ દર્શાવે છે.
Surat whale vomit seizure: સુરત શહેર પોલીસે વધુ એક વખત મોટી સફળતા હાંસલ કરી છે. SOG (સ્પેશિયલ ઓપરેશન્સ ગ્રુપ) ની ટીમે પાલ વિસ્તારમાં દરોડા પાડીને 5 કરોડ રૂપિયાથી વધુ કિંમતનું 'તરતું સોનું' એટલે કે એમ્બરગ્રીસ (ambergris) ઝડપી પાડ્યું છે. આ મામલે પોલીસે 3 આરોપીઓની ધરપકડ કરી છે, જેઓ વેચાણ માટે આ કીમતી પદાર્થ વેરાવળથી સુરત લાવ્યા હતા. આ માલસામાનને ગુજરાત વન વિભાગને સોંપવામાં આવ્યો છે.
પોલીસની કાર્યવાહી અને આરોપીઓની ધરપકડ
સુરત પોલીસ કમિશ્નર અનુપમસિંહ ગેહલોતના માર્ગદર્શન હેઠળ, ડીસીપી રાજદીપસિંહ નકુમ અને પીઆઈ એ.પી. ચૌધરીની ટીમને આ મામલે ગુપ્ત માહિતી મળી હતી. માહિતીના આધારે, પોલીસે અડાજણ વિસ્તારમાં વોચ ગોઠવી અને ઝિર્કોન એરેના, ભાઠા ગામ પાસે ત્રણ શંકાસ્પદ આરોપીઓને ઝડપી પાડ્યા. આરોપીઓની પૂછપરછ અને તપાસ કરતાં તેમની પાસેથી કાપડની બેગમાંથી 5.04 કિલોગ્રામ એમ્બરગ્રીસ મળી આવ્યું, જેની આંતરરાષ્ટ્રીય બજારમાં કિંમત 5.04 કરોડ રૂપિયા જેટલી આંકવામાં આવી છે. પકડાયેલા આરોપીઓમાં ઉસામાખાન પઠાણ, મોઈનુદ્દીન મન્સૂરી અને વસીમ ઈકબાલ મુલાઉનો સમાવેશ થાય છે.
વેરાવળથી સુરત સુધીનો ગેરકાયદે વેપાર
આરોપીઓએ પોલીસને જણાવ્યું કે તેઓ આ એમ્બરગ્રીસ વેરાવળથી લઈને આવ્યા હતા અને સુરતમાં તેનો ઊંચા ભાવે સોદો કરવાની આશા રાખતા હતા. વ્હેલ માછલીની ઊલટીથી બનેલો આ પદાર્થ, જેને આંતરરાષ્ટ્રીય બજારમાં 'ફ્લોટિંગ ગોલ્ડ' તરીકે ઓળખવામાં આવે છે, તેનો ઉપયોગ મુખ્યત્વે મોંઘી પરફ્યુમ બનાવવા માટે થાય છે. ભારતમાં વન્યજીવન સંરક્ષણ અધિનિયમ, 1972 હેઠળ વ્હેલની ઊલટીનો વેપાર કરવો કાયદેસર ગુનો છે, અને જો તે કોઈને મળે તો તેને પોલીસ કે વન વિભાગને સોંપવાનો નિયમ છે.
આ એક મોટી સફળતા ગણાય છે, કારણ કે છેલ્લા ત્રણ દિવસમાં સુરત SOG દ્વારા કુલ 10.76 કરોડ રૂપિયાનો એમ્બરગ્રીસનો જથ્થો જપ્ત કરવામાં આવ્યો છે, જે દર્શાવે છે કે આ ગેરકાયદે વેપાર મોટા પાયે ચાલી રહ્યો છે. પોલીસે આરોપીઓ સામે ગુનો નોંધીને વધુ તપાસ હાથ ધરી છે.
Before You Go
Bhavnagar Fake liquor scandal | ભાવનગરમાં ડુપ્લીકેટ દારૂમાં શિક્ષક હિતેશ પરમારનું શંકાસ્પદ મોત
ટોપ સ્ટોરી
ટ્રેન્ડિંગ સમાચાર
