Surat: વેપારીને હનીટ્રેપમાં ફસાવી પૈસા પડાવ્યાના આરોપમાં મહિલાની ધરપકડ, જાણો વિગતો

સુરતના ઉતરાણ વિસ્તાર કે જ્યાં વેપારીને હનીટ્રેપમાં ફસાવી પૈસા પડાવ્યાના આરોપમાં એક મહિલાની ધરપકડ કરવામાં આવી છે.

પ્રતિકાત્મક તસવીર

સુરત:  સુરતના ઉતરાણ વિસ્તાર કે જ્યાં વેપારીને હનીટ્રેપમાં ફસાવી પૈસા પડાવ્યાના આરોપમાં એક મહિલાની ધરપકડ કરવામાં આવી છે. સોનલ નામની આ મહિલાએ સાબુના વેપારી સાથે પહેલાં તો મિત્રતા કેળવી હતી. બાદમાં તેને પોતાના ઘરે બોલાવ્યો હતો. વેપારી જેવો સોનલના ઘરે પહોંચ્યો તો તેને એક રુમમાં એકલો બેસાડી રાખવામાં આવ્યો હતો. આ સમયે પહેલેથી જ ઘરમાં સોનલનો પતિ અને અન્ય સાગરિતો છૂપાઈને બેઠા હતા. તેઓ અચાનક જ આવી ધમક્યા હતાં અને આવી વેપારીને માર મારવા લાગ્યા. તેમણે વેપારીના મોબાઈલમાથી સોનલના નંબર અને કોલ હિસ્ટ્રી ડિલીટ કરી નાંખ્યા હતાં. બાદમાં તેની પાસેથી 5 લાખ રૂપિયા માગ્યા હતાં. રૂપિયા ન આપવા પર સમાજમાં બદનામ કરવાની ધમકી આપી હતી. સાથે જ વેપારીના ખિસ્સામાંથી અઢી હજાર રૂપિયા કાઢી લીધા હતા.  

અમદાવાદના કાલુપુરમાં ભર બપોરે યુવકને છરીના ઘા ઝિંકી પતાવી દીધો

રિક્ષામાં ત્રણ શખ્સ જતા હતા ત્યારે પાછળ રિક્ષામાં આવેલા શખ્સોએ પહેલા રિક્ષા પર તીક્ષ્ણ હથિયારો વડે હુમલો કર્યો હતો. જેથી રિક્ષામાં બેઠેલા ત્રણેય શખ્સ ભાગ્યા હતા. તેનો પીછો કરીને આરોપી સાદિક હુસેન અને લીયાકત હુસેને ભેગા મળીને તીક્ષ્ણ હથિયારો વડે પાંચકુવા પાસે જાહેરમાં સબાન અલી મોમીનને ઘા માર્યા હતા. સબાનઅલીને VS હોસ્પિટલ લઈ જવાતા ફરજ પરના ડોક્ટરે મૃત જાહેર કર્યો હતો. ફરિયાદી મોહમ્મદ ફૈઝાન અતરવાલા, મૃતકનો માસિયાઈ ભાઈ છે. ફરિયાદીના ભાઈ કાસીમહુસેનને પણ તલવારના ઘા મરાયા હતા. પ્રાથમિક માહિતી પ્રમાણે લગ્ન પ્રસંગમાં જમવાની બાબતમાં ટોકવા જેવી બાબતમાં મનદુઃખ રાખીને આરોપીઓએ હુમલો કર્યો હતો.

સીટીએમમાં ડબલ ડેકર બ્રિજ પરથી યુવતીએ લગાવી છલાંગ

સીટીએમ પાસેના ડબલ ડેકર ઓવરબ્રિજ ઉપરથી ગઈકાલે બપોરે અજાણી યુવતીએ છલાંગ મારીને આપઘાતનો પ્રયાસ કર્યો હતો. જો કે લોકો બચાવવા જાય તે પહેલા યુવતીએ કૂદકો માર્યો હતો.ગંભીર હાલતમાં યુવતીને સારવાર માટે હોસ્પિટલમાં દાખલ કરવામાં આવી છે. આ બનાવનો વિડિયો સોશિયલ મીડિયામાં વાયરલ થયો હતો. આ કેસની વિગત એવી છે કે પૂર્વ વિસ્તારમાં ખોખરાથી સીટીએમ તરફ જતા ઓવરબ્રિજ ઉપર ગઈકાલે બપોરે એક યુવતીએ અગમ્ય કારણોસર ડબલ ડેકર ઓવર બ્રિજ ઉપરથી કૂદકો  મારતી હોવાની જાણ થતાં લોકોનું ટોળું એકઠું થયું હતું. લોકો બચાવવા જાય તે પહેલા યુવતીએ બ્રિજ ઉપરથી છલાંગ મારી હતી જેથી શરીરે ગંભીર ઇજાઓ થઇ હતી.   આ બનાવની જાણ થતાં એમ્બ્યુલન્સ આવી પહોચી હતી અને સ્થળ પર સારવાર કરીને વધુ સારવાર માટે હોસ્પિટલમાં ખસેડવામાં આવી હતી. પૂર્વ વિસ્તારમાં છેલ્લા કેટલાક સમયથી ગૃહ કલેશના કારણે મહિલાના આપઘાતના બનાવો વધી રહ્યા છે.