અફઘાનિસ્તાન: મસ્જિદમાં નમાજ દરમિયાન બોમ્બ બ્લાસ્ટ, 62 લોકોના મોત

પૂર્વ નંગહરહાર પ્રાંતના હસ્ક મીના જિલ્લામાં બ્લાસ્ટના કારણે મસ્જિદની છત ધરાશાઈ થઈ હતી અને આ ઘટનામાં 55 જેટલા લોકો ઘાયલ થયા છે.

જલાલાબાદ: અફઘાનિસ્તાનમાં શુક્રવારે મસ્જિદમાં નમાઝ સમયે થયેલા બૉમ્બ વિસ્ફોટમાં ઓછામાં ઓછા 62 લોકોનાં મૃત્યુ થયા છે. જ્યારે 55 લોકો ઘાયલ છે. અધિકારીઓએ આ જાણકારી આપી છે. પ્રાંતના રાજ્યપાલના પ્રવક્તા અત્તાઉલ્લાહ ખાગ્યાનીએ જણાવ્યું કે પૂર્વ નંગહરહાર પ્રાંતના હસ્ક મીના જિલ્લામાં બ્લાસ્ટના કારણે મસ્જિદની છત ધરાશાઈ થઈ હતી અને આ ઘટનામાં 55 જેટલા લોકો ઘાયલ થયા છે. તેઓએ જણાવ્યું કે પ્રાંતીય રાજધાની જલાલાબાદથી લગભગ 50 કિલોમીટર દૂર આ ઘટના બની છે. હાલમાં આ હુમલાની જવાબદારી કોઈ સંગઠને લીધી નથી પરંતુ તાલિબાન અને ઇસ્લામિક સ્ટેટ બન્ને આ પ્રાંતમાં સક્રિય છે. સંયુક્ત રાષ્ટ્ર મુજબ આ વર્ષે જુલાઈથી સપ્ટેમ્બર સુધીમાં હિંસામાં ઓછામાં ઓછા 1174 નાગરિકોનાં મૃત્યુ થયાં છે અને 3139 લોકો ઘાયલ થયા છે.